KENGGIN E RE KE BABYOR NEY | RAYOG NI NGAM CHUGUR NGAK GOT
Ga Be Lemnag ni Gab Chugur ngak Got, Fa?
“Ra ba chugur e tha’ u thilmew Got mab pagan’um, ma kub mudugil e lem rom. Ga ra nang ni gubin ngiyal’ ni ma lemnag Got rarogom.”—CHRISTOPHER, NREB E PAGEL NI MA PAR U GHANA.
“Rayog ni nge guy Got e kireban’ ni ga ma tay, ma ma t’ufegem ma ri ma lemnagem.”—HANNAH NI 13 E DUW ROK NI MA PAR U ALASKA, U.S.A.
“Ra gapas lanin’um ni faanra kam nang nib chugur e tha’ u thilmew Got!”—GINA NI BE’ NIB PIN U JAMAICA NI KE PAG 40 E DUW ROK.
Gathi yigoo Christopher, nge Hannah, nge Gina e yad ma lem ni aram rogon. Boor e girdi’ u ga’ngin yang e fayleng nib mich u wan’rad ni ma tay Got ni yad e fager rok. Me gur, uw rogon e lem rom? Ga be lemnag nib chugur e tha’ u thilmew Got? Fa ga baadag ni ngki chugur boch e tha’ u thilmew? Dabisiy ni ga ma lemnag ko: ‘Rayog rok be’ ni nge chugur e tha’ u thilrow Got ni Gubin Ma Rayog Rok, fa dabiyog? Ma faanra rayog, ma uw rogon?’
RAYOG NI NGAN CHUGUR NGAK GOT
Be yog e Bible nrayog ni ngan chugur ngak Got. Ku be yog ni i yog Got ni Abraham e ‘fager rok.’ (Isaiah 41:8) Am lemnag e n’en ni be yog Got ngodad ni bay ko James 4:8 ni gaar: “Mu chugurgad ngak Got, me chugur ngomed.” Ere, ba tamilang nrayog ni nge chugur e tha’ u thildad Got. Machane, bochan ni dabiyog ni ngan guy Got, me ere uw rogon ni ngad ‘chugurgad’ ngak me fel’ e tha’ u thildad?
Ra ngad nanged e fulweg ko re deer ney, mab fel’ ni ngad nanged rogon ni ma fel’ e tha’ u thilin l’agruw ni’. Som’on e ba t’uf ni nge bagayow me nang fithingan bagayow. Ma nap’an nra ur nonow ngorow ni gubin ngiyal’, ma yow be weliy lanin’row ngorow, ma aram e ra chugur e tha’ u thilrow. Ra ur athamgilgow ni nge bagayow me rin’ boch ban’en ni fan ngak bagayow, ma aram e ra gel e tha’ u thilrow. Faanra gad baadag ni ngki chugur e tha’ u thildad Got maku aram rogon e n’en nib t’uf ni ngad rin’ed. Ngad guyed ko uw rogon e re n’ey.