Rogon ni Ngaud Pigpiggad ngak Jehovah ni Gad Ba Felfelan’

1. Mang boch e tow’ath ni ke pi’ Jehovah ngodad ya nge yag ni ngad pared ni gad ba felfelan’?

BAADAG Jehovah ni ngad pared ni gad ba felfelan’, ere aram fan ni boor e tow’ath ni ke pi’ ngodad. Yafas rodad e aram reb ko pi tow’ath nem ni ke pi’. Rayog ni ngad fanayed e yafas rodad ni ngad pininged e sorok ngak ya ir e ke pow’iydad ko tin riyul’. (Ps. 144:15; John 6:44) Ke micheg Jehovah ni gad ba t’uf rok ma ma ayuwegdad ko pigpig ni gad ma tay ngak. (Jer. 31:3; 2 Kor. 4:16) Gad be par u fithik’ e gapas nge taareban’ ni bochan e ba fel’ e tha’ u thildad Got nge pi walagdad u ga’ngin yang e fayleng, maku yima pi’ e ayuw ngodad ni fan ko tirok Got ban’en. Maku reb e bay e athap rodad ni fan ko gabul nge langlath ni aram e yafas ni manemus.

2. Mang boch ban’en ni ma magawonnag laniyan’ boch e tapigpig rok Got?

² Yugu aram rogon ni boor fan ni ngad pared ni gad ba felfelan’, ma bay boch e tapigpig rok Jehovah ni yad ma lemnag nde ga’ farad nge pigpig ni yad ma tay u wan’ Jehovah. Piin ni yugu yad ma lem ni aram rogon e nap’an ni yad ra lemnag urngin e “duw” nrayog ni ngar pared ni yad ba felfelan’ boch nga m’on, ma gowa ban’en ndabiyog ni nge buch ni bochan e gubin e rran ni yad ma par u fithik’ e magawon.​—Ekl. 11:8, BT.

3. Mang e rayog ni nge k’aring be’ ni nga i par ma be lemnag thibngin ban’en?

³ M’ar, nge pi n’en nder buch nrogon ni gad baadag, nge pilibthir e aram boch ban’en ni ma k’aring boch e walag ni ngaur pared ni thibngin ban’en e yad be lemnag. (Ps. 71:9; Prov. 13:12; Ekl. 7:7) Maku reb e thingar dab da paged talin nib sasaliyeb gum’ircha’dad ma rayog ni nge k’aringdad ni ngad lemnaged ni gad ba kireb ni yugu aram rogon ni gad be rin’ e tin m’agan’ Got ngay. (Jer. 17:9; 1 John 3:20) Ma t’ar Satan e thin nga daken e pi tapigpig rok Got. Ma piin ni yad ma lem ni bod Satan e rayog ni ngar k’aringed gadad ni ngad lemnaged ndariy fadad u wan’ Got ni bod rogon ni yog Elifaz nde mich Got u wan’. Aram reb e ban ni fanay Satan u nap’an Job, maku be fanay e ngiyal’ ney.​—Job 4:18, 19.

4. Mang e gad ra weliy ko re article ney?

⁴ Ke tamilangnag Jehovah ko Thin rok u Bible nra immoy rok e piin ni yad be yan u daken fare pa’ i kanawo’ ni yan u “fithik’ e rumug ni yam’.” (Ps. 23:4) Reb e kanawo’ ni bay Jehovah rodad riy e aram e ma ayuwegdad u rogon ni ngad fanayed e Thin rok u Bible ni ngad ‘kirebnaged e yungi n’en ni ke fal’eg e moonyan’ rogon ke par’ riy nib muun ngay e lem nde puluw. (2 Kor. 10:4, 5) Chiney e ngad weliyed rogon nrayog ni nge ayuwegdad e Bible ni ngad pigpiggad ngak Got ni gad ba felfelan’. Re n’ey e rayog ni nge yib angin ngom maku rayog ni nge ayuwegem ni ngam pi’ e athamgil nga laniyan’ boch e girdi’.

