Uw Rogon Nra Fel’ E Par Rom Boch Nga M’on?

ROGON e par ko girdi’ e ngiyal’ ney e ba thil nga rogon ni lemnag Got ko som’on. Ba m’agan’ ngay ni nge sug e fayleng ko girdi’ ni yad baadag ni nge gagiyegnagrad e En Tasunmiy, me yib angin ngorad rogon ni be pow’iyrad, me m’ug e t’ufeg rok rorad nge ku boch i fel’ngin nrib manigil. Baadag Got ni nge felfelan’ e girdi’ u taabang mar ayuweged e tabinaw rorad, mi yad fil boch ban’en nib beech, mi yad paradisnag e fayleng.

KE MICHEG GOT NRA SULWEG E PAR U FAYLENG NGA ROGON NI LEMNAG KO SOM’ON

• “Be taleg e pi mahl ni yibe tay u fayleng i yan.”​—Psalm 46:9.

• “Ke taw nga nap’an . . . ni ngan kirebnag e piin ni kar kirebniged e fayleng!”​—Revelation 11:18.

• “Dariy be’ ni be par u lan e nam rodad ni bay ki yog nib m’ar.”​—Isaiah 33:24.

• “Pi n’en ni kar muruwliyed e ri bayi fel’ rogorad riy.”​—Isaiah 65:22.

Uw rogon nra lebug e pi yiiy ney? Ke dugliy Got Jesus ni Fak ni nge mang Pilung ko am rok ni bay u tharmiy nra gagiyegnag e fayleng. Be yog e Bible nre am ney e ka nog Gil’ilungun Got ngay. (Daniel 2:44) Be weliy e Bible murung’agen Jesus ni be gaar: “Somol ni ir Got e bayi pilungnag.”​—Luke 1:32, 33.

Nap’an ni immoy Jesus u fayleng, ma boor e maang’ang ni i ngongliy ni be dag nrogon e par ko girdi’ boch nga m’on u nap’an nra mang Pilung e kab fel’ ko par e ngiyal’ ney.

I DAG JESUS E N’EN NRA RIN’ NI FAN NGAK E PIIN YAD RA FOL

• I golnag gubin mit e m’ar ya nge dag rogon nra boch nga m’on me chuweg e m’ar ko girdi’.​—Matthew 9:35.

• I gapaseg e day ya nge dag rogon nra boch nga m’on ma ra i gagiyegnag e yafang ya nge ayuweg e girdi’. ​—Mark 4:36-39.

• I duruw’iy bokum biyu’ e girdi’ ya nge dag rogon nra boch nga m’on ma ra pi’ e tin nib t’uf ko girdi’.​—Mark 6:41-44.

• I pilyeg e ran nge ngal’ ni wain ya nge dag rogon nra boch nga m’on ma ra ayuweg e girdi’ ni ngar felfelan’gad ko yafos rorad.​—John 2:7-11.

Uw rogon ni ngam un ko biney e par ni be fal’eg Got rogon ni fan ko piin yad ma t’ufeg? Bay ban’en nthingar mu rin’. Be yog e Bible nthingar mu gay fare pa’ i kanawo’ ni be sor ko yafos nib “lich e girdi’ ni be pirieg.”​—Matthew 7:14.

MU GAY FARE PA’ I KANAWO’ NI BE SOR KO GIN NIB FEL’ E PAR RIY

Mang fare pa’ i kanawo’ ni be sor ko yafos? Be gaar Got: “I Gag Somol ni Got romed, faen baadag ni nge fil ngomed e tin nib fel’ me pow’iymed ko fare kanawo’ ni ngam marod riy.” (Isaiah 48:17, BT) Faan ga ra fol ko re fonow ney, ma aram e ra fel’ rogon e par rom.

I gaar Jesus: “I gag e kanawo’, me gag e tin riyul’, me gag e yafos.” (John 14:6) Faan gad ra rin’ e n’en ni yog Jesus ma gad folwok rok, ma aram e ra chugur e tha’ u thildad Got me fel’ rogon e par rodad.

Uw rogon nrayog ni ngam pirieg fare pa’ i kanawo’ ni be sor ko yafos? Boor raba’ e teliw, machane i ginangey Jesus ni gaar: “Gathi gubin e girdi’ ni ma piningeg ni ma lungurad Somol, Somol, e yad ra yan nga suwon Got u tharmiy, ya ke mus ni piin ni yad ma rin’ e n’en ni ba adag e Chitamag nu tharmiy ni ngar rin’ed e yad ra yan ngay.” (Matthew 7:21) Ki yog ni gaar: “Gimed ra nangrad ko ngongol rorad.” (Matthew 7:16) Rayog ni nge ayuwegem e Bible ni ngam nang ko baan ngan e teliw e ba riyul’.​—John 17:17.

Uw rogon nrayog ni ngam man ko fare pa’ i kanawo’ ni be sor ko yafos? Re n’ey e ba muun ngay ni ngam nang murung’agen e En Ke Pi’ e yafos ko girdi’: Mini’ e cha’ney? Mini’ fithingan? Uw rarogon? Mang e be rin’ ni fan ngodad? Ma mang e baadag ni ngad rin’ed?a

Gathi kemus nib m’agan’ Got ngay ni nge maruwel e girdi’, ma yad be abich, ma yad be fafel, ma yad be ayuweg e tabinaw rorad. Rayog ni ngad nanged e En Tasunmiy ma gad mang fager rok. Ku rayog ni ngad daged nib t’uf rodad ni aram e ngad rin’ed e n’en nib m’agan’ ngay. I gaar Jesus: “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got.”​—John 17:3.

N’EN NSOM’ON NI NGAM RIN’ ME YAG NIM UN KO FARE PA’ I KANAWO’ NI BE SOR KO YAFOS

Nap’an ni gad ra nang e n’en nib m’agan’ Got ngay ni ngad rin’ed, ma ra t’uf ni ngad thilyeged boch ban’en u lan e yafos rodad. Re n’ey e rayog ni nge mo’maw’ ngodad ni ngad rin’ed. Machane faan gad ra rin’ ma ra fel’ rogon e par rodad u nap’an ni gad ra tabab ni ngad leked fare pa’ i kanawo’ ni be sor ko yafos. Rayog ni nge ayuwegem e Pi Mich Rok Jehovah ni ngam pirieg e fulweg u boch e deer u murung’agen Got u daken e fol Bible ndariy puluwon ni yad ma tay ko re ngiyal’ nge gin’en ni ga baadag. Rayog ni ngam non ngomad ko fare website romad ni www.jw.org.