Thingar Mu Meybil, Fa?

Rayog ni ngam fithem ni nge lungum: ‘Faan ra manang Got gubin ban’en, nib muun ngay e n’en ni gu ma lemnag nge pi n’en nib t’uf rog, me ere mang fan ni thingar gu meybil?’ Ireray reb e deer nib ga’ fan. Gur, gathi yog Jesus faram ni manang Got e “n’en nthingari yog ngomed u m’on ndawor mu ninged ngak”? (Matthew 6:8) David ni Pilung nu Israel e yan i nang e re n’ey, me yoloy ni gaar: “Mus nra dawor gog ban’en ma ga manang e tin ni bay gog.” (Psalm 139:4) Mang fan ni ngad meybilgad ngak Got? Ra ngad nanged e fulweg ko re deer ney mab fel’ ni ngad nanged e n’en ni be yog e Bible u murung’agen e meybil ni i tay e piin ni ur pigpiggad ngak Got kakrom.a

MEYBIL E MA CHUGURNAGDAD NGAK GOT

Yugu aram rogon ni be yog e Bible ni Jehovahb Got e manang gubin ban’en ni gad ma rin’, maku be tamilangnag ngodad ni gathi kemus ni baadag ni nge nang e pi n’en ni gad be rin’. (Psalm 139:6; Roma 11:33) Lem rok e ba thil nga reb e computer ni kemus ni nga i nang e pi n’en ni be rin’ be’ nge be’. Bin riyul’ riy e Got e rib ga’ fan u wan’ e pi n’en ni bay u lanin’dad, ma baadag ni ngad chugurgad ngak. (Psalm 139:23, 24; James 4:8) Aram fan ni i pi’ Jesus e athamgil nga laniyan’ e piin ni yad be folwok rok ni ngaur meybilgad, ni yugu aram rogon ni manang e Chitamangin e tin nib t’uf rodad. (Matthew 6:6-8) Gad ra weliy e pi n’en ni bay u lanin’dad ngak e En ni Sunmiydad ma rayog ni ngad chugurgad ngak.

Yu ngiyal’ e ba mo’maw’ ni ngad nanged ko mang e ngad ninged ngak Got u daken e meybil ni gad ma tay. Faanra buch ni aray rogon ma rayog ni nge guy Got e pi n’en ni bay u lanin’dad ma ra fanay gelngin ni nge pi’ e tin nib t’uf rodad. (Roma 8:26, 27; Efesus 3:20) Nap’an ni gad ra nang ni ke ayuwegdad Got ko pi magawon rodad u boch e kanawo’ nib mo’maw’ ni ngad nanged, ma gad baadag ni ngad chugurgad ngak.

MA FULWEG GOT TABAN URNGIN E MEYBIL, FA?

Be micheg e Bible ngodad ni ma fulweg Got ni Gubin Ma Rayog Rok taban e meybil rok e pi tapigpig rok ni yad ba yul’yul’, machane ku be tamilangnag fan ni bay boch e meybil nder ma motoyil ngay. Ni bod nnap’an ni ke garer e kireb u Israel kakrom, me yog Got ngak Isaiah ni profet ni nge yog ngak e girdi’ ko re nam nem ni nge gaar: “Demtrug gelngin e meybil ni gimed ra tay ma dab gu telig ngomed, ya pa’med e ke alit ko denen.” (Isaiah 1:15) Ba tamilang ni piin ni darur folgad ko motochiyel rok Got ara piin ni yad be ning ban’en ngak nde puluw e dab ra lemnaged ni nge motoyil Got ngorad.​—Proverbs 28:9; James 4:3.

Ku be yog e Bible ni gaar: “Mmudugil u wan’dad nra rung’ag e tin ni gadad be yog ni faan gadad ra ning ban’en ngak ni ban’en nib m’agan’ ngay.” (1 John 5:14) Gur, re n’ey e be yip’ fan ni gubin ban’en nra ning e pi tapigpig rok ma ra fulweg Got taban? Danga’. Ga ra lemnag e ngiyal’ ni baaram ni wenig apostal Paul ngak Got ni dalip yay ni nge chuweg fare ‘liliy nib gel e amith riy.’ (2 Korinth 12:7, 8) Dabisiy ni i gafgow Paul ko amith ni bochan ni bay ban’en u owchen ni kireb ni par nib n’uw nap’an. Dabisiy nib gel e ngochngochan’ ni tay. Kan pi’ gelngin Paul ni nge golnag e m’ar, miki faseg be’ ko yam’ machane i par ni be athamgil u fithik’ e amith ni tay. (Acts 19:11, 12; 20:9, 10) Yugu aram rogon ndan fulweg taban e meybil rok nrogon ni lemnag, machane ke pining Paul e magar ngak Got ko ayuw ni ke pi’ ngak.​—2 Korinth 12:9, 10.

