Ke Pi’ Got e Athap ko Yafas ni Manemus u Fayleng

“Ya tin ni sunumeg Got e turguy Got ni nge m’ay fan, ni gathi yad e ra lemniged, machane bochan e Got e lemnag ni nge yodorom. Machane yad be son u fithik’ e l’agan’.”​—ROM. 8:20.

1, 2. (a) Mang ni ba ga’ fan e athap ko yafas ni manemus u fayleng u wan’dad? (b) Mang fan ni boor e girdi’ ni de michan’rad ko yafas ni manemus u fayleng?

SANA kam felfelan’ u nap’an ni kam fil ni dab kun pilibthir ma dab ku unim’ ma rayog ni ngan par u fayleng ni manemus boch nga m’on. (John 17:3; Rev. 21:3, 4) Sana kam felfelan’ ni kam un ko machib ma ga be weliy ko mang e be yog e Bible ni ngad athapeged ngak boch e girdi’. Ngan athapeg e yafas ni manemus e bang ko fare thin nib fel’ ni gad ma machibnag. Ya ma dag ko uw rogon e yafas u wan’dad.

² Pi yurba’ i teliw ni googsur e darur athapeged e yafas ni manemus u fayleng. Be fil e Bible ngodad nra yim’ e girdi’ ma dariy ban’en nra par nib fas fa ra yan nga bang. Boor e teliw ni yad ma machibnag nra yim’ be’ me yan yaan nga tharmiy, machane re machib ney e der fil e Bible ngodad. (Ezek. 18:20) Arfan ni boor e girdi’ ni de michan’rad ni bay e yafos ni manemus u fayleng. Ere rayog ni ngad fithed ko: Riyul’ ni be yog e Bible u murung’agen e re athap nem? Faanra riyul’ ni aram rogon, ere wuin e som’on ni ke yog Got e re n’em ngak girdi’?

Ngan Sonnag e ‘Pi N’en nib M’ay Fan u Fithik’ e L’agan’’

3. Uw rogon nib m’agan’ Got ko yafas ko girdi’ ko tabolngin?

³ Ke tamilangnag Jehovah ko som’on e n’en nib m’agan’ ngay ni fan ko girdi’. Ke dag Got nib tamilang nrayog ni nge par Adam ni dariy n’umngin nap’an ni faanra fol. (Gen. 2:9, 17; 3:22) Ke guy pifak Adam ni daki flont e girdi’ ma aram me tabab ni nge pilibthir e girdi’ i yan mar m’ad. (Gen. 3:23, 24) Ma ki ngoch i yan nap’an e yafas ko girdi’. Ke yim’ Adam ni ke gaman 930 e duw rok. Me yim’ Shem ni ke gaman 600 e duw rok ma Arpakshad ni fak e yim’ ni 438 e duw rok. Terah ni chitamangin Abraham e yim’ ni ke gaman 205 e duw rok, me Abraham e yim’ ni 175 e duw rok. Isak ni fak Abraham e yim’ ni ke gaman 180 e duw rok ma Jakob ni fak e yim’ ni ke gaman 147 e duw rok. (Gen. 5:5; 11:10-13, 32; 25:7; 35:28; 47:28) Boch e girdi’ e ke nang fan ni ke ngoch nap’an e yafas ko girdi’ ya dabkiyog ni ngan par ni manemus! Ere rayog ni nge l’agan’rad ko yafas ni manemus bayay fa?

4. Mang fan nib mich u wan’ e piin nib yul’yul’ kakrom nra fulweg Got e yafas ni mul u pa’ Adam?

⁴ Be gaar e Bible: “Tin ni sunumeg Got e turguy Got ni nge m’ay fan, ni gathi yad e ra lemniged, machane bochan e Got e lemnag ni nge yodorom. Machane yad be son u fithik’ e l’agan’.” (Rom. 8:20) Mang e nge l’agan’uy ngay? Bin som’on e yiiy u Bible e be weliy ni “fak fare pin” e ra ‘pirdiiy lolugen fare porchoyog.’ (Mu beeg e Genesis 3:1-5, 15.) Fak fare pin ni kan micheg e rayog ni nge l’agan’dad ngay ni dabi pag Got e n’en nib m’agan’ ngay ni fan ko girdi’. Ke pagan’ boch e girdi’ ngay ni bod Abel nge Noah ni rayog rok Got ni nge fulweg fare tow’ath ni mul u pa’ Adam. Pi girdi’ ney e kar nanged ni ngan ‘k’ad wurilen ay fak fare pin’ e ra map e racha’ nga but’.​—Gen. 4:4; 8:20; Heb. 11:4.

