Jehovah e ‘Taareb Rogon e Girdi’ u Wan’’

Bay ba ngiyal’ ni kan laniyan’ ngom, fa? Maku bay ba ngiyal’ ni ka mog ni ngan rin’ ban’en ngom, ara kan rin’ boch ban’en ngom nde puluw ni bochan raen dowam, ara gin ni ga be’ riy ara liw rom? Re n’ey e gathi yigoo gur e ke buch rom? Baaray boch ban’en nib fel’: Yugu aram rogon ni bay e miti ney e lem u roy u fayleng, machane dariy u tharmiy. Rib mudugil e re n’ey u wan’ apostal Peter u nap’an ni yog ni “gubin e girdi’ ma taareb rogorad u wan’ Got.”​—Mu beeg e Acts 10:34, 35.

I yog apostal Peter e pi thin nem u nap’an ni bay u tabinaw rok reb e pumoon ni Kornelius fithingan ni gathi reb e girdi’ nu Israel. Peter e ni gargeleg ni ir reb e Jew, ma immoy u ba ngiyal’ ni yima lemnag ni girdi’ ni gathi piyu Israel e yad ba alit, ere susun ndab un chag ngorad. Ere, mang fan ni immoy Peter u tafen Kornelius? Ya bochan ni Jehovah e ke pow’iy ni nge yan e ngaram. Ke thagthagnag Jehovah nga laniyan’ Peter ni gaar: “Dariy ban’en ni ngam lemnag nde beech ni faanra ke yog Got ni ke beech.” Ma reb e rran u m’on riy ma kun piliyeg e changar rok Kornelius ni nge guy ba engel ni be yog ngak ni nge yan i pining Peter. (Acts 10:1-15) Nap’an ni nang Peter ni bay rogon Jehovah ko n’en ni buch, ma de yag ni nge par ni nge dabi non.

I yog Peter ni gaar: “Ka fin gu nang e chiney nriyul’ ni gubin e girdi’ ma taareb rogorad u wan’ Got.” (Acts 10:34) Be’ ni ma fil murung’agen boch ban’en e weliy ni gaar: “Re n’ey e rayog ni ngan taarebrogonnag ngak reb e judge nra guy owchen be’ me dugliy e kireb rok ni yugu aram rogon ndawori nang ara dawori guy boch ban’en nra micheg ni facha’ e ke rin’ fare kireb.” Got e der ma laniyan’ ngak e girdi’ ni bochan e gin ni yad be’ riy nge liw rorad ara yugu boch ban’en.

Ya Jehovah e ma guy e n’en ni bay u gum’irchaey. (1 Samuel 16:7; Proverbs 21:2) Miki yog Peter ni gaar: “En ni ba’ madgun Got u wan’ ma be rin’ e tin nib mat’aw e ra i par nib fel’ u wan’ Got ndemtrug ko be’ u kun nam.” (Acts 10:35) Ra nge yib madgun Got ngom ma be yip’ fan ni ngam tayfan, mag n’uf, ma nge pagan’um ngak, ma ngam guy rogon ni dab mu kirebnag laniyan’. Ra ngan rin’ e tin nib mat’aw mab muun ngay ni ngan adag ni ngan rin’ e n’en nib m’agan’ Got ngay. Ba felfelan’ Jehovah ngak e piin nib sobut’ laniyan’rad, ma yad baadag ni ngar rin’ed e tin nib mat’aw.​—Deuteronomy 10:12, 13.

Faanra bay ba ngiyal’ ni kan laniyan’ ngom, ma bochan e thin ni yog Peter u murung’agen Got, ma bay fan ni nge yib e athamgil nga lanin’um. Jehovah e be kunuy e girdi’ u ga’ngin yang e fayleng ni ngar bad ko bin riyul’ e liyor. (John 6:44; Acts 17:26, 27) Ma motoyil maku ma fulweg taban e meybil rok e pi tapigpig rok, ni yugu demtrug e re nam ni ga be’ riy ara liw rok. (1 Kings 8:41-43) Rayog ni nge pagan’dad ni faanra sap Jehovah u tharmiy nga but’, ma kemus ni taab ulung i girdi’ e be guy. Ga baadag ni ngkum fil boch murung’agen e re Got n’ey nder ma laniyan’, fa?