Ga Ma Rin’ e N’en ni Ma Yog Got, Fa?

“Demtrug e n’en ni ga baadag ni nggu rin’, ma gog ngog, ya gu ra felfelan’ ngay ni nggu rin’.” Dabisiy ni ga ra magagawon ni nga mog e re n’ey ngak be’ ndam nang ara be’ ni kemus ni gimew manangmew. Machane, dabisiy ndab mu magawon ni nga mog e pi thin ney ngak reb e fager rom. Pi fager nrib fel’ thilrad e ba mudugil ni yad ra rin’ e n’en ni baadag bagayad ni nge rin’ bagayad.

Be tamilangnag e Bible ni Jehovah e ba ga’ ni ma rin’ boch ban’en ni ma yibnag e felfelan’ ngak e pi tapigpig rok. Bod rogon David ni Pilung ni i felfelan’ ko tha’ u thilrow Got, me yog ni gaar: “Somol ni Got rog, pire’ ban’en ni yira ngat ngay ni kam ngongliy ni fan ngomad; dariy be’ ni bod gur! Boor ban’en nib fel’ ni ke m’ay i lemnag rom ni fan ngomad. . . . Ra yan i aw ndabiyog rog ya kaygi pire’.” (Psalm 40:5) Ku ma rin’ Jehovah boch ban’en ni ma felfelan’nag e piin ndawor ra nanged ir, ni aram e ma ‘pi’ e ggan ngorad ma ma fal’eg lanin’rad.’​—Acts 14:17.

Bochan ni baadag Jehovah ni nge rin’ boch ban’en nra felfelan’nag yugu boch e girdi’, me ere piin ni yad baadag ni ngar manged fager rok Got e ba puluw ni ngar rin’ed e tin nra ‘felfelan’nag.’ (Proverbs 27:11) Mang e rayog ni ngam rin’ ni ngam felfelan’nag Got? Be yog e Bible ni gaar: “Dab mpaged talin ni ngam rin’ed e tin nib fel’ ma nge bigimed mi i ayuweg bigimed, ya ereray e pi maligach nib m’agan’ Got ngay.” (Hebrews 13:16) Gur, re n’ey e be yip’ fan ni faanra kemus ni ngad rin’ed e tin nib fel’, ma gad be pi’ boch ban’en ni bay rodad ngak boch e girdi’, ma aram e ra felfelan’nag Jehovah?

Be gaar e Bible: “Dariy be’ nra fel’ u wan’ Got ni faanra de mich Got u wan’.” (Hebrews 11:6) Ba ga’ fan ni ngan lemnag ni “Abraham e i par nib mich Got u wan’” ma aram mi i yog Got ni Abraham e ‘fager rok.’ (James 2:23) Ke tamilangnag Jesus Kristus feni rib ga’ fan ni nge ‘mich Got u wan’dad’ ni faanra ngad felfelan’gad ko pi tow’ath nra pi’ ngodad. (John 14:1) Ere, uw rogon ni nge yag fare michan’ ngom ni bay rok e piin ni yad ba fel’ u wan’ Got? Som’on e ngam tabab i fil e Thin rok Got u Bible. Faan ga ra rin’ e re n’ey, ma ga ra “nang rogon Got i yan nge tin ni ba adag” mag nang “rogon ni ngam rin’ e tin nib m’agan’ ngay.” Ma faanra yoor ban’en nim fil u murung’agen Jehovah, mag rin’ e tin nib m’agan’ ngay, ma ra gel e michan’ rom ma aram kanawoen nra chugur e tha’ u thilmew.​—Kolose 1:9, 10.