MU FANAY E BIBLE NI NGE AYUWEGEM NI NGAM FELFELAN’ KO PIGPIG NI GA BE TAY

5. Mang e ra ayuwegdad ni ngad felfelan’gad ko pigpig ni gad be tay ngak Got?

⁵ I weliy apostal Paul boch ban’en nrayog ni nge ayuwegdad ni ngad felfelan’gad ko pigpig ni gad be tay ngak Got. I fonownag e ulung nu Korinth ni gaar: “Mu changargad ngomed ko gimed be par ni gimed be ngongol u fithik’ e michan’ romed ngak Kristus fa danga’.” (2 Kor. 13:5) Fare “michan’” ni weliy Paul murung’agen e aram e pi n’en ni ke mich u wan’ e piin Kristiano ni bay u Bible. Faanra ba puluw e thin nge ngongol rodad ko pi n’en ni ke mich u wan’dad, ma aram e gad be ngongol u fithik’ e ‘michan’ rodad ngak Kristus.’ Re n’ey e ku be yip’ fan ni nge puluw e ngongol rodad ko pi machib ni kad filed u lan e Bible. Dabiyog ni ngad mel’eged e tin ni ngad folgad riy nge tin ndab da folgad riy.​—Jas. 2:10, 11.

6. Mang nib ga’ fan ni ngad skengnaged gadad ko ‘gad be ngongol u fithik’ e michan’ rodad ngak Kristus fa danga’’? (Mu guy e sasing ni bay u tabolngin e re article ney.)

⁶ Sana ga ra dabuy ni ngam fal’eg i lemnag rarogon e michan’ rom nib ga’ ni faanra ga be lemnag nder puluw e ngongol rom ko n’en ni ke michan’um ngay. Machane, dab da paged talin ni kab ga’ fan rogon ni ma lemnagdad Jehovah nga rogon ni gad ma lemnagdad ma kab gel e thil u rogon ni ma lem nga rogon ni gad ma lem. (Isa. 55:8, 9) Ma fal’eg Jehovah i yaliy e piin ni yad ma liyor ngak ni gathi bochan e nge guy thibngirad ya bochan ni baadag ni nge guy fel’ngirad me ayuwegrad. Faan ga ra fanay e Thin rok Got ni ngam nang ko ‘ga be ngongol u fithik’ e michan’ rom ngak Kristus fa danga’,’ ma ga ra nang rogon ni ma lemnagem Got. Re n’ey e ra ayuwegem ni nge dab kum lemnag ndariy fam u wan’ Got me pagan’um ko n’en ni be micheg e Bible ni aram e: Ba ga’ fam u wan’ Jehovah. Angin nra yib riy e ra yan i bod ni kam bing e curtain ko winda u reb e singgil ke yib e tamilang nga langgin.

7. Uw rogon nra yib angin ngodad e n’en ni ke buch rok boch e girdi’ ni be weliy e Bible murung’agrad?

⁷ Reb e kanawo’ ni ngam skengnagem riy e aram e ngam fal’eg i lemnag murung’agen boch e girdi’ ni yad ba yul’yul’ ni be weliy e Bible murung’agrad. Mu taareb rogonnag e n’en ni ke buch rorad ara rogon e tafinay rorad ko n’en ni be buch rom mag lemnag ko mang e ga ra rin’ ni faanra gur e ke buch e pi n’em rom. Chiney e ngad weliyed murung’agen dalip ni’ ni be tamilangnag rogon nrayog ni ngad fanayed e Bible ni ngad skengnaged gadad ko ‘gadad be ngongol u fithik’ e michan’ rodad ngak Kristus fa danga’.’ Re n’ey e ra ayuwegdad ni ngad felfelan’gad ko pigpig ni gad be tay ngak Got.

FARE PIN NIB GAFGOW NI KE YIM’ FIGIRNGIN

8, 9. (a) Uw rarogon fare pin nrib gafgow ni ke yim’ figirngin? (b) Mang boch ban’en nrayog ni nge lemnag e re ppin nem?

