Be Gay e Girdi’ Rogon ni Nge Dab Ra M’ad

Yam’ e aram reb e toogor ni yima rus ngay. Gad ma gay rogon ni nge dab da m’ad. Dabisiy nnap’an nra yim’ be’ nib t’uf rom, ma ga ma gay rogon ni nge dab kum lemnag. Bod nnap’an ni kab fel’ yangarey ara ka gad ba gel, ma darud lemnaged ni bay ba ngiyal’ ni gad ra yim’, ma re n’ey e ban’en ni gad ma gay rogon ni nge dab da paged talin.

Boch e girdi’ e ur lemnaged rogon ni ngar pared ni dab ra m’ad ni bod rogon e pi Farao kakrom. Boor ban’en ni yad ma rin’ maku boor ban’en ni ma rin’ girdien e maruwel rorad, ya nge yag ni nge dab ra m’ad. Fapi pyramid ni ur toyed e be micheg ni bay boch ban’en ni yad be nameg ma de yag ngorad.

Pi pilung nu China e kur lemnaged murung’agen e re n’ey, ma aram mar fanayed ba mit e falay ni yad be lemnaged nra ayuwegrad ni nge dab ra m’ad. Fare pilung ni Qin Shi Huang e yog ngak be’ ni ma maruwel rok ni ma athukuy boch ban’en ni nge yib e gol riy ni nge gay ba mit e falay ni nge unum ya nge dabi yim’. Machane, boor ko pi falay nem ni kan athukuy e bay e mercury riy, ma nap’an ni unum e re pilung nem e re falay nem me yim’.

Nap’an e bin 16 e chibog C.E., ma Juan Ponce de León ni ir be’ nu Spain e milekag i yan nga Caribbean ni be gay e gin ni bay fare fountain of youth riy ara bang i ran ni yira unum min sul ngan pagel bayay. Me yan i pirieg yu Florida, ni bay u Meriken, ma in e duw nga tomuren mar mahlgad e Indian ni yad ma par u rom, mar lied nge yim’. Ma de yag ni nge pirieg e gin ni bay fare fountain of youth riy.

Pi Farao nge pi pilung nge piin ni yad ma milekag e ur gayed rogon ni ngar pared ndab ra m’ad. Ere, mini’ e arodad ni dabun e n’en ni i nameg e pi cha’nem ni yugu aram rogon ni dubdad rogon ni kar guyed rogon ni nge dab ra m’ad? Gadad gubin ni dubdad ni ngad m’ad.

RAYOG NI NGAD GELGAD KO YAM’, FA?

Mang fan ni dubdad ni ngad m’ad? Be tamilangnag e Bible fan. Be weliy murung’agen Jehovah Gota ni gaar: “Ke sunmiy urngin ban’en nib fel’ u ngal’an. Ke tay e manemus nga lanin’rad.” (Eklesiastes 3:11, NW) Gad baadag ni ngad felfelan’gad ko pi n’en ni ke sunmiy Jehovah ko re fayleng ney ni dariy n’umngin nap’an, ma gathi kemus ni ngad pared ni sogonap’an 80 e duw n’umngin nap’an. (Psalm 90:10) Ireray e n’en nib m’agan’dad ngay.

Mang fan ni ke tay Got e “manemus”, nga lanin’dad? Gur, ya bochan ni nge k’aring e chalban ngodad? Gathi aram rogon. Machane, ke micheg Got ngodad ni bay ba ngiyal’ nra gel ko yam’. Boor yay ni ke weliy e Bible murung’agen e yam’ ni yira chuweg nge murung’agen e yafas ni manemus ni ke micheg Got.​—Mu guy fare thin ni kenggin e “Kan Gel ko Yam’.”

Ke tamilangnag Jesus Kristus ni gaar: “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.” (John 17:3) Ere ra ngan gel ko yam’ ma gathi ireram ban’en ni dariy athap riy. Machane, ke tamilangnag Jesus ni kemus ni Got e rayog ni nge chuweg e yam’.