Ga Ma Fith Ko Mini’ e Ku Baadag?

Faanra ga be fil e Bible ku be’, mang ndabmu fith nfaanra bay reb e fager rok ara girdi’ rok ni ku baadag ni nge nang e thin ko Bible? Baga’ ni yima yog boch e ngochol. Faanra fel’ u wan’ fare Bible study, ma rayog ni ngam mog fithingan ko ngiyal’ ni ngam man i guy ma ga fith nfaanra baadag ni nge fil e Bible. Rayog ni ngam gaar, “Ke falfalan’ [Fithingan e Bible study rom] ko fol Bible, ma ke lemnag ni sana ku ga baadag ni nge fel’ rogom ko fol Bible ndariy puluwon.” Ma ga dag rogon e fol Bible ni ngam fil e babyor ni Knowledge ara Rayog ni Ngam Par ni Gab Fas u Paradis u Fayleng.

Faanra mon’og iyan reb e Bible study rom, ma rayog ni ngam pi’ e athamgil nga laniyan’ ni nge weliy murung’agen e fol Bible ngak e pi fager rok nge girdien e tabinaw rok ni sana yad baadag e machib. Rayog ni nge piningrad ngar uned ko fol Bible rok. Faanra ba magawon riy, ma rayog ni nge yarmiy ni ngar mada’naged gur ngam dag rogon e fol Bible ngorad. Aram rogon ni yibe pi’ e athamgil nga laniyan’ ni nge wereg e tin ni ke fil ko Bible ngak yugu girdi’.

Maku piin ni ga ma sul ngorad ni yad e return visit e ku rayog ni ngar tamilangnaged fithingan’ yugu girdi’ ni baadag e machib, ni yugu aram rogon ndawori un ko fol Bible. Faan ga ra pi’ e babyor ni Knowledge ara Rayog ni Ngam Par ni Gab Fas u Paradis u Fayleng ngak, ma rayog ni ngam fith ni ngam gaar, “Ga manang be’ ni ku ra falfalan’ ni nge yog e re ke babyor ney ngak fa?”

Ke chugur ko tomur, ere gad baadag ni ngad ayuweged gubin e girdi’ nrayog rodad ngar rung’aged mar folgad ko fare thin nib fel’. Ere ga ma fith ko mini’ e ku baadag e machib?