Kan K’aringem Ni Ngam Rin’ Ban’en Ni Bod Jesus Kakrom?
“Ma nap’an ni chuw u bowoch nge yan nga daken e binaw, me guy e girdi’ ni pire’ ni pire’ me ri taganan’ ngorad, ya yad bod e saf ni de moy e en ni ma gafaliyrad rorad. Ma aram me tabab i machibnag boor ban’en ngorad.”—MARK 6:34.
1. Mang ni mmom ni ngan nang ko mang fan ni boch e girdi’ e ma dag e ngongol nib fel’?
NAP’AN ni ke yan e tayim ma boor e girdi’ ni kar daged e pi ngongol ney nib fel’. Ga ra nang ko mang fan. Jehovah ni Got e bay e pi felngin nib fel’ ney rok ma ma dag e re n’ey ni bod e t’ufeg, nge gol, ma baadag ni nge pi’ ban’en ngak be’, nge yugu boch e felngin ni gad ma tay fan. Kan sunmiy e girdi’ ni bod yaan Got. Ere gad manang ko mang fan ni boor e girdi’ ni ma dag e t’ufeg, mab gol, mab ta runguyey, nge yugu boch e felngin ni be dag ni bay ko nangan’ rorad. (Genesis 1:26; Romans 2:14, 15) Machane, sana rayog ni ngam guy ni yugu boch e girdi’ e ba papey ni ngar daged e pi felngin nem ko yugu boch e girdi’.
2. Mang boch e maruwel ni rayog ni nge rin’ boch e girdi’, ni sana yad be lemnag ni yad be folwok rok Kristus?
2 Sana ga manang boch e pumoon nge ppin ni ma ayuweg e girdi’ nib m’ar u gubin ngiyal’, ma ma dag ni yad be runguy e piin ni bay thibngin downgirad, nge piin ni ma pi’ boch ban’en ngak e piin nib gafgow. Maku, ngam lemnag boch e girdi’ ni kar ognaged yad ni ngar maruwelgad u bang ni bod tafen e daraw ara tafen e piin ni dakuriy e gallabthir rorad ni bochan ni kar runguyed yad, nge piin ni yad be maruwel u hospitals ara tafen e piin nib m’ar, ara girdi’ ni ma athamgil ni ngar ayuweged e piin ni dakuriy e naun rorad fa piin ni kar milgad kar n’aged e nam rorad. Sana, bochi yad e yad be lemnag ni yad be folwok rok Jesus, ni ir be’ ni ke dag rogon e par ko piin Kristiano. Rayog ni ngada bieged boch e thin u lan e pi Gospel ni ke golnag Kristus e piin nib m’ar nge piin ni ke yib e bilig ngorad. (Mark 1:34; 8:1-9; Luke 4:40) Bochan ni ke dag Jesus e t’ufeg rok, nge ir be’ nib gol, mab mu runguy ma be dag e re n’ey ni aram “fare lem rok Kristus,” ni ir be’ ni be folwok rok e Chitamangin nu tharmiy.—1 Corinthians 2:16.
3. Rayog ni nge yog ngodad e lem nib thabthabel u murung’agen e pi maruwel rok Jesus nib fel’, ma mang e susun ni ngada lemnaged?
3 Machane, kam guy e chiney ni boor ko piin nib fel’ uwan’rad e t’ufeg nge runguy ni ke dag Jesus e kar paged talin e tin ni baga’ fan ko lem rok Kristus? Ma rayog ni nge tamilang uwan’dad e re n’ey ni faan gad ra fil nib fel’ rogon e pi thin ni bay ko Mark guruy ni 6. Ma rayog ni ngad bieged boch e thin ko re guruy ney ni be weliy ni ke fek e girdi’ e piin nib m’ar ngak Jesus ni nge golnagrad. Ma boch e thin riy, e be fil ngodad ni nap’an ni ke guy Jesus bokum biyu e girdi’ ni ke yib e bilig ngorad me fal’eg e maangang ni nge duruiyrad. (Mark 6:35-44, 54-56) Bochan ni ke golnag Jesus e girdi’ nib m’ar ku ke duruiy e girdi’ ni ke yib e bilig ngak ma be dag ni ri ma runguy e girdi’, machane ereray e bin som’on e kanawo’ ni ke ayuweg Jesus yugu boch e girdi’? Ma uwrogon ni rayog ni ngad folwokgad rok Jesus u rogon ni ke dag e t’ufeg, nge gol, nge runguy ngak e girdi’, ni yug aram rogon ni ke folwok rok Jehovah?
