Der Yul’yul’ e En Mabgol Rom

“Nap’an ni yog e pumoon rog ngog ni ke dugliy ni nggu dargow ni bochan reb e ppin ni kab rugod ngog, ma gu baadag ni nggum’. Gu ra lemnag urngin ban’en ni kug pag fan ni fan ngak, ma ri de mat’aw e n’en ni ke rin’ ngog.”—Maria, Spain.

“Nap’an ni n’ageg e ppin rog nib tomgin, ma gowa ke yim’ ban’en u fithik’ag. Pi n’en ni ug namegew, nge pi n’en ni ug athapegew, nge pi n’en ni ug lemnagew ni nggu rin’ew e goo kireb ni gubin. Bay boch e rran ni bayi n’en mug lemnag ni ke chuw e magafan’ rog, machane boch nga tomuren miki kireban’ug bayay.”—Bill, Spain.

RIB gel e mooch’och ni ma tay laniyan’ be’ nder yul’yul’ e en mabgol rok ngak. Riyul’ ni bay boch e girdi’ nrayog ni ngar n’aged fan e kireb ni ke rin’ e en mabgol rorad ngorad ma kur fal’eged bayay e mabgol rorad.a Demtrug ko ka ra fel’ fare mabgol fa danga’, machane nap’an nra nang be’ nde yul’yul’ e en mabgol rok ngak ma rib gel e mooch’och nra tay laniyan’. Ere, uw rogon ni nge athamgil u fithik’ e kireban’ rok?

BOCH E THIN NU BIBLE NRAYOG NI NGE AYUWEGEM

Yugu aram rogon ni boor e girdi’ ni kari mooch’och lanin’rad ni bochan e n’en ni ke buch rorad, machane ke yag ni nge fal’eg e thin nu Bible lanin’rad. Kar filed ni manang Got gelngin e kireban’ rorad ma be runguyrad.—Malaki 2:13-16.

“Yu ngiyal’ nder paslagan’ug ma ke magafan’ug, mag fal’eg lanin’ug nggu felan’.”—Psalm 94:19, BT.

I yog Bill ni gaar: “Nap’an nug beeg e re thin ney, ma gowa gu be guy Jehovah ni be fal’eg lanin’ug ni bod rogon ba matam ni ma runguyey.”

“Ga ba yul’yul’ ngak e piin yad ba yul’yul’ ngom.”—Psalm 18:25, BT.

Carmen e bokum e pul ni i par e pumoon rok nder yul’yul’ ngak. I yog ni gaar: “Der yul’yul’ e pumoon rog ngog. Machane, gu manang ni Jehovah e ba yul’yul’ ngog ma dabi thilyeg e thin rok.”

“Dariy ban’en ni nge magafan’med ngay, machane faan gimed ra meybil ngak Got mi gimed ning ngak e tin ni nge yog ngomed . . . Ma gapas rok Got ndabi chuchugur ni nge nang e girdi’ fan e ra yororiy gum’ircha’med nge tafinay romed.”—Filippi 4:6, 7.

I yog Sasha ni gaar: “Bokum yay nug sul ngaug beeg e re thin ney. Nap’an nug ulul ko meybil, ma aram me pi’ Got e gapas nga lanin’ug.”

Gubin e piin ni bay e thin rorad aray u lang e immoy yu ngiyal’ ni yad baadag ni ngar paged yad ndab kur athamgilgad. Machane, i pagan’rad ngak Jehovah, ma kub gel e athamgil ni pi’ e Thin rok nga lanin’rad. Bill e yog ni gaar: “Yugu aray rogon ni gowa ke kireb gubin ban’en u lan e yafos rog, machane michan’ rog e aram e n’en ni yibnag fan e yafos rog. Yugu aray rogon nug wan ba ngiyal’ u ‘fithik’ e rumug ni yam’,’ machane de pageg Got.”—Psalm 23:4.

a Mu guy fapi article ko fare Awake! ko April 22, 1999 ni thin ni Meriken ni kenggin e “Faanra De Yul’yul’ e En Mabgol Rom” ni be weliy ko ngam n’ag fan fa danga’.

Rogon ni Ke Yag Rok Boch e Girdi’ ni Ngar Athamgilgad

Mu fal’eg i lemnag boch e thin nu Bible nra fal’eg lanin’uy.

I yog Bill ni gaar: “Gu beeg e babyor rok Job nge Psalms, ngemu’ mug tay e pow ko tin baaray nib m’ag ko magawon rog. Kug nang ni pi cha’ nra yoloyed e pi babyor ko Bible ney e ka ur thamiyed e amith laniyan’ nge magafan’ ni gu be thamiy.”

Ga ra motoyil ko musik ma rayog ni nge fel’ lanin’um.

I yog Carmen ni gaar: “Ra dabiyog ni nggu mol nnep’, ma gu ma motoyil ko musik. Ri ma fal’eg e re n’ey lanin’ug.” Me Daniel e yog ni gaar: “Gu fil rogon i chubeg e gita, ma aram mug guy ni musik riy e ma ayuwegeg ni nge gapas lanin’ug.”

Mu weliy lanin’um ngak be’.

I yog Daniel ni gaar: “De mecham ngog ni nggu weliy lanin’ug. Machane, bay boch e fager rog ni ug weliy lanin’ug ngorad. Ba ga’ ni gu ma weliy lanin’ug ngorad u daken e babyor ngu nap’an ni gamad be sabethin. Rib ga’ e ayuw ni pi’ e re n’ey ngog.” I yog Sasha ni gaar: “Rib ga’ angin e ayuw ni pi’ chon e tabinaw rog ngog. Gubin ngiyal’ ni bay e chitinag ni nge ayuwegeg. Faanra gu baadag ni nggu weliy lanin’ug, ma bay ni nge motoyil ngog. Ku arrogon e chitamag ni i pi’ e pagan’ ngog, me ayuwegeg ni nggu sul nga rogog ko som’on.”

Mu p’eyn’iy e meybil.

I gaar Carmen: “Gubin ngiyal’ ni gu ma meybil. Gu thamiy ni gowa bay Got nib chugur ngog ni be motoyil ngog ma be ayuwegeg. Nap’an ni gu be yan u fithik’ e re magawon nem, ma aram e ngiyal’ nri chugur thilmow Got.”