Ke Buch Ban’en nib Tomgin ni Kan Gafgow Riy

“Som’on e ri kireban’mad ni gowa dakuriy e athap romad. Ya gubin ban’en romad ni ke kirebnag e but’ ni ke muchubu’ nge ran ni ke tharey daken e binaw.”—Andrew, Sierra Leone.

“Tomuren ni m’ay e yoko’, ma aram ma gamad sul nga tabinaw. Kug gingad ya dakuriy ban’en ni ke magey romad. Bay ba rugod ni fakag ni aw nga but’ nga i yor.”—David, Virgin Islands.

FAANRA gur be’ ni kam magey ni gab fos u tomuren reb e yoko’ ara durru’ ara boch ban’en ni ma buch ni yima gafgow riy, ma dabisiy ni ke buch rom e n’en ni ke buch ko pi girdi’ ney. Sana kam gin ko n’en ni ke buch, ara dabum ni nge mich u wan’um ni ke buch e pi n’em, ara kari magafan’um ngay, ara ga ma lik’aynag ni gubin ngiyal’. Boor e girdi’ ni ke buch e re n’ey rorad ni ke aw parowrad ma ke mulan’rad ko yafos rorad.

Faanra kam gafgow ni bochan e yoko’, ara durru’, ara boch ban’en ni yima gafgow riy, ma sana rayog ni ngam lemnag ndabkiyog ni ngam athamgil u fithik’ e magafan’ rom. Ku rayog ni ngam lemnag ndakuriy fan e yafos rom. Machane be tamilangnag e Bible ni ka rayog ni nge l’agan’um ko yafos rom, maku bay fan ni ngam athapeg boch ban’en nib manigil ni fan ko gabul nge langlath.

GA RA NANG E TIN RIYUL’ U BIBLE MA RAYOG NI NGE L’AGAN’UM KO PI N’EN NI BAY NGA M’ON

Be gaar e Eklesiastes 7:8, BT: “Ra ni mu’nag ban’en ma kab fel’ nga ban’en ni ka fin ni tababnag.” Faanra ka fini m’ay bang e yoko’, ara durru’, ara boch ban’en ni ma yib ni yima gafgow riy, ma sana rayog ni ngam lemnag ndakuriy e athap rom. Machane faan ga ra gum’an’nagem ngam guy rogon ni ngki sul e par rom nga rogon, ma aram e rayog ni nge fel’ boch e par rom nge tafinay rom.

Be yiiynag e Bible murung’agen ba ngiyal’ “ndakuriy e meyor . . . ma dab kun ning e ayuw.” (Isaiah 65:19) Ra buch e re n’ey u nap’an ni yira fal’eg e re fayleng ney nge manigil u tan Gil’ilungun Got. (Psalm 37:11, 29) Ra taw ko ngiyal’ nem ma dabki yib e yoko’, ara durru’, ara boch ban’en ni yima gafgow riy. Ku ra chuw e amith nge kireban’ ni ma tay laniyan’ e girdi’ nib n’uw nap’an ni bochan e pi n’ey ni ma buch, ya ke micheg Got ni Gubin Ma Rayog Rok ni gaar: “Bay gu sunumiy reb e fayleng nib beech nge reb e lan e lang nib beech. Ma tin kakrom e ri bay ni pag talin.”—Isaiah 65:17.

Am lemnag e re n’ey: En ni Ke Sunmiy urngin ban’en e ke rin’ boch ban’en ya ‘nge yag ngodad e tin ud nameged,’ ni aram e ngad pared u fithik’ e gapas u tan Gil’ilungun Got. (Jeremiah 29:11) Faanra tamilang e re thin ney u wan’um, ma gur rayog ni ngki l’agan’um ko yafos rom bayay? Sally ni faan bay e thin rok ko bin som’on e article e yog ni gaar: “Faanra um par ni ga be puguran ngom e pi n’en nrib manigil nra rin’ Gil’ilungun Got ni fan ngodad boch nga m’on, ma aram e rayog ni nge dab kum lemnag e tin ke thumur ban’en me yag nim athamgil u fithik’ e pi n’en ni ga be mada’nag e chiney.”

Mang ndab mu fil boch ban’en u murung’agen e n’en nra rin’ Gil’ilungun Got ni fan ko girdi’? Faan ga ra rin’ ni aray rogon, ma rayog ni nge pagan’um ni yugu aram rogon ni kam gafgow ni bochan e yoko’, ara durru’, ara boch ban’en ni ma yib ni yima gafgow riy, maku rayog ni nge l’agan’um ko par rom e chiney u nap’an ni ga be sonnag e ngiyal’ nra chuw urngin e pi gafgow ney boch nga m’on. Machane, bay boch e thin nu Bible nrayog ni nge ayuwegem ni ngam athamgil u tomuren e yoko’, ara durru’, ara boch ban’en ni ma yib ni yima gafgow riy. Baaray boch e pi thin nu Bible nem.

Boch e Thin nu Bible Nrayog ni Nge Ayuwegem

Nge gaman e toffan rom.

“Kab fel’ ni nge yag ngom ni buchuuw, nib gapas lanin’um, ko bin nge thay parwom ni gubin ngiyal’ ni ga be maruwel nga l’agruw raba’ i paam, ni ga be guy rogon ni ngam focholiy e nifeng.”—Eklesiastes 4:6, BT.

Ke yog e piin ni yad ma gay murung’agen boch ban’en nu tomuren nra buch boch ban’en rok be’ nib tomgin, ma rayog ni nge mun daken e kireban’ rok . . . ni faanra dabi gaman e mol rok. Ere, ba fel’ ni nga i gaman e mol.

Mu weliy lanin’um ngak be’.

“Magafan’ e rayog ni iring e felfelan’ rom, machane thin nib fel’ e ra baudeg lanin’um.”—Proverbs 12:25, BT.

Mu weliy lanin’um ngak reb i girdien e tabinaw rom ara reb e fager rom nib pagan’um ngak. Chon e tabinaw rom ara pi fager rom nib pagan’um ngorad e gathi kemus nrayog ni ngar motoyilgad ngom, ya ku rayog ni ngar pied e athamgil nga lanin’um mar ayuweged gur u boch ban’en nib t’uf e ayuw rom riy.a

Mu athapeg e ngiyal’ nra fel’ urngin ban’en riy boch nga m’on.

“Ke yog Got ni bay sum e bin nib beech e lan e lang nge bin nib beech e fayleng, ni aram e tin nib mat’aw e ngongol e bay i par riy, ni ereray e pi n’en ni gadad be sonnag.”—2 Peter 3:13.

a Faanra yigi par be’ ni be mochuch ara be magafan’ nib n’uw nap’an ma aram e rayog nib t’uf ni nge yan i guy e togta.