Dakuriy Yugu Reb i Kanawoen e Yafos nib Fel’ nga Bang

Mang e rayog ni ngam rin’ mag chugur ngak Got? Kad weliyed boch e kanawo’ u rogon ni nge chugur e tha’ u thildad Got, ni aram e:

1. Ngam nang, mag fanay fithingan Got ni aram Jehovah.

2. Ngam non ngak ni gubin ngiyal’ u daken e meybil, mag fil e Thin rok u lan e Bible.

3. Gubin ngiyal’ ni ngam rin’ e tin nib m’agan’ Jehovah ngay.

Ga ra lemnag e pi n’ey, ma rayog ni nga mog ni ga be rin’ e n’en nib t’uf ni ngam rin’, ya nge yag nim chugur ngak Got, fa danga’? Ga be lemnag ma ka bay boch ban’en nrayog ni ngkum mon’og riy? Ba ga’ fan ni ngad athamgilgad, ya faan gad ra rin’, ma ra yib angin.

I yog Jennifer ni be’ ni ma par u Meriken ni gaar: “Ri gad ra felfelan’ ni faan gad ra athamgil ni ngari chuchugur e tha’ u thildad Got. Re n’ey e ra yibnag boor e tow’ath ngodad: ni bod rogon nrayog ni nge pagan’dad ngak Got, ma gad nang rarogon, me t’uf rodad. Dakuriy yugu reb i kanawoen e yafos nga bang nib fel’ ko biney!”

Faanra ga baadag ni nge chugur e tha’ u thilmew Got ma ra felfelan’ e Pi Mich Rok Jehovah ni ngar ayuweged gur. Yad ra yarmiy ni ngan fil e Bible ngom ndariy puluwon. Ku yibe piningem ni ngam un ko pi muulung ni yima tay u Kingdom Hall, ya aram e gin nrayog ni ngam felfelan’gad e piin nib ga’ fan u wan’rad e tha’ u thilrad Got.a Nap’an ni ga ra rin’ e pi n’ey, ma ra taareb rogon e lem romew fare psalmist ni faani gaar: “Machane gag e kari felan’ug, ya gu be par u tooben Got!”​—Psalm 73:28.