⁸ Nap’an ni immoy Jesus u lan fare tempel u Jerusalem me guy be’ nib pin nrib gafgow ni ke yim’ figirngin. N’en ni rin’ e re ppin nem e ra ayuwegdad ni ngaud pared ni gad ba felfelan’ ko pigpig ni gad be tay ni yugu aram rogon ni bay boch ban’en ndabiyog rodad. (Mu beeg e Luke 21:1-4.) Am lemnag e n’en ni ke buch ko re ppin ney. Gathi kemus ni ke kireban’ ni bochan e ke yim’ e pumoon rok ya ku immoy u ba ngiyal’ ni kari gel e kireb ko pi tayugang’ ko teliw ya ur “felan’gad u puluwon e piin ni ppin ni ke yim’ figirngirad ni yad be lag e naun rorad” ma darur ayuweged yad. (Luke 20:47) Re ppin ney e rib gafgow ya kemus ni l’agruw chi kobre’ nrow e rayog ni nge pi’ ni ayuw ni fan ko tempel. Urngin e salpiy ni pi’ e taareb rogon nga puluwon e maruwel ni ke tay be’ u lan in e minit.

⁹ Mu lemnag e n’en ni i tafinaynag e re ppin ney u nap’an ni yan nga lan e tempel ni kemus ni l’agruw chi kobre’ nrow e ke fek i yan ni nge pi’ ni ayuw. Gur, faan gomanga kab fos figirngin ni ka be ayuweg, ma ra lemnag chi urngin e salpiy ni ke pi’? Gur, ra tamra’ u nap’an nra guy e piin ni yad ba m’on rok ni yad be pi’ e salpiy ni boor, fa lemnag ko ba ga’ fan e ayuw ni ke pi’ fa danga’? Mus ni faanra i lem ni aram rogon, ma ke pi’ e ayuw u rogon nrayog rok ni fan ko bin riyul’ e liyor .

10. Uw rogon ni dag Jesus nib ga’ fan u wan’ Jehovah e n’en ni ke rin’ fare pin ni ke yim’ figirngin?

¹⁰ Ke dag Jesus nib ga’ fan e re ppin ney u wan’ Jehovah nge ayuw ni ke pi’. I yog ni ka “boor e salpiy ni ke yin’ ko tin ni ke yin’ [e piin ni boor ban’en rorad].” Yugu aram rogon nra maathuk e salpiy ni ke yon’ nga fithik’ e salpiy ni ke yon’ urngin e girdi’, machane rib ga’ fan e yul’yul’ ni i tay fare pin ngak Jehovah u wan’ Jesus. Nap’an nra yib e piin ni yad ma kunuy e salpiy ni ayuw ni fan ko tempel ni ngar feked e salpiy ni kan kunuy ma dab ra nanged ko mini’ e ke yon’ e galochi kobre’ nrow nem nge feni ga’ fan u wan’ Jehovah. Machane lem rok Got e ir e ba ga’ fan, ma gathi lem ko girdi’ ara n’en ni i lemnag fare pin. Ere gur, rayog ni ngam fanay e n’en ni rin’ fare pin ni ngam skengnagem ko ga be ngongol u fithik’ e michan’ rom ngak Kristus fa danga’?

