Rayog Ni Nge Fel’ Boch E Par Rodad E Ngiyal’ Ney
BAY ba ngiyal’ nra taw ngay ma dakuriy be’ nra m’ar, ara pilibthir, ara yim’. Rayog ni ngki aray rogon e par rom boch nga m’on! Machane chiney e gubin e girdi’ ni boor e magawon rorad. Bay ban’en nrayog ni nge ayuwegem, fa? Rayog ni nge ayuwegem e Bible ni ngam pirieg e felfelan’, me fel’ u wan’um e par rom e chiney. Am lemnag boch e magawon ni yibe mada’nag e ngiyal’ ney nge rogon nrayog ni nge ayuwegey e Bible riy.
NGE FEL’ U WAN’UM E TIN BAY ROM
Be gaar e Bible: “Dabi m’on e salpiy u lanin’med, ma ngam pired ni nge fel’ u wun’med e tin ni ba’ romed ban’en.”—Hebrews 13:5.
Ngiyal’ ney e boor ban’en ni ma yog e girdi’ nthingari yag ngodad. Machane be yog e Bible ni nge ‘fel’ u wan’dad e tin ni ba’ rodad ban’en.’ Uw rogon?
Mu siyeg “chogowen e salpiy.” Bay boch e girdi’ ni yad ma pag fan gubin ban’en ni bochan “chogowen e salpiy,” ni yugu aram rogon nra kireb fithik’ i dowrad riy, nge tabinaw rorad, nge fager rorad, nge tin ni yad manang nib fel’ ara ba kireb, miki m’ay farad u wan’rad. (1 Timothy 6:10) Bin riyul’ riy e kab ga’ fan e pi n’ey ko salpiy! Ra yan i tomur riy, ma cha’ nri baadag e salpiy e ‘dariy ba ngiyal’ nra gaman ko tin baadag.’—Eklesiastes 5:10.
Nge ga’ fan e girdi’ u wan’um, ma gathi chugum. Bin riyul’ riy e, bay boch e chugum nib t’uf rodad. Machane chugum e dabiyog ni nge t’ufegdad ara pining e magar ngodad, ya yigoo girdi’ e rayog ni nge rin’ e re n’ey. Faanra bay e bin riyul’ e ‘fager’ rodad, ma aram e rayog ni nge ayuwegdad ni nge fel’ u wan’dad e tin ni bay rodad.—Proverbs 17:17.
RAYOG NI NGE FEL’ BOCH E PAR RODAD E NGIYAL’ NEY NI FAAN GAD RA FOL KO FONOW U BIBLE
MU ATHAMGIL U NAP’AN NI KAM M’AR
Be gaar e Bible: “Faanra ga ba felfelan’ ni ga ma par ma ba falay nga fithik’ i dowam.”—Proverbs 17:22, BT.
Felfelan’ e bod “ba falay” nib manigil nrayog ni nge ayuwegdad ni ngad athamgilgad u nap’an ni kad m’argad. Machane uw rogon ni ngad felfelan’gad u nap’an ni kad m’argad?
Um pining e magar u lanin’um. Faanra yigoo magawon rodad e gad be lemnag, ma aram e dariy ba ngiyal’ nra fel’ e “par” rodad. (Proverbs 15:15, BT) Machane be yog e Bible ni ngaun ‘pining e magar’ u lanin’uy. (Kolose 3:15) Mu guy rogon ni ngaum pining e magar u lanin’um u gubin ban’en nib muun e tin nib achig ban’en ngay. Yal’ ni ke aw nrib fel’ yaan, ara nifeng ni be thoydad nib fel’ gelngin, ara be’ nib t’uf rodad ni ke siminmin e ra gelnag e felfelan’ rodad.
Um rin’ boch ban’en ni fan ngak boch e girdi’. Yugu aram rogon ni kad m’argad, machane ‘ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngodad.’ (Acts 20:35) Nap’an nra pining e girdi’ e magar ngodad ko n’en ni kad rin’ed, ma gad ma felfelan’ maku ma ayuwegdad ni nge dab kud pared ni yigoo magawon rodad e gad be lemnag. Rayog ni nge fel’ boch e par rodad ni faan gad ra ayuweg yugu boch e girdi’ ni ngki fel’ e par rorad.
NGE GEL E THA’ U THILIN E PIIN MABGOL
Be gaar e Bible: “Ngam mel’eged e tin ir e th’abi ga’ fan.”—Filippi 1:10, NW.
Piin mabgol ndarur ted e tayim ni ngaur rin’ed boch ban’en u taabang e rayog ni nge kireb e tha’ u thilrad. Piin figirngiy nge piin leengiy e susun ni ngar ted ni mabgol rorad e reb e ban’en nrib ga’ fan u lan e yafos rorad.
Um rin’ew boch ban’en u taabang. Mu tanomnagew ni ngam rin’ew boch ban’en u taabang. Be gaar e Bible: “L’agruw e ba fel’ ko taareb.” (Eklesiastes 4:9, BT) Rayog ni ngam lumgow u taabang, ara um rin’ew boch ban’en u taabang nib chamag ngomew, ara um toffangow ma gimew be garbod u taabang, ara um rin’ew boch ban’en ni ngam felfelan’gow ngay.
Mu t’ufeg e en mabgol rom. Be pi’ e Bible e athamgil nga laniyan’ e piin mabgol ni nge bagayad me t’ufeg bagayad ma be tayfan. (Efesus 5:28, 33) Faan yow ra sap ngorow mi yow siminmin, fa ra gumuchmuchgow, ara pi’ bagayow bochi tow’ath ngak bagayow, ma aram e rayog ni nge gel e tha’ ko mabgol rorow. Ma par ko pumoon nge ppin e kemus ni fan ko piin mabgol.—Hebrews 13:4.