Kan K’aring ni nge Ayuweg Be’ ko Tirok Got Ban’en
4. Uwrarogon salpen e girdi’ nrogon ni yog ko Mark 6:30-34?
4 Som’on e tapgin ni i runguy Jesus e girdi’ ni ur moyed u tooben e bochan ni ba t’uf rorad e tirok Got ban’en. Aram e pi n’en ni ri baga’ fan ni nge yog ngorad nib m’on ko ggan. Ngam mu lemnag e pi thin ni bay ko Mark 6:30-34. N’en ni kan yoloy ko re guruy ney e ke buch u l’ay u Galilee, ma ngiyal’ nem e ke chuchugur fare Paluk’af ko duw ni 32 C.E. Ba falfalan’ e pi apostal rok, ma bay tapgin nib fel’. Kayug fin ra mu’gad ko milekag ni kar ted ko binaw ni baga’, ma kar bad ngak Jesus, ma dariy e maruwar riy ni yad baadag ni nga rogned ngak e n’en ni ke buch ngorad. Machane, boor e girdi’ e kar muulunggad. Ma kaygi yoor e girdi’ arfan ni dabkiyog ni nge abich ara toffan e pi gachalpen Jesus. Ke yog Jesus ngak e pi apostal rok: “Mmarod nga darod nga bang ni dariy be’ riy nga yugu mtoffangad buchuw.” (Mark 6:31) Kar ranod ko bowoch, sana bang nib chuchugur nga Kapernaum e ram, ma kar th’abed fare Day nu Galilee mi yad taw ko gin ni buchuw lingan ban’en ni ma yib riy. Machane ke mil e girdi’ ni pire’ u l’ay ma kar tawgad nga ram ni yad ba m’on ko bowoch rorad. Mang e i rin’ Jesus ni bochan? Ke yib e damumuw ngak ni bochan ni dabiyog ni ngar pared ni goo yad? Ri danga’!
5. Mang e be thamiy Jesus ko ngiyal’ ni ke chuchugur e girdi’ ni boor ngak, ma mang e ke rin’ ni bochan?
5 Nap’an ni ke guy Jesus bokum biyu’ e girdi’, ma ba muun ngay e piin nib m’ar, ni yad be sonnag me ri taganan’ ngorad. (Matthew 14:14; Mark 6:44) Be weliy Mark ko mang e ke k’aring Jesus ni nge runguyrad ma mang e Ke rin’ ni bochan, me yoloy ni gaar: “Me guy e girdi’ ni pire’ ni pire’, me ri taganan’ ngorad, ya yad bod e saf ndemoy e en ni ma gafaliyrad rorad. Ma aram me tabab i machibnag boor ban’en ngorad.” (Mark 6:34) Gathi goo ke guy Jesus e girdi’ ni pire’. Ke guy boch e girdi’ nib t’uf rorad e tirok Got ban’en. Yad bod e pi saf ni kar sorgad nga bang ma dariy ban’en ni rayog ni ngara rin’ed, ya dariy e en ni be gafaliyrad rorad ni nge pow’iyrad nga ranod nga bang ni boor e pan riy ni ngar ked ma ra ayuwegrad. Ma nang Jesus ni pi tayugang ko teliw ni yad e piin ni dariy fan e girdi’ u wan’rad, ma susun ni ngar manged pi tachugol saf ni ma runguy e girdi’, machane kara gathibthibnaged e yug girdi’ ma dan ayuwegrad ko tirok Got ban’en ni aram e n’en nib t’uf rorad. (Ezekiel 34:2-4; John 7:47-49) Ba thil e kanawo’ u rogon ni ke ayuwegrad Jesus, ya ke rin’ e n’en ni aram e bin thabi fel’ ni fan ngorad. Me tabab i machibnag ngorad murung’agen Gil’ilungun Got.
