Ke Yim’ Be’ nib T’uf Rom

“Nap’an ni yim’ walageg ni pumoon nib ilal ngog nib tomgin, mug lemnag ndariy ban’en nrayog ni nggu rin’ ngay. Boch e pul nga tomuren ma bay gu par meb ngan’ug walageg nib tomgin mi ri kireban’ug ngaug thamiy ni gowa kan rugoy bangi yar ngog. Yu ngiyal’ e gu ma damumuw, ya gu ma lemnag ko mang fan ni ke yim’ ndariy tapgin. Kug ma lemnag nib kireb e rog ni bochan e de yag ni nggu rin’ew boor ban’en u taabang.”—Vanessa, Australia.

FAANRA bay be’ ni ke yim’ nib t’uf rom, ma sana rayog nib thilthil rogon e lem ni ga be tay. Rayog ni be kireban’um, ara ga be tawreng, ara ga be lemnag ndariy ban’en nrayog ni ngam rin’ ngay. Sana ku rayog ni ga be damumuw ara ga be rus, fa reb e ga be lemnag ko ka rayog ni nge l’agan’um ko yafos rom fa danga’.

De kireb ni nge kireban’um ni mus ni faanra ba n’uw nap’an ni ga be par ni aram rogon. Re n’ey e be dag ni faen ni ke yim’ e rib t’uf rom. Machane gur, rayog ni nge war boch e kireban’ rom, fa?

N’EN NI KE RIN’ BOCH E GIRDI’

Yugu aram rogon ni gowa dabiyog ni nge m’ay e kireban’ rom, machane rayog ni nge ayuwegem e pi fonow ni baaray:

MU PAG BA NGIYAL’ NI NGE KIREBAN’UM

Piin ni ke yim’ be’ nib t’uf rorad e ba thilthil rogon e kireban’ ni yad ma tay nge n’umngin nap’an. Machane faan ga ra yor, ma ra ayuwegem ni nge war boch e kireban’ rom. Vanessa ni kan weliy e thin rok e yog ni gaar: “Gu ma yor ni fan e nge war e kireban’ rog.” Me Sofia ni ke yim’ walagen nib pin nib tomgin e gaar: “Gu ra lemnag e n’en ni ke buch, ma rib gel e kireban’ ni gu ma tay. Re n’ey e rayog ni ngan taarebnag nga bangi malad ni yibe klinnag ni ke adaw. Rib gel e amith riy, machane ireray e n’en nrayog ni nge golnag.”

MU WELIY LANIN’UM

Sana bay yu ngiyal’ ni ga baadag ni ngam par u bang ni goo gur. Machane ga ra rin’ e re n’ey u nap’an ni be kireban’um, ma bod ni ga be guy rogon ni ngam fek ban’en nib tomal ni goo gur. Jared ni yim’ e chitamangin u nap’an ni ke gaman ragag nge medlip e duw rok e yog ni gaar: “Gu ma weliy lanin’ug ngak boch e girdi’. Sana da i yag ni nggu weliy lanin’ug nib fel’ rogon, machane kug felfelan’ ni ke yag ni nggu weliy lanin’ug ngak be’.” Me Janice ni kan weliy murung’agen ko bin som’on e article e ki yog ni gaar: “Nap’an nug weliy e kireban’ rog ngak boch e girdi’, me yag ni nge fel’ boch lanin’ug. Rayog ni ngguy ni kan nang fan lanin’ug, ma dariy rogon ni nggu athamgil u fithik’ ni goo gag.”

MU PAG NGAN AYUWEGEM

I yog reb e togta ni gaar: “Piin ni ka nim’ rorad ni yad be pag e fager nge girdi’ rorad ni ngar ayuweged yad u nap’an ni ka fini yim’ be’ nib t’uf rorad e ba ga’ nib mom boch ni ngar k’adedan’rad ko kireban’ ni be yib ngorad mar gelgad ngay.” Mog ko pi fager rom rogon ni ngar ayuweged gur, ya dabisiy ni yad baadag ni ngar rin’ed, machane dar nanged ko uw rogon.—Proverbs 17:17.