11. Mang e rayog ni ngad filed ko n’en ni buch rok fare pin ni ke yim’ figirngin?

¹¹ Rayog ni nge thil rogon e pigpig ni ga be tay ngak Jehovah ni bochan rarogom. Bod ni bay boch e walag ni ke lich e tayim ni yad be un i machibnag fare thin nib fel’ riy ni bochan e kar pilibthirgad ara kar m’argad. Ere, ba fel’ ni ngar lemnaged nde ga’ fan ni ngar yoloyed ko report rorad urngin e awa ni kar uned ko machib riy u gubin e pul, fa? Mus ni faanra dawor mu pilibthir ma kab fel’ fithik’ i dowam, ma rayog ni ngam lemnag ni athamgil ni ga be tay e dabi chugur ni nge taareb rogon nga urngin e awa ni be fanay e pi tapigpig rok Got ni fan ko liyor ni yad be tay ngak u gubin e duw. Machane, kad filed ko n’en ni buch ko fare pin nib gafgow ni ke yim’ figirngin ni, manang Jehovah e pi n’en ni gad ma rin’ ni fan ngak mab ga’ fan u wan’, nib ga’ ni faanra gad be rin’ e pi n’ey u fithik’ e athamgil. Am lemnag e pi n’en ni kam rin’ ni fan ngak Jehovah ko fa binem e duw ni ke yan. Immoy reb e pi awa nem ni kam fanay ko pigpig ngak Got nthingar mu pag fan boch ban’en riy, fa? Faanra aram rogon, ma rayog ni nge pagan’um nib ga’ fan u wan’ Got e n’en ni kam rin’ ni fan ngak u lan e re awa nem. Faanra ga be folwok ko fare pin ni ke yim’ figirngin, ma ga be athamgil ni ngam rin’ e tin nrayog rom ni fan ko pigpig ni ga be tay ngak Jehovah, ma bay rogon ni ngam lemnag ni ga be ‘ngongol u fithik’ e michan’ rom ngak Kristus.’

“MFEK E POGOFAN ROG”

12-14. (a) Mang boch ban’en ni ke k’aring Elijah ni nge lemnag thibngin e magawon ni ke yib ngak? (b) Mang fan ni ke lem Elijah ni aram rogon?

¹² Elijah ni profet e ir be’ nib yul’yul’ ma rib mich Jehovah u wan’. Machane, immoy ba ngiyal’ nrib gel e kireban’ ni tay ma aram me yog ngak Jehovah ni nge li’ nge yim’. I yog ni gaar: “Somol re gafgow ney ni ara’ ga’ngin e dabiyog rog. Mfek e pogofan rog!” (1 Ki. 19:4) Piin ndawori taw e lem rorad ko ginem ba ngiyal’ e rayog ni ngar lemnaged nde puluw e “thin” ni i weliy Elijah ko meybil rok. (Job 6:3, BT) Machane, riyul’ ni i lem ni aram rogon. Mu tay fanam i yan riy ni ke ayuweg Jehovah Elijah, ma de damumuw ngak.

¹³ Mang e ke rin’ ma ke lem Elijah ni aram rogon? U m’on ni buch e re n’ey, me ngongliy reb e maang’ang ni nge m’ug riy ni Jehovah e ir e bin riyul’ e Got, me tomur riy min thang e fan rok 450 e profet rok Baal. (1 Ki. 18:37-40) Dabisiy ni i athapeg Elijah ni nge sul e girdi’ rok Got ko bin riyul’ e liyor, machane gathi aram e n’en ni buch. I pi’ Jezebel ni leengin e Pilung e thin nge yan ngak Elijah ni be yan u thaan ni ngan li’ nge yim’. Ere, ke rus Elijah, ma aram me mil ko ley ni yimuch yu Israel ni be sor i yan nga daken e ted u Judah.​—1 Ki. 19:2-4.

¹⁴ Nap’an ni bay u daken e ted ni goo ir, ma aram me tabab ni nge lemnag ndariy fan e maruwel ni be tay ni ir reb e profet. Ere, yog ngak Jehovah ni gaar: “Kab fel’ ni nggum’!” I non ni aram rogon ni bochan e be lemnag ndakuriy fan nga bayang. Ke lemnag ndakuriy fan e pigpig ni be tay u wan’ Jehovah ara boch e girdi’.