6, 7. (a) Mang e be weliy fapi gospel ni be dag e n’en ni ma rin’ Jesus e ba t’uf ko girdi’? (b) Mang e ke k’aring Jesus ni nge un ko machib ma nge fil ngak e girdi’ boch ban’en?
6 Ngam guy nga yu yang u Bible ni ku be weliy e re n’en n’ey riy ko uwrogon e yaram ko boch e thin riy nge rogon ni kan dag uroy e tin ni baga’ fan. I Luke e ke yoloy e pi thin nem, ma ir reb e togta ma baadag ni nge ayuweg e girdi’ ni nge par nib fel’ fithik’ i dowrad. “Ma faani rung’ag fapi girdi’ murung’agen mi yad lek [Jesus]. Me pagrad ngar pired rok, mi i weliy ngorad murung’agen e gagiyeg rok Got ma be golnag e piin nib mm’ar.” (Luke 9:11; Colossians 4:14) Gathi urngin e thin nu Bible ni be weliy murung’agen e maangang ni kan rin’ ni aray rogon, machane uroy, mang e n’en nib m’on ko pi thin ni ke yoloy Luke? Ireray e thin nib riyul’ ni be dag ni ke machibnag Jesus e girdi’.
7 Ba puluw e re n’ey ko thin ni kan weliy ni bay ko Mark 6:34. Re verse nem e be dag nib tamilang ko uwrogon ni kan k’aring ni nge dag e runguy rok ngak e girdi’. Ke fil Jesus ban’en ngak e girdi’, ni nge ayuwegrad ko tirok Got ban’en ni aram e n’en nib t’uf rorad. Dawori n’uw nap’an nga tomren ni ke tabab Jesus ko machib, me gaar: “Dabi siy ni ngku gu machibnag u boch e binaw i yan fare Thin nib Fel’ ni murung’agen e gagiyeg rok Got, ya ke l’ugeg Got ku gub ni ereray e n’en ni nggu rin’.” (Luke 4:43) Machane, kad olobochgad nfaan gad ra lemnag ni i wereg Jesus e pi thin ney nib m’ag ko Gil’ilungun Got ni ke mus ni bochan nib mil fan ngak, fare maruwel ni ngan wereg e thin rok Got ya dabisiy ni ngari rin’. Danga’, ya t’ufeg rok ko girdi’ e ir e ke k’aring ni nge machibnag e thin nib fel’ ngorad. Fare n’en ni th’abi fel’ ni rayog ni nge rin’ Jesus ni fan ngorad—ni mus ni piin nib m’ar, nge piin ni ke ying e moonyan’ ngorad, nge piin nib gafgow, ara piin ni ke yib e bilig ngorad—e nge ayuwegrad ni ngar nanged fan, ma nge fel’ uwan’rad, ma nge t’uf rorad fare thin riyul’ ni murung’agen Gil’ilungun Got. Fare thin riyul’ e ri baga’ fan ya fare Gil’ilungun Got e ir e ra n’uf mat’awen Jehovah ma yira taw’athnag e girdi’ ni dariy n’umngin nap’an ni bochan.