MU CHUGUR NGAK GOT

I yog Tina ni gaar: “Nap’an ni yim’ e pumoon rog nib tomgin ni bochan e m’ar ni cancer, ma dabkiyog ni nggu weliy lanin’ug ngak. Ere gu ma weliy lanin’ug ngak Got! N’en nsom’on ni gu ma rin’ ni gubin e rran e gu ma ning e ayuw ngak ya nge yag nug rin’ e pi n’en nib t’uf ni nggu rin’ u reb e rran. Boor e kanawo’ ni ke ayuwegeg Got riy.” Me Tarsha ni 22 e duw rok u nap’an ni yim’ e chitiningin e yog ni gaar: “Beeg Bible ni gu ma tay ni gubin e rran e ir e ma fal’eg lanin’ug. Re n’ey e ma pi’ e athamgil nga lanin’ug.”

MU LEMNAG E NGIYAL’ NI YIRA FASEG E PIIN KAR M’AD

I ulul Tina ngay ni gaar: “Som’on e gu ra lemnag e athap ko fos ko yam’ ma der ma fel’ lanin’ug, ya bay dalip e pagel ni fakag nib t’uf ni nge ayuwegmad e pumoon rog. Machane chiney ni ke yan aningeg e duw e ka fini ga’ fan e re athap ney u wan’ug. Re n’ey e ma fal’eg lanin’ug, ma ma ayuwegeg ni nggu athapeg e felfelan’ ni ka bay nga m’on, me yag ni nggu k’adan’ug. Gu ra lemnag e ngiyal’ ni gamow ra mada’ bayay e pumoon rog, ma ri ma pi’ e gapas nga lanin’ug me k’aring e felfelan’ ngog!”

Sana dabi chuw e kireban’ rom nib papey. Machane, n’en ni ke buch rok Vanessa e rayog ni nge ayuwegem. I yog ni gaar: “Sana ga ra lemnag ndabkiyog ni nge chuw e kireban’ rom, machane ra munmun ma ra war e kireban’ rom.”

Sana ka ga ma tawrengnag be’ ni ke yim’ nib t’uf rom, machane ka rayog ni nge l’agan’um ko yafos rom. Rayog ni nge ayuwegem Got ni ngam pirieg boch e fager nib fel’ me yib fan e yafos rom. Dabki n’uw nap’an, ma ra faseg Got e yam’. Baadag Got ni nge yag ni ngam gumuchmuch bayay ngak e en nib t’uf rom. Aram e ngiyal’ nra chuw e kireban’ rom ndariy n’umngin nap’an!

Boch e Thin nu Bible Nrayog ni Nge Ayuwegem

Ma lemnag Got e kireban’ rom.

Be’ ni yoloy reb e babyor u Bible e yog ngak Got ni gaar: “Kam yoloy gubin gaf i luag ni ke map’. Dariy u babyor rom ni kam yoloy?”—Psalm 56:8, BT.

Rayog ni ngam weliy ngak Got rogon e kireban’ rom.

“Gu fek i yib ngak [Got] urngin e tin be magafan’ug ngay; gog ngak urngin e gafgow rog.”—Psalm 142:2, 5, BT.

Rayog ni nge l’agan’um ko tin bay nga m’on.

“Bayi faseg urngin e girdi’ ko yam’.”—Acts 24:15.

Ke micheg Got nra faseg boor e girdi’ ni kar m’ad, ma ri baadag ni nge fasegrad ko yam’.a—Job 14:14, 15.

a Ra ga baadag ni ngkum nang boch murung’agen e fos ko yam’, mag guy e guruy ni 30 ko fare babyor ni Mu Par Ndariy N’umngin Nap’an ni Gab Felfelan’! ni ke ngongliy e Pi Mich Rok Jehovah. Ku rayog ni ngan downloadnag ko www.jw.org.