15. Uw rogon ni micheg Got ngak Elijah ni kab ga’ fan u wan?

¹⁵ Machane ba thil rogon ni i sap Jehovah ngak Elijah. I par Elijah nib ga’ fan u wan’ Jehovah, me guy rogon ni nge nang Elijah e re n’em. I l’og reb e engel rok ni nge pi’ e athamgil nga laniyan’ Elijah. Ki pi’ Jehovah e ggan nge garbod ngak nra ayuweg ko milekag nra tay u lan 40 e rran ni nge yan ko fare Burey nu Horeb ni bay ko yimuch. Ngemu’ miki yal’uweg Jehovah e lem rok Elijah, ya ki lemnag ndakuriy reb e girdi’ nu Israel ni be par nib yul’yul’ ngak Jehovah. Ere, ke pi’ Jehovah e maruwel ngak Elijah ni nge rin’ me m’agan’ ngay. Ke yib angin e ayuw ni pi’ Jehovah ngak Elijah, ma aram me sul ko maruwel rok ni ir reb e profet ni kari pasig.​—1 Ki. 19:5-8, 15-19.

16. Uw rogon ni ke ayuwegem Got ni nge par e michan’ rom nib gel?

¹⁶ Rayog ni nge ayuwegem e n’en ni buch rok Elijah ni ngam nang ko ga be ngongol u fithik’ e michan’ rom ngak Kristus fa danga’ mag lemnag fel’ngin boch ban’en. Som’on e ngam lemnag boch e kanawo’ ni ke ayuwegem Jehovah riy. Gur, bay ba ngiyal’ ni ke fanay Jehovah reb e walag u lan e ulung ni bod reb e piilal ara reb e Kristiano ni ke ilal ko tirok Got ban’en ni nge ayuwegem u nap’an ni ke t’uf e ayuw rom? (Gal. 6:2) Ke ayuwegem e thin nu Bible, nge pi babyor rodad, nge muulung ni gad ma un ngay ni ngam nang ni ma lemnagem Jehovah, fa? Yay ni migid nra buch ban’en rom ni aray rogon mag lemnag e en ni Ir e be ayuwegem mag meybil ngam pining e magar Ngak.​—Ps. 121:1, 2. 

17. Mang e n’en nib ga’ fan u wan Jehovah?

¹⁷ Bin l’agruw e, dab mu pagtalin ni faanra um par ni thibngin ban’en e ga be lemnag ma rayog ni nge bannagem. N’en nib ga’ fan e rogon ni ma lemnagdad Got. (Mu beeg e Roma 14:4.) Ba ga’ fan u wan’ Jehovah e pigpig ni gad be tay ngak u fithik’ e yul’yul’, ma der ma fal’eg i yaliydad ni be yan u rogon urngin ban’en ni kad rin’ed ni fan ngak. Bin riyul’ riy e rayog ni boor ban’en ni kam rin’ ni fan ngak Jehovah ndam nang ni bod rogon Elijah. Sana bay boch e walag u lan e ulung ni kam ayuwegrad u boch e kanawo’ ndam nang, maku er rogon boch e girdi’ u nap’an e machib nsana ke yag ni ngar filed e tin riyul’ ni bochan e athamgil ni kam tay.

18. Mang e be micheg e maruwel ni ke pi’ Jehovah ngom?

¹⁸ Bin tomur e, ngam lemnag ni faanra ke pi’ Jehovah reb e maruwel ni ngam rin’ ma aram e mich riy ni gab fel’ u wan’. (Jer. 20:11) Sana rayog ni nge mulan’um ni bochan e ga be lemnag ndariy angin e pigpig ni ga be tay ni fan ngak Jehovah ara bay boch ban’en ni ga baadag ni ngam rin’ ni fan ko pigpig ni ga be tay ngak, machane ga be lemnag ndabiyog. Yugu aram rogon ma bay e bin th’abi fel’ e tow’ath rom ni aram e rayog ni ngam machibnag fare thin nib fel’ mag un i fek fithingan Got. Mu par ni gab yul’yul’, ya faan ga ra rin’ ni aray rogon ma rayog ni ngam guy ni ke riyul’ e n’en ni ke yog Jesus ko fare fanathin rok ni gaar: “Moy ngam un ngog ko felfelan’!”​—Matt. 25:23.