8. Uw rogon u wan’ Jesus e machib nge fil ban’en ngak be’ ni ma tay?
8 Fan ni ke yib Jesus nga fayleng som’on e nge machibnag murung’agen Gil’ilungun’ Got. Ngiyal’ ni ke chuchugur ni nge m’ay e machib ni i tay Jesus u fayleng, me gaar ngak Pilate: “Ni gargelnigeg ngaray nga fayleng nbochan e nggu weliy murung’agen e tin riyul’. En ni girdien e tin riyul’ e ra rung’ag e thin ni gu be yog.” (John 18:37) Kad filed ko l’agruw e article ni Jesus e ir be’ nib tarunguyey—ma ma lemnag yugu boch e girdi’, mom ni ngan chuchugur ngak, nge ma pagan’ ku yugu boch e girdi’, ma n’en ni th’abi ga’ fan riy e ri ma dag e t’ufeg rok. Ba t’uf ni ngad nanged e pi ngongol rok Kristus nem ni nge tamilang uwan’dad fare lem rok. Maku baga’fan ni ngan nang ni lem rok Kristus e ba muun ngay e tin ni baaray ni fare maruwel ni ngan machibnag nge ngan fil e thin rok Got ngak be’ ya nge m’on u wan’.
Ke Yog ngak Yugu Boch e Girdi’ ni Ngar Machibgad
9. Mini’ e susun ni nge rin’ fare maruwel ni ngan machibnag nge ngan fil e thin rok Got ngak be’ ngan m’oneg ko boch ban’en?
9 Ngan un ko machib nge ngan fil e thin nu Bible ngak be’—ni fan ni ngan dag e t’ufeg nge runguy ngorad—e gathi aram e maruwel ni kemus ni fan ku Jesus. Ma yog ngak pi gachalpen ni ngar folgad ko ngongol rok, nge pi n’en ni ma rin’ nge m’on ko yugu ban’en, nge rogon ni ma rin’ ban’en. Bod rogon fare tayim u tomren ni ke mel’eg Jesus fa 12 e apostal rok, ma mang e susun ni ngara rin’ed? Mark 3:14, 15 e be weliy ngodad ni gaar: “Ke mel’eg ragag nge l’agruw e girdi’, ma ke pining fithingrad ni ‘pi apostal,’ ni ngar chaggad ngak ma rayog ni nge l’ugrad ni ngar machibgad ma nge yog ngorad mat’awrad ni ngar tulufed e pi moonyan’.” Kam guy ban’en ni thingari rin’ e pi apostal ni nge m’on ko yafas rorad?
10, 11. (a) Nap’an ni ke l’og Jesus e pi apostal rok, ma mang e ke yog ngorad ni ngar rin’ed? (b) Nap’an ni kan l’og e pi apostal ni ngar ranod nga bayang ma mang e susun ni ngara tiyan’rad ngay?
10 Me munmun, ma ke pi’ Jesus ngak fa 12 e apostal rok gelngirad ni ngar golnaged yugu boch e girdi’ nge ngan tuluf e pi moonyan’ rorad. (Matthew 10:1; Luke 9:1) Ngemu’ me l’ograd ni ngar machibnaged e girdi’ nu Israel ni yad e “piin ni kar maloggad ni bod e saf ni ke malog.” Ni fan ni ngar rin’ed e mang? Ke tay Jesus chilen ngorad ni gaar: “Marod ngam machibgad ni nge lungumed, ‘Gagiyeg rok Got e ke chugur.’ Mi gimed golnag e piin ni yad mma’r, mi gimed faseg e yam’, mi gimed chuweg e daraw u downgin e piin ni yad ba daraw, mi gimed tuluf e moonyan’ ngar chuwgad ko piin ni ke ying e moonyan’ ngorad.” (Matthew 10:5-8; Luke 9:2) Mang e riyul’ ni kara rin’ed? “Ma aram ma ranod nguur [1] machibnaged iyan ndabi siy ni nge pi’ e girdi’ keru’rad ko denen ni yad be rin’; ma [2] boor e moonyan’ nra tulufed ngar chuwgad u fithik’ e piin ni kar yinggad ngorad, ma boor e girdi’ ni yad mm’ar nra liyfed e gapgep nga dowrad ngar golgad.”—Mark 6:12, 13.
