Lal e Kanawo’ ni Ngan Pirieg Be’ ni Baadag ni Ngan Fil e Bible Ngak
1. Faanra mo’maw’ ni ngad pirieged be’ ni baadag ni ngad filed e Bible ngak u lan e pi binaw ni gad ma machib riy, ma mang e thingar da rin’ed, ma mang fan?
1 Gur, kam pirieg nib mo’maw’ ngom ni ngam gay be’ ni baadag ni ngam fil e Bible ngak? Dab mu tal i gay. Ma tow’athnag Jehovah e piin ndab ra talgad i rin’ e tin nib m’agan’ ngay. (Gal. 6:9) Bay lal e kanawo’ nra ayuwegem.
2. Mang deer e rayog ni ngad fithed be’ nge yag ni ngad tababnaged e fol Bible ngak?
2 Ngan Fith Be’ ko Baadag ni Ngan Fil e Bible Ngak, Fa Danga’: Boor e girdi’ ni yad manang ni gad ma pi’ Fare Wulyang ko Damit nge Awake! ngak e girdi’, machane sana dar nanged ni gad ma ognag e fol Bible. Ere mang fan ndab da fithed yad ko yad baadag ni ngad filed e Bible ngorad u nap’an ni gad be machib u mit e tabinaw i yan? Maku rayog ni ngad fithed e piin gad ma sul ngorad ko yad baadag ni ngar filed e Bible fa danga’. Faanra dubrad, ma rayog ni ngam ulul i pi’ boch e babyor ngak ma ngaum pi’ e athamgil nga lanin’rad. Boor e duw ni ke yan ni reb e walag ni pumoon e ma pi’ e magazine ngak ba wu’ i mabgol. Tomuren ni ke pi’ boch e bin th’abi beech e magazine ngorow me chel ni nge chuw machane ke yib ngan’ ni nge fith ngorow ni gaar: “Gimew baadag ni ngam filew e Bible, fa?” Ma ka rognew ni yow baadag, ere ke gin ngay. Chiney e kan taufenagrow.
3. Gur, ba fel’ ni ngad lemnaged ni piin ni ma un ko muulung ndawor ni taufenagrad e bay be’ ni be fil e Bible ngorad, fa? Mu weliy.
3 Girdi’ ni Yad Ma Un ko Muulung: Dab mu lemnag ni piin ni ma un ko muulung ndawor ra uned ko taufe e yad urngin ma bay be’ ni be fil e Bible ngorad. Reb e walag e ke yog ni gaar: “Ba chugur i gubin e girdi’ ni kug fil e Bible ngorad e kug non ngorad u nap’an ni kar uned ko muulung.” Reb e walag ni ppin e ke dugliy ni nge non ngak reb e pin nib tamra’ u nap’an e muulung. Re pin nem e bay l’agruw e bitir rok ni ppin ni yow be chag ko re ulung nem ma kan taufenagrow. Sogonap’an 15 e duw ni ma un e re pin nem ko muulung ma gubin ngiyal’ ni ma yib nga Kingdom Hall ko ngiyal’ ni kefin ni tabab e muulung, ma nap’an nra m’ay e muulung me chuw. Ke adag e cha’ nem ni ngan fil e Bible ngak me munmun ma ke un ko taufe. Me yoloy fare walag ni ppin ni gaar: “Ke kireban’ug ni kug sonnag ni nge yan 15 e duw ma fin gu fith ko baadag ni ngan fil e Bible ngak fa danga’!”
4. Uw rogon nra ayuwegdad ni ngad pirieged be’ ni baadag ni ngan fil e Bible ngak nfaanra ngad fithed be’?
4 Ngan Fith Be’ ko Bay Be’ ni Manang ni Baadag e Machib, Fa: Reb e walag ni ppin e ke athamgil ni nge un ngak boch e girdi’ ko ngiyal’ ni nga ranod ngar filed e Bible ngak e girdi’. Tomuren e fol Bible ma ma fith e cha’ nem ngak faen ni yibe fil e Bible ngak ko bay be’ ni manang ni ku baadag ni ngan fil e Bible ngak, fa. Nap’an ni ga ra pi’ fare babyor ni Mang e Ri Be Fil e Bible? ngak be’ ni ga be machibnag, ma rayog ni ngam fith ni nge lungum: “Bay be’ ni ga manang ni ku baadag ni nge yag ba ken ngak?” Yu ngiyal’ ma dabiyog rok boch e publisher ara pioneer ni ngar filed e Bible ngak be’ ni kar mada’naged u nap’an ni kar uned ko machib. Ere ba fel’ ni nga mog ngak e pi walag nrayog ni ngam fil e Bible ngak boch e girdi’.
5. Mang fan nib fel’ ni ngad fithed e piin mabgol rok e pi walagdad ni gathi tapigpig rok Got ko baadag ni ngan fil e Bible ngorad?
5 Piin Figirngiy ara Leengiy nde Mich Got u Wan’rad: Gur, bay boch e walag u lan e ulung rom ni en mabgol rorad e gathi tapigpig rok Jehovah? Boch i yad e dubrad ni ngar nonad e en mabgol rorad u murung’agen e Bible machane yad baadag ni bay be’ ni gathi girdien e tabinaw rorad ni nge fil e Bible ngorad. Ma ba ga’ nib fel’ ni ngan fith ban’en ngak e en mabgol rorad ni yad be pigpig ngak Got nge yag ni ngan nang ko uw rogon ni nga non ngorad.
6. Uw feni ga’ fan e meybil u nap’an ni ga be gay be’ ni baadag ni ngam fil e Bible ngak?
6 Meybil: Dab mu lemnag ni dabi ayuwegem e meybil. (Jas. 5:16) Ke micheg Jehovah nra pi’ e pi n’en ni gad ra ning ngak nfaanra gad ra ning ban’en nib puluw ko tin nib m’agan’ ngay. (1 John 5:14) Reb e walag ni pumoon nri boor e maruwel rok e ke yibilay ni nge pirieg be’ ni nge fil e Bible ngak. Ke maruwaran’ e ppin rok ko rayog ni nge pirieg e tayim ni nge ayuweg be’ ni baadag e machib nib ga’ nfaanra boor e magawon ko cha’ nem. Ere ke meybil ngak Jehovah ni nge pirieg e pumoon rok be’ nrayog ni nge fil e Bible ngak. Kan fulweg taban e meybil rorow u tomuren l’agruw e wik, ya reb e walag ni pioneer u lan e ulung e ke pirieg be’ ni baadag e machib me yog ngak e pumoon rok ni baadag ni ir e ra fil e Bible ngak e cha’ nem. Ke yoloy fare pin rok ni gaar: “Piin ni yad be lemnag nri dariy e tayim rorad ni ngar filed e Bible ngak be’ e nggog ngorad ni nge lungug: “Ngam weliy ban’en ngak Got nib tamilang, ma dab mu tal i meybil ngak. Rib gel e felfelan’ ni ke yib ngomow.” Ere ku rayog ni ngam pirieg be’ ni baadag ni ngam fil e Bible ngak ma ga ra felfelan’ ni ngam ayuweg ni nge yan ko fare “garog ko yafos.”—Matt. 7:13, 14.