Machib Rodad—Ba Maruwel nib Runguy
1 Yog Jesus ni boor e girdi’ ni ur motoyilgad ko pi thin rok e “kar pired ni ke magafan’rad ndar nanged e n’en ni ngar rin’ed, ya yad bod e saf nde moy rorad e en ni ma gafaliyrad.” (Matt. 9:36) I runguyrad, mi fil e pi motochiyel rok Jehovah ngorad, mi fl’eg lanin’rad, mi machibnagrad ko tirok Got ban’en nib t’uf rorad. Nap’an e ngiyal’ ni gad be fl’eg i lemnag kanawoen, ma ra aw nga dakendad ni ngad tafinaynaged ni bod Jesus, ma yira guy e runguy rodad u nap’an ni ngad darod ko machib u mit e tabinaw.
2 Nga mu tiyan’um nga rogon ni i rin’ Jesus ngak e girdi’ ni ri ba t’uf e ayuw rorad ni kar bad ngak. (Luke 5:12, 13; 8:43-48) I lemnag e girdi’ ni ri ba t’uf e ayuw rorad. (Mark 7:31-35) I lemnag e tafinay rok e girdi’ mi dag ni baadag ni nge ayuwegrad. Gathi goo tin nrayog ni nge guy u p’eowchen ni i lemnag. (Luke 7:36-40) Dabi siy ni i dag Jesus e runguy rok Got.
3 “Me Taganan’ Ngorad”: De maruweliy Jesus e machib rok ni bochan e aram e maruwel ni mmil fan ngak. I “taganan’” ngak e girdi’. (Mark 6:34) Ku aram rogon e ngiyal’ ney, gathi ke mus ni gad be wereg e thin machane gad be guy rogon ni ngad ayuweged e yafos rok e girdi’. Mu guy rogon ni ngam nang ko mang fan ni be fulweg e girdi’ u rogon ni yad be rin’. Mang e be magafan’rad ngay? Ke n’agrad pi tachugol saf ko pi yurba’ i teliw fa? Faan gad ra dag ni gad baadag ni ngad ayuweged yad ma rayog ni nge k’aringrad ngar motoyilgad ko fare thin nib fel’.—2 Kor. 6:4, 6.
4 Runguy e ma k’aring gum’ercha’ey. Ya amu lemnag: Kari kireban’ reb e ppin ni bochan e ke yim’ e bitir rok ni dalip e duw rok. Nap’an e ngiyal’ ni yib l’agruw e Mich ko tabinaw rok, ke piningrow ngar bow nga lan e naun ya baadag ni nge togopuluw ngorow ko mang fan ni ma pag Got e gafgow. Machane yog fare ppin u tomur riy ni gaar: “Kar ted telrow ngog ma kar runguyew gag, ma nap’an ni kar chuwgow, ke fel’an’ug ni ngar sulow biyay.” Ga ma athamgil ni ngam dag e runguy ngak gubin e girdi’ ni ga ma mada’nag ko machib u mit e tabinaw fa?
5 Faan gad ra maruweliy e runguy ma ra ayuwegdad ngad fl’eged laniyan’ e girdi’. Ra ngad rin’ed ma kad n’ufed e “Chitamangiy nrib tarunguy e girdi’,” ni Jehovah.—2 Kor. 1:3.