Ga Ma Non ngak Got, Fa?

Pi fager nib chugur e tha’ u thilrad e yad ma non ni gubin ngiyal’ u telefon, ara e-mail, ara video, ara babyor. Ere, faanra ngad chugurgad ngak Got, mab t’uf ni ngaud nonad ngak ni gubin ngiyal’. Machane, uw rogon ni ngan rin’ e re n’ey?

Rayog ni ngaud nonad ngak Jehovah u daken e meybil. Ma meybil ni gad ma tay e gathi taareb rogon ko numon u thildad e piin ni gad nga yangar. Ba ga’ fan ni ngad nanged ni faan gad ra meybil, ma gad be non ngak e En Tasunmiy ni ir e Th’abi Tolang u ga’ngin e palpalth’ib. Re n’ey e ra k’aringdad ni ngad meybilgad ngak u fithik’ e tayfan. Faanra nge rung’ag Got e meybil rodad, ma bay boch ban’en nthingar thingar da folgad riy. Baaray dalip e kanawo’ u rogon ni ngan rin’ e re n’ey riy.

Bin som’on, e kemus ni Jehovah Got e ngan meybil ngak, gathi Jesus ara “pi thothup” ara reb e liyos. (Exodus 20:4, 5) Be tamilangnag e Bible ni gaar: “Faan gimed ra meybil ngak Got mi gimed ning ngak e tin ni nge yog ngomed, ma gubin ngiyal’ ni nguum ninged ngak ni gimed be pining e magar ngak u lanin’med.” (Filippi 4:6) Bin l’agruw, e thingar ni meybil u daken fithingan Jesus Kristus ni Fak Got. I yog Jesus ni gaar: “Dariy be’ nrayog ni nge yan ngak e en ni Chitamangiy ya ke mus ni gag e ra yan rog ngak.” (John 14:6) Bin dalip, e thingari puluw e meybil rodad ko n’en nib m’agan’ ngay. Be yog e Bible ni gaar: “Mmudugil u wan’dad nra rung’ag e tin ni gadad be yog ni faan gadad ra ning ban’en ngak ni ban’en nib m’agan’ ngay.”a​—1 John 5:14.

Riyul’ ni dabiyog ni nge par e tha’ u thilin l’agruw ni’ nib chugur ni faanra kemus ni taa bagayow e yug be non. L’agruw ni’ ni yow ba fager e yow ba felfelan’ ni yow ma non ngorow, ere ku thingar da paged Got ni nge non ngodad, ma gad motoyil ngak. Ga manang ko uw rogon ni ma non Got ngodad?

Ngiyal’ ney e ma “non” Jehovah Got ngodad u daken e Thin rok u Bible. (2 Timothy 3:16, 17) Mang fan nrayog ni nga nog ni aray rogon? Ngad susunnaged ni ke pi’ e fager rom bangi babyor ngom. Tomuren ni ga ra beeg fagi babyor, ma ga ra yog ngak boch e girdi’ u fithik’ e felfelan’ ni ke non fare fager rom ngom ni yugu aram rogon nde moy u toobem. Ere, ku arrogon e Bible nnap’an ni ga ra beeg, ma aram e ga be pag Jehovah ni nge non ngom. Gina ni kan weliy murung’agen ko bin som’on e article e yog ni gaar, “Gu be lemnag ni faanra gu baadag ni nge mang Got e fager rog, mab t’uf ni ngaug beeg e ‘babyor’ rok ni aram e Bible.” Miki gaar, “Bochan ni gu ma beeg e Bible ni gubin e rran, ma ke yag ni nge chugur e tha’ u thilmow Got.” Ga ma pag Jehovah ni nge non ngom ni gubin e rran u daken e Thin rok ni ga ma beeg u Bible? Ga ra rin’ e re n’ey, ma ra ayuwegem ni nge chugur e tha’ u thilmew Got.