5. Mang e be dag nib mich u wan’ Abraham ni bay e fas ko yam’?

⁵ Am lemnag e n’en ni buch rok Abraham u nap’an ni skengnag Got ni “nge pi’ Isak ni maligach . . . ni kari maagirag rok.” (Heb. 11:17) Mang fan nib m’agan’ ngay ni nge pi’ fak ni maligach? (Mu beeg e Hebrews 11:19.) Ba mich u wan’ nra faseg Got e yam’! Ere bay fan ni nge mich u wan’ Abraham nra fas e yam’. Manang ni n’igin Got ni nge yog e bitir ngorow u nap’an ni kar pilibthirgow Sarah. (Gen. 18:10-14; 21:1-3; Rom. 4:19-21) Maku manang Abraham e thin ni yog Jehovah ngak ni gaar: “Fa piin ni owchem ni bay ra bad ni faan gog ni bay gu pi’ ngom e Isak e bay ra bad rok.” (Gen. 21:12) Aram fan nib mich u wan’ Abraham nra faseg Got Isak.

6, 7. (a) Mang e m’ag ni ke fal’eg Jehovah u thilrow Abraham? (b) Uw rogon ma n’en ni ke micheg Jehovah ngak Abraham e ra yognag e athap ngak e girdi’?

⁶ Bochan e michan’ rok Abraham me fal’eg Jehovah e m’ag u thilrow ni fan ngak e piin nra yib ni “owchen.” (Mu beeg e Genesis 22:18.) Ere Jesus Kristus e ir be’ ni ke sum ni “owchen” Abraham. (Gal. 3:16) Ke yog Jehovah ngak Abraham ni “owchen” e ra “bod urngin e t’uf u lan e lang ara urngin e yan’ ni bay u dap’e l’ay,” ere de nang Abraham urngirad. (Gen. 22:17) Machane, boch nga tomren ma ke tamilang ko uw urngin e piin ni owchen Abraham. Jesus Kristus nge fare 144,000 ni yad ra un ngak nga Gil’ilungun e yad ra mang “owchen” Abraham. (Gal. 3:29; Rev. 7:4; 14:1) Gil’ilungun Kristus e ra gagiyegnag ‘urngin e nam nu fayleng me fal’eg waathrad.’

⁷ Sana gathi rib tamilang u wan’ Abraham fan fare m’ag ni ke fal’eg Jehovah u thilrow. Machane, be yog e Bible ni “i sonnag” Abraham fare mach nrib fel’ e def riy. (Heb. 11:10) Re mach nem e aram fare Gil’ilungun Got. Ma thingar ni faseg Abraham ko yam’ ma fini yog ngak boch e tow’ath u tan e re Gil’ilungun nem, ma reb riy e aram e yafas ni manemus u fayleng. Maku piin ni yad ra magey nib fas u tomren e Armageddon ara piin ni yira fasegrad ko yam’ e ku rayog ni nge yog ngorad e yafas ni manemus.​—Rev. 7:9, 14; 20:12-14.

“Dabkiyog ni Nggu Tel e Thin u Langag”

8, 9. Mang fan ni fare babyor rok Job e gathi kemus ni fan ngak taabe’?

⁸ Job e be’ ni owchen Abraham ni immoy u ba ngiyal’ u tomren Josef ma immoy u ba ngiyal’ u m’on rok Moses. Fare babyor u Bible ni Job e yoloy Moses, ma be weliy ko mang fan ni pag Jehovah ni nge gafgow Job nge n’en ni buch u tomren. Machane, fare babyor ni Job e be weliy ban’en nib l’ag urngin e pi engel nge girdi’ ngay, ma be tamilangnag feni mat’aw rogon ni ma gagiyeg Jehovah. Maku be dag rogon nib l’ag e athap nge yul’yul’ ko pi tapigpig rok Got u fayleng ko fare magawon ni sum u Eden. Yugu aram rogon nde nang Job fare magawon machane ke togopuluw ngak fa dalip i pumoon ni ur rogned ni de par Job nib yul’yul’. (Job 27:5) Ere re babyor ney e ra ayuwegdad ni nge gel e michan’ rodad me tamilang u wan’dad nrayog ni ngad pared nib yul’yul’ ngak Jehovah.

⁹ Tomren e welthin ni tay fa dalip i pumoon, ma aram me non Elihu ni fak Barakel. Mang e ke k’aring ni nge pi’ e fulweg? I gaar: “Dabkiyog ni nggu par ni dab gu non. Dabkiyog ni nggu tel e thin u langag.” (Job 32:5, 6, 18, BT) Riyul’ ni thin ni kan thagthagnag ni yog Elihu e ke lebug u nap’an ni kan sulweg Job nga rogon, machane pi thin nem e ku bay fan ngak boch e girdi’ ya ra ayuweg e piin nib yul’yul’.

