Mang Fan ni Ngam Ulul i Fil Murung’agen Jehovah?

1. Faan ga ra ulul i fil e Bible, ma uw rogon nra yib angin ngom?

Dariy e maruwar riy ni pi thin nu Bible ni kam fil e ke gelnag e t’ufeg rom ngak Jehovah. Thingar um guy rogon ni nge gel e re t’ufeg ney. (1 Peter 2:2) Athap rom ko yafas ni manemus e be yan u rogon ko ga ra chugur ngak Got u daken e fol Bible ni ga be tay fa danga’.​—Mu beeg e John 17:3; Jude 21.

Ra yoor ban’en nim nang u murung’agen Got, ma ra gel e michan’ rom. Michan’ ni bay rom e ra ayuwegem ni ngam rin’ e tin nib m’agan’ Got ngay. (Hebrews 11:1, 6) Ra k’aringem ni ngam kalngan’um ko kireb rom mag thilyeg boch ban’en ko yafas rom.​—Mu beeg e Acts 3:19.

2. Uw rogon nra yib angin ngak boch e girdi’ e tirok Got ban’en ni kam fil?

Dabisiy ni ga ra adag ni ngam weliy e pi n’en ni kam fil ngak boch e girdi’. Gad ba felfelan’ ni ngad weliyed fare thin nib fel’ ko girdi’. Ga ra ulul i fil e Bible, ma ga ra nang rogon ni ngam fanay e thin riy ni ngam weliy e pi n’en ni kam fil u murung’agen Jehovah ni ke mich u wan’um nge fare thin nib fel’.​—Mu beeg e Roma 10:13-15.

Yooren e girdi’ e yad ma weliy fare thin nib fel’ ko pi fager rorad nge girdi’ rorad ko som’on. Ere, mu gonopiy rogon ni ngam rin’. Mu weliy ngorad e pi n’en ni ke micheg Got ko bin ni nga mog nde puluw e n’en ni be machibnag e teliw rorad. Maku reb e dab mu pagtalin ni ngongol rom e ba ga’ fan u wan’ e girdi’ ma gathi n’en ni ga ma yog.​—Mu beeg e 2 Timothy 2:24, 25.

3. Ra uw rogon e tha’ u thilmew Got?

Ga ra fil e Thin rok Got ma ra ayuwegem ni ngam mon’og ko tirok ban’en. Ra munmun ma aram e rayog ni nge fel’ e tha’ u thilmew Jehovah, ma rayog ni ngam mang reb i chon e tabinaw rok.​—Mu beeg e 2 Korinth 6:18.

4. Uw rogon ni ngam mon’og i yan?

Ra um fil e Thin rok Got, ma rayog ni ngam mon’og ko tirok ban’en. (Hebrews 5:13, 14) Mog ngak bagayad e Pi Mich Rok Jehovah nge fil e Bible ngom ni be fanay fare ke babyor ni Mang e Ri Be Fil e Bible? Ra yoor ban’en ko Thin rok Got nim fil, ma aram e rayog ni nge fel’ e par rom.​—Mu beeg e Psalm 1:1-3; 73:27, 28.

Fare thin nib fel’ e yib rok Jehovah, ni ir fare Got nib felfelan’. Ga ra chugur ko girdi’ rok, ma aram e rayog ni ngam chugur ngak. (Hebrews 10:24, 25) Ga ra athamgil ni ngaum rin’ e tin nib m’agan’ Jehovah ngay, ma aram e ra yog e bin riyul’ e yafas ngom ni aram e yafas ndariy n’umngin nap’an. Ngam chugur ngak Got e aram e n’en nth’abi fel’ nrayog ni ngam rin’.​—Mu beeg e 1 Timothy 1:11; 6:19.