MEYBIL ROK “BE’ NI KA RI GAFGOW”

19. Mang boch e magawon ni ke mada’nag faen ni yoloy e Psalm 102?

¹⁹ Faen ni yoloy e Psalm 102 e ke magawon laniyan’ ndaki nang ko mang e nge rin’. Ka ri “gafgow” laniyan’ ma dakuriy gelngin ni nge pithig e pi magawon rok. (Kenggin e Ps. 102, BT) Pi n’en ni i yog e be m’ug riy ni kaygi par ni be lemnag e amith ni be tay, nge kireban’ ni be tay ni bochan e yigoo ir, nge magawon rok. (Ps. 102:3, 4, 6, 11) Rogon e lem rok e gowa baadag Jehovah ni nge chibiy nge yon’ nga orel.​—Ps. 102:10.

20. Uw rogon nra ayuweg e meybil be’ ni kaygi par ni yug be lemnag thibngin boch ban’en?

²⁰ Yugu aram rogon, ma ka rayog ni nge pining faen ni yoloy e Psalm e sorok ngak Jehovah. (Mu beeg e Psalm 102:19-21.) Rogon ni kad filed ko Psalm 102, e ki mada’ ko piin nib mich Got u wan’rad ma rayog ni nge gafgow lanin’rad me mo’maw’ rorad ni ngkur lemnaged yugu ban’en. I par fare psalmist ni gowa ke “bod ba arche’ ni goo ir u daken e chigiy ko naun,” ya be lemnag ndariy be’ nrayog ni nge weliy e magawon rok ngak. (Ps. 102:7, BT) Faan ga ra mada’nag e magawon ni aray rogon ba ngiyal’, ma ga weliy lanin’um ngak Jehovah ni bod ni rin’ faen ni yoloy e Psalm. Meybil ni ga ra tay e rayog ni nge ayuwegem ni ngam felfelan’. Ke micheg Jehovah nra “motoyil ko meybil rok e piin ni dariy ban’en rorad, ma dabi aw ni dariy fan e meybil rorad u wan’.” (Ps. 102:17, BT) Nge pagan’um ko pi thin ney.

21. Uw rogon ni nge mom rok be’ ni nge lemnag fel’ngin boch ban’en?

²¹ Fapi thin ko Psalm 102 e be tamilangnag rogon nrayog ni ngad lemnaged fel’ngin boch ban’en. Ireray e n’en ni rin’ fare psalmist, ya ke sul ke lemnag e tha’ u thilrow Jehovah. (Ps. 102:12, 27) Ke fel’ laniyan’ ni bochan e ke nang ni gubin ngiyal’ ma bay Jehovah ni nge ayuweg e girdi’ Rok ko pi skeng ni ma yib ngorad. Ere, faanra der yag ni ngam rin’ e tin ni ga baadag ni ngam rin’ ni fan ko pigpig ni ga be tay ngak Got ni bochan e yig ma lemnag thibngin ban’en, ma ngam yibilay e re n’ey ngak Got. Ma gog ngak ni gathi kemus ni ga baadag ni nge motoyil ko meybil rom ni bochan e nge fel’ lanin’um ya ku bochan e nge yag nni “weliy” fithingan.​—Ps. 102:20, 21, BT.

22. Uw rogon ni ngad rin’ed e tin nib m’agan’ Jehovah ngay?

²² Arrogon, rayog ni ngad fanayed e Bible ni ngad changargad ngodad ko gad be par ni gad be ngongol u fithik’ e michan’ rodad fa danga’, maku rayog ni nge ayuwegdad ni ngad nanged feni ga’ fadad u wan’ Jehovah. Riyul’ ndabiyog ni ngad chuweged gubin e lem nde puluw ni bay rodad e ngiyal’ ney nge pi n’en ni ma mulan’dad riy. Machane, faan gad ra athamgil ko pigpig ni gad be tay ngak Jehovah ma rayog ni ngad rin’ed e tin nib m’agan’ ngay me yag e yafas ni manemus ngodad.​—Matt. 24:13.