10. Mang e be dag ni yu ngiyal’ ma thin rok Jehovah ni fan ngak be’ e ku bay rogon ngak urngin e girdi’?

¹⁰ Yu ngiyal’ e ma pi’ Jehovah e thin ngak be’ ma ku bay rogon ngak urngin e girdi’. Rayog ni ngan guy e re n’ey ko yiiy rok Daniel ni bay rogon ko lik’ay ni tay Nebukadnezzar ni pilung nu Babylon ni murung’agen ba ke gek’iy ni ba ga’ ni kan toy nga but’. (Dan. 4:10-27) Yugu aram rogon ni riyul’ e n’en ni lik’aynag Nebukadnezzar, machane gin ga’ yang riy e fan ko gagiyeg rok Got. I m’ug ko re lik’ay nem nra yib i gagiyel e gagiyeg rok Got bayay u daken ba am ni en ra gagiyeg riy e ra yib ko tabinaw rok David ni pilung. Ma re n’em e ra yib i gagiyel u tomren 2,520 e duw ni faanra ngan tabab i theeg ko duw ni 607 B.C.E.a Kan dag e gagiyeg rok Got bayay u nap’an ni tabab Jesus Kristus ko gagiyeg u tharmiy ko duw ni 1914. Mu lemnag ko uw rogon nra lebguy Gil’ilungun Got e n’en ni be athapeg e girdi’ nib yul’yul’!

“Mu Ayuweg ni nge Dabi Mul nga Low”

11. Mang e be dag e thin rok Elihu u murung’agen Got?

¹¹ Nap’an ni non Elihu ngak Job ma be weliy murung’agen e “tamol’og, ara mitethin, ni taareb u fithik’ reb e biyu’, e nge yog ngak be’ e n’en ni ke rin’ nib mat’aw.” Ma uw rogon ni faanra “wenignag ngak Got ni nge fel’ u wan’”? I gaar Elihu: “Ma aram ma ra felfelan’ [Got] ma ra gaar, ‘Mu ayuweg ni nge dabi mul nga low!’ Kug pirieg ban’en nrayog ni nge biyuliy! Ma ra fel’ fithik’ i downgin bayay nge bod be’ ni kab pagal.’” (Job 33:23-26, NW) Pi thin nem e be micheg nib fel’ e “biyul” u wan’ Got ni kan pi’ ni fan ko girdi’ ni kar kalgadngan’rad.​—Job 33:24.

12. Mang e athap ni bay ko thin rok Elihu ni fan ko girdi’?

¹² Sana gathi ri manang Elihu fan e biyul ni i weliy murung’agen ni bod nde nang e pi profet fan urngin ban’en ni ur yoloyed. (Dan. 12:8; 1 Pet. 1:10-12) Machane, thin rok Elihu e be dag nrayog ni nge athapeg e girdi’ ni bay ba ngiyal’ nra taw ngay ma m’agan’ Got ko biyul ma aram e dab kun pilibthir ma dab ku unim’. Thin rok Elihu e ke pi’ e athap ngodad ni aram e yafas ni manemus. Maku be dag e re ke babyor ney ni bay e fas ko yam’.​—Job 14:14, 15.

13. Mang e ke pirieg e pi Kristiano ko thin ni yog Elihu?

¹³ Ngiyal’ ney ma ka bay fan e thin ni yog Elihu ni fan ngak bokum milyon e Kristiano ni bay e athap rorad ni ngar mageygad nib fas u tomren ni kan chuweg e kireb. Ngiyal’ nem ma piin ni kar pilibthirgad e yad ra pagal bayay. (Rev. 7:9, 10, 14-17) Maku, fare athap ni piin ni kan fasegrad ko yam’ e yad ra pagal bayay e ma felfelan’nag e piin nib yul’yul’. Athap ko yafas u tharmiy ni fan ngak e Kristiano ni kan dugliyrad nge yafas ni manemus u roy u fayleng ni fan ko “yugu boch e saf” e be yan u rogon e michan’ rorad ko biyul ni pi’ Kristus.​—John 10:16; Rom. 6:23.

Bayi Kirebnag Gelngin e Yam’ ni Manemus

14. Mang e be dag ni ku bay ban’en nib ga’ fan ko fare Motochiyel nni pi’ ngak piyu Israel ya nge yog ngorad e athap ko yafas ni manemus?

¹⁴ Pi fak Abraham e kar manged ba nam u nap’an ni kan fal’eg fare m’ag u thilrad Got. U nap’an ni kan pi’ fare Motochiyel ngorad me gaar Jehovah: “Mu folwokgad ko tin kug dugliy ni nguum rin’ed nge pi motochiyel ni kug pi’ ngomed; gimed ra rin’ ni aray rogon mi gimed par ni dabi buch ban’en romed.” (Lev. 18:5, BT) Machane, bochan ni dabiyog rok piyu Israel ni ngar folgad ma kar th’abed fare Motochiyel ere ba t’uf e ayuw rorad.​—Gal. 3:13.

15. Mang e tow’ath ni bay yib ni kan thagthagnag ngak David ni nge yoloy?

¹⁵ Tomren Moses, me thagthagnag Jehovah yugu be’ ni nge yoloy e thin nu Bible u murung’agen e yafas ni manemus. (Ps. 21:4; 37:29) Bod rogon e tin tomur e thin ko tang rok David ni gaar: “Ireram e gin ke micheg Somol e tow’ath rok riy ni yafos ndariy n’umngin nap’an.”​—Ps. 133:3, BT.

16. Rogon ni yog Isaiah, mang e ke micheg Jehovah ni ra chuweg u “fayleng ni ga’ngin”?

¹⁶ I thagthagnag Jehovah ngak Isaiah ni nge yiiynag murung’agen e yafas ni manemus u fayleng. (Mu beeg e Isaiah 25:7, 8, BT) Denen nge yam’ e ke magawonnag e girdi’ ni bod e “manileng ni ke gapopow” nga dakenrad. Ke micheg Jehovah ngak e girdi’ rok nra chuweg e denen nge yam’ u “fayleng ni ga’ngin.”

17. Mang e be yog e thin ko profet nra rin’ fare Messiah ya nge yog e yafas ni manemus?

¹⁷ Am lemnag e n’en ni ka nog u lan fare Motochiyel nni pi’ ngak Moses u murung’agen e kaming ko Azazel. Taab yay u reb e duw, e ma fek e prist reb e kaming “me tay pa’ nruw raba’ nga daken lolugen me weliy urngin e kireb nge denen nge togopluw ni be tay yu Israel ngak Got, ni aram e ke chuweg u dakenrad ke tay nga daken lolugen e re kaming nem. Ma be’ nib moon ni kan turguy e ir e nge fek e re kaming nem i yan nga daken e ted nder tugul ban’en riy.” (Lev. 16:7-10, 21, 22) Ma ki yog Isaiah e wub nra tay fare Messiah, nra chuweg e ‘m’ar,’ ‘amith,’ nge ‘denen rok e girdi’,’ ma aram e ra yog e yafas ni manemus ngak e girdi’.​—Mu beeg e Isaiah 53:4-6, 12.

18, 19. Mang e athap ni bay ko Isaiah 26:19 nge Daniel 12:13?

¹⁸ Ke yog Jehovah ko girdi’ nu Israel u daken Isaiah ni gaar: “Girdi’ rodad ni kar m’ad e yad ra fos bayay! Dowef rorad e ku ra sul e yafos ngay. Urngin e piin ni yad ba mol u lan e low rorad e bay ra odgad mi yad tangnag e felfelan’. Bod ni ma gal raen e waangchal ko garbeb nge k’aklingnag e fayleng, aram rogon Somol ni bayi faseg e piin kar m’ad kakrom.” (Isa. 26:19, BT) Pi thin ney e ba tamilang ni be yog ni bay e athap ko fas ko yam’ u roy u fayleng. Nap’an ni ke chugur ni nge gaman 100 e duw rok Daniel me yog Jehovah ngak ni gaar: “Ma aram e bay mum’, machane bayi taw ko tungun ma ga fos ko yam’ mi ni pi’ puluwom ngom.”​—Dan. 12:13.

¹⁹ Bochan e athap ko fas ko yam’, me yog Martha ngak Jesus ni gaar: “Gu manang ni bay ni faseg ko yam’ ko chirofen ni ir e tomur ko rran.” (John 11:24) Machib ni i tay Jesus nge thin nni thagthagnag ni nge yoloy pi gachalpen e ke thilyeg e re athap ney, fa? Ku ba m’agan’ Jehovah ngay ni nge athapeg e girdi’ e yafas ni manemus u fayleng, fa? Gad ra weliy e fulweg ko gal deer ney ko bin migid e thin.

[Footnote]

Rayog ni Ngam Weliy?

• Mang e athap ko girdi’ ko pi n’en ni ke “m’ay fan” ara kar gafgowgad riy?

• Mang e be dag nib mich u wan’ Abraham ni bay e fas ko yam’?

• Mang e athap ni bay ko thin rok Elihu ni fan ko girdi’?

• Uw rogon ni ke tamilangnag e thin nu Bible e athap ko fas ko yam’ nge yafas ni manemus u fayleng?

[Picture on page 11]

Thin ni yog Elihu ngak Job e be tamilangnag nra fel’ fithik’ i dow e girdi’ ma dab ku unim’

[Picture on page 12]

Kan micheg ngak Daniel ni ‘bayi taw ko tungun ma ra fos ko yam’ mi ni pi’ puluwon ngak’