Riyul’, ni bay e girdi’ ni kan weliy murung’agrad u Bible ni kan fulweg taban e meybil rorad u daken e maang’ang. (2 Kings 20:1-7) Machane, ngiyal’ nem e gathi ri ma buch ban’en ni aram rogon. Bay boch e girdi’ nib michan’rad ngak Got ni kar pared ni ke magafan’rad u nap’an nde fulweg taban e meybil rorad. I fith David ni Pilung ni gaar: “Somol, uw n’umngin nap’an ni ngam pagtalig? Manemus?” (Psalm 13:1, BT) Machane, nap’an ni lemnag David ni ir be’ nib yul’yul’ urngin yay ni pi’ Jehovah e ayuw ngak miki weliy rogon ni be pagan’ ngak. U lan e re meybil rok nem, miki yog David ni gaar: “Kug tor ko t’ufeg rom ni dabi mus.” (Psalm 13:5, BT) Ngiyal’ ney ma pi tapigpig rok Got e ngaur ululgad ko meybil nge mada’ ko ngiyal’ ni kar guyed ni ke fulweg Got taban e meybil rorad ni bod e n’en ni rin’ David.​—Roma 12:12.

ROGON NI MA FULWEG GOT TABAN E MEYBIL

Ma pi’ Got e tin nib t’uf rodad.

Piin gallabthir ni yad ma t’ufeg pi fakrad e gathi gubin ngiyal’ ni yad ma pi’ e n’en ni baadag e bitir rorad u nap’an ni yad ra ning ban’en. Bod rogon Got, sana dabi fulweg taban e meybil rodad u reb e kanawo’ ni gad be lemnag ara ko ngiyal’ ni gad be lemnag nib puluw. Machane, rayog ni nge pagan’dad ni En ni Sunmiydad e bod ba matam ni ma t’ufeg pi fak, ma ra pi’ e tin nib t’uf rodad u reb e kanawo’ ko ngiyal’ nib puluw ngay.​—Luke 11:11-13.

Sana ma fulweg Got taban e meybil u boch e kanawo’ nib mo’maw’ ni ngad nanged.

Uw rogon ni faan gad ra meybil ngak Got ni nge chuweg reb e magawon rodad ni ke par nib n’uw nap’an? Gur, thingar da lemnaged ni bochan ni dabi fal’eg Jehovah e maang’ang, ma aram e be yip’ fan ri dabi fulweg taban e meybil rodad? Danga’, ya thingar da lemnaged rogon ni ke ayuwegdad Got u boch e kanawo’ nib mo’maw’ ni ngad nanged. Bod reb e fager rodad ni ke ayuwegdad ko ngiyal’ nib t’uf e ayuw rodad. (Proverbs 17:17) Gur, Jehovah e ke k’aring e re fager rodad nem ni nge ayuwegdad? Maku ra fulweg Got taban e meybil rodad u daken e thin rok u Bible. Pi thin nem ni gad ra beeg e gad ra pirieg riy rogon ni ngad athamgilgad u fithik’ e pi magawon.​—2 Timothy 3:16, 17.

Ba ga’ ni ma pi’ Got gelngin e pi tapigpig rok ni ngar athamgilgad u fithik’ e pi magawon rorad ko bin ni nge chuweg. (2 Korinth 4:7) Bod nnap’an ni wenig Jesus ngak e Chitamangin ni nge chuweg ban’en nib mo’maw’ ya be rus ni yira darifannag fithingan Got ma aram me yib e engel u tharmiy nga but’ ni nge pi’ gelngin. (Luke 22:42, 43) Ku arrogodad nrayog ni nge fanay Got reb e fager rodad ni nge weliy ban’en ni nge pi’ e athamgil nga lanin’dad, u nap’an ni ke t’uf e ayuw rodad. (Proverbs 12:25) Bochan ni ma fulweg Got taban e meybil rodad u reb e kanawo’ nib mo’maw’ ni ngad nanged, ere dabisiy ni ngad tedan’dad u rogon ni ma fulweg taban e meybil rodad.

