“Uw N’umngin Nap’an ni Thingar Gu Ning e Ayuw?”

I yor Jayne ni be gaar, “Gu baadag ndab ki amith dowag!” Kari garer e cancer u ga’ngin yang i dow. Girdien e tabinaw nge pi tafager rok e yad be athapeg ni faan gomanga rayog ma kar chuweged e m’ar rok nge amith! Kar meybilgad ku Got ni nge ayuweg. Gur, ra motoyil? Bay fan u wan’, fa?

BE GUY Got e gafgow ni be tay e girdi’. Be gaar e Bible: “Urngin e tin ni ke sunumiy Got e be gel’gel’ ko amith.” (Roma 8:22) Manang Got ni bay bokum miriay e milyon e girdi’ ni kar gafgowgad ni bod Jayne, ni boch i yad e ke par nga fithik’ e amith ko m’ar ma boch e ke par nga fithik’ e kireban’. Ku be guy Got fa meruk miriay i milyon e girdi’ ni yad ma mol nga daken e bilig ni gubin e nep’ nge piin ni yibe gafgownagrad u tabinaw nge pi gallabthir ni be magafan’rad nga rarogon e bitir rorad ko gabul nge langlath. Ka am lemnag ko ra taw nga ba ngiyal’ me rin’ Got ban’en ko pi magawon ney, fa? Faanra gad baadag ni ngad ayuweged be’ nib t’uf rodad ma uw rogon Got ni ir e ke sunmiy e girdi’, gathi riyul’ ni baadag ni nge ayuwegrad?

Faanra ka am fith boch e deer ni aray rogon maku arrogon boch e girdi’. Ku arrogon Habakkuk ni immoy ni ke pag 2,600 e duw ni i lemnag e re n’ey me fith ngak Got ni gaar: “A Somol, uw n’umngin nap’an nthingar gu ning e ayuw mfin mu rung’ag lungug, ngam chuwegmad u fithik’ e gafgow ni yibe tay ngomad. Mang fan ni kam pageg ngguy e tiney e oloboch? Uw rogon ni ga be k’adan’um ga be guy e pi kireb ney ni yibe rin’? Riya’ nge mod yargel e ke liyegeg, ma cham nge tugthin e ke fanay ga’ngin yang.” (Habakkuk 1:2, 3, BT) Nap’an Habakkuk nreb e profet ni Hebrew ma kari gel e damumuw ko girdi’ ma ke yoor e cham. Ngiyal’ ney e aray e n’en ni ma buch ni gubin e rran ni be balyangan’ e girdi’ ngay.

I darifannag Got e n’en ni i magafan’ Habakkuk ngay, fa? Danga’, ya i motoyil ko n’en ni i fith Habakkuk ngak mi i fal’eg laniyan’ maku be pi’ e athamgil nga laniyan’. I micheg Jehovah Got ngak Habakkuk nra taw nga ba ngiyal’ ma ra chuweg e gafgow ko girdi’. Ma aram e n’en ni ke pi’ e athamgil nga laniyan’. Pi n’en ni ke micheg Got nra l’agan’uy ngay e rayog ni ngki ayuwegem ni bod rogon ni ke ayuweg Jayne nge chon e tabinaw rok. Tin migid e thin e ra fulweg e pi deer ni baaray ni gaar: Uw rogon ni nge mich u wan’um nriyul’ ni ma lemnagdad Got? Mang e ra rin’ Got boch nga m’on ni fan e nge chuweg e gafgow, ma wuin e ra rin’?