11 Bochan ni gathi gubin ngiyal’ ni fare maruwel ni ngan fil ban’en ngak be’ e kan yoloy nib m’on ko boch ban’en, ara ba pag rogon ni ngan weliy ni pi thin ni bay u lang e be dag e ngongol nib m’ag ngay ni susun ni ngan rin’ nib m’on nga boch ban’en? (Luke 10:1-9) Dabda dariyfannaged e pi thin ni kan yoloy ni boor yay ni kan tay fare maruwel ni ngan fil ban’en ngak be’ nib m’on ko maruwel ni ngan golnag be’. Ngam guy e pi thin nib chuchugur ko pi verse nem. De n’uw nap’an u m’on ni ke l’og Jesus fa 12 e apostal rok, me taganan’ ni be guy salpen fapi girdi’ ni yoor. Ngada bieged ni gaar: “Ma aram me yan Jesus ko pi binaw i yan, ni binaw ni pire’ e girdi’ riy nge binaw nib lich e girdi’ riy, ngi i machibnagrad u lan tafen e muulung rorad, ni be machibnag e Thin Nib Fel’ ni murung’agen e gagiyeg rok Got, me golnag e girdi’ u urngin mit e liliy nge m’ar. Ma faani guy e pi girdi’ nem ni aram urngirad, me taganan’ ngorad, ya kar pired ni ke magafan’rad ndar nanged e n’en ni ngar rin’ed, ya yad bod e saf nde moy rorad e en ni ma gafaliyrad. Ma aram me gaar ngak pi gachalpen, ‘Woldug ni ngan kunuy ngan tay nga naun e ba ga’ ni ba ga’ yang, machane piin ni ngar maruweliyed nge thap nga naun e ba lich. Mu yibilgad ngak e en ni ir e suwon e re woldug nem ngki pi’ boch girdien e maruwel ngar maruweliyed e re woldug rok nem nge thap nga naun.’”—Matthew 9:35-38.
12. Fapi maangang ni ke fal’eg Jesus nge pi apostal rok e ku kan tay ni fan ko mang?
12 Bochan ni pi apostal e ma chag ngak Kristus, ma rayog ni nge af ngorad fare lem rok Kristus. Rayog ni ngar nanged ni ngan dag e t’ufeg nge runguy nib riyul’ ngak be’ e ba muun ngay fare maruwel ni ngan machibnag nge ngan fil Gil’ilungun Got ngak e girdi’—ni aram e maruwel ni thabi fel’ ko maruwel ni kar ted. N’en nib puluw ko re n’em, e aram fare maruwel ni ngan ayuweg e girdi’ ko n’en nib t’uf nga dowrad, ni bod ni ngan golnag e piin nib m’ar, ma ke yib angin ngorad ni gathi ke mus ni kan ayuweg e girdi’ nib gafgow. Sana rayog ni ngam lemnag, ni boch e girdi’ e karbad ngak ni bochan rayog ni nge golnag e piin nib m’ar ma rayog ni nge duruiyrad u daken e maangang. (Matthew 4:24, 25; 8:16; 9:32, 33; 14:35, 36; John 6:26) Machane, gathi goo kan ayuweg e pi n’en nem ni fan nga dowrad, ya pi nen ni ke rin’ e ke ayuweg yugu boch e girdi’ ni ngar nanged ni Jesus e ir fak Got nge “fare profet” ni ke weliy Moses murung’agen.—John 6:14; Deuteronomy 18:15.
13. Kan yiiynag nra yib “fare profet” ni nge rin’ e mang u rogon ni kanog ko Deuteronomy 18:18?
13 Mang fan ni bay fan ni Jesus e ir “fare profet”? Ya mang e n’en ni kan nog ni fan ko cha’ nem? Ma ra gilbuguwan “fare profet” ni bochan ni nge golnag e girdi’ u fithik’ e maangang fa bochