Ma Gay Got Rogon Ni Nge Chugur Ngom

FAN NI MA MARUWAR LANIYAN’ BOCH E GIRDI’: Boor e girdi’ nib mich Got u wan’rad e yad ma lemnag ndabiyog ni ngar chugurgad ngak. Christina ni be’ nu Ireland ni ma yan nga galesiya ni gubin e wik e yog ni gaar: “Gu ma lemnag ni Got e kemus ni ir e ke sunmiy gubin ban’en. Machane, da ug nang ko ir mini’. Ma dariy ba ngiyal’ ni ke chugur e tha’ u thilmow.”

N’EN NI BE FIL E THIN ROK GOT: Faanra ke war e michan’ rodad, ma dabi pagdad Jehovah. Ke dag Jesus rogon ni be lemnag Got rarogodad ni gaar: “Gonap’an e mang e ra rin’ be’ ni faanra ba’ raay i saf ni fak me yan reb nga bang? Ra digey fa mereb i ragag nge mereb nem ni yad be kay e pan u sigreen e burey me yan nge gay fa binem ni ke yan nga bang.” Mang e n’en ni gad ra fil ko re n’ey? “Ku er rogon e Chitamangimed nu tharmiy nde adag bagayad e nochi bitir ney ni nge malog.”​—Matthew 18:12-14.

Gubin e “nochi bitir ney” nib ga’ farad u wan’ Got. Uw rogon ni ma gay Got bagayad ni “ke yan nga bang”? Rogon ni be yog e thin nu Bible u tabolngin e re article ney e Jehovah e ma chugurnag e girdi’ ngak.

Mu lemnag rogon ni ke rin’ Got boch ban’en ya nge yag ni nge chugur e piin nib yul’yul’ ngak. U nap’an e bin som’on e chibog C.E., me l’og Got Filip ni ir reb i gachalpen Jesus ni nge yan i taleg ba karrow ni ma girngiy e os ni be yan reb e tolang riy ni be’ nu Ethiopia, ya nge yag ni nge weliy ngak fan reb e yiiy u Bible ni i beeg fare pumoon murung’agen. (Acts 8:26-39) Munmun, miki pow’iy Got apostal Peter ni nge yan nga tafen reb e salthaw nu Roma ni Kornelius fithingan ni be meybil, ma be athamgil ni nge liyor ku Got. (Acts 10:1-48) Ma ki pow’iy Got apostal Paul nge piin ni yad be un ngak nga reb e lul’ nga wuru’ fare mach nu Filippi. Aram e gin nra mada’gad be’ nib pin riy ni Lydia fithingan ni “ma meybil ma ma liyor ngak Got.” Me n’igin Jehovah ni nge ‘tamilang laniyan’.’​—Acts 16:9-15.

Rogon ni ke m’ug ko fapi girdi’ ni kad weliyed murung’agrad e ke guy Jehovah rogon ni nge ayuweg e piin ni yad be gay rogon ni ngar chugurgad ngak. Chon mini’ e ngiyal’ ney e yad ma yan u mit e tabinaw i yan maku yad ma yan ko yungi n’en ni boor e girdi’ riy ya nge yag ni ngar weliyed murung’agen Got ko girdi’ ni bay u Bible? Boor e girdi’ ni yad ma yog ni, “Pi Mich Rok Jehovah.” Mu fithem ni nge lungum, ‘Gur, be fanayrad Got ni ngar ayuwegned gag?’ Gamad be pi’ e athamgil nga lanin’um ni ngam meybil ngak Got ya nge yag ni ngam chugur ngak.a