Boch e meybil e thingar ni sonnag e ngiyal’ nib puluw ni nge fulweg Got taban.

Be yog e Bible ni Got ni Gubin Ma Rayog Rok e ma lemnag e piin nib sobut’ lanin’rad ko “ngiyal’ ni be finey.” (1 Peter 5:6) Ere faanra der fulweg Jehovah taban e meybil rodad nib gur, ma dab ud lemnaged nde ga’ fadad u wan’. Bochan ni En Tasunmiy e ku boor ban’en ni manang, ere dabisiy ni manang e tin ni ir e ba t’uf rodad.

Ngad susunnaged: Mu lemnag ni faanra bay ba pagel ni fakam ni kab bitir ni ke yog ngom ni baadag ni nge fanay reb e rat. Gur, ka chingiyal’ nem mag rin’ e n’en ni ke yog? Faanra ga be lemnag ni dawori taw nga nap’an ni nge yan u rat, ma dabisiy ni ga ra dugliy ndab kaam chuw’iy fare rat. Machane, boch nga m’on e sana ga ra rin’ e n’en ni be yog ni faanra ga manang ni ke nang rogon ni nge ayuweg ir ni nge dabi maad’ad. Taareb rogon ngak Got nra pi’ e “tin ni ir e kari t’uf [rodad]” ko ngiyal’ nib puluw ni faanra ud meybilgad ni gubin ngiyal’.​—Psalm 37:4.

NGE PAGAN’UY NI MA MOTOYIL JEHOVAH KO MEYBIL

Be pi’ e Bible e athamgil ngak e tin riyul’ e Kristiano ni dabi maruwar lanin’rad nga rogon feni rib ga’ fan e meybil ni yad ma tay. Boch e girdi’ e yad ra yog ‘nib mom ni nga nog e re n’ey ko bin ni ngan rin’.’ Riyul’ ni faanra bay reb e magawon ni be ulul ara bay be’ ni be laniyan’ ngodad, ma rayog ni nge mo’maw’ ngodad ni ngad sonnaged Got ni nge fulweg taban e meybil rodad. Machane, thingar da lemnaged e n’en ni ke fil Jesus ngodad u murung’agen rogon ni ngad tedan’dad ko meybil.

I weliy Jesus reb e fanathin u murung’agen be’ nib pin nib gafgow ni ke yim’ figirngin ni i sul ngak reb e tapuf oloboch ni nge ayuweg. (Luke 18:1-3) Yugu aram rogon nsom’on ma fare tapuf oloboch e de m’agan’ ngay ni nge ayuweg fare pin, machane me yog ni gaar: “Nggu pi’ mat’awun e re pin ney ni bochan e yugu be yib i magawon ngog; ya faanra dangay ma yugu bay i sul ma ke chalbag ngak!” (Luke 18:4, 5) Rogon ni bay ko bin kakrom e thin e fare tapuf oloboch e i tiyan’ ngak fare pin ya nge dabi kireb thin. Faanra bay reb e tapuf oloboch nder yul’yul’ ma nge ayuweg be’ nib pin nib gafgow ni ke yim’ figirngin ya bochan ni be magafan’ ko n’en nra lemnag e girdi’ ngak, ma uw feni ri ma runguydad Got, ma ra ayuweg e “piin ni yad be wenig ngak ni rran nge nep’.” I yog Jesus ni gaar: “Nggog ngomed nra turguy ni nge ayuwegrad me rin’ ni papey.”​—Luke 18:6-8.

Yugu aram rogon ni bay yu ngiyal’ ni ma chalbadad i ning e ayuw, machane dabi mulan’dad. Gad ra ulul ko meybil, ma gad be dag ni be pagan’dad nra ayuwegdad Got. Maku gad ma guy rogon ni ma fulweg Got taban e meybil rodad, ma angin nra yib riy e gad ra chugur ngak. Arrogon, rayog ni nge pagan’dad nra fulweg Got taban e meybil rodad ni faan gad ra ulul ngad ninged boch ban’en ngak u fithik’ e pagan’.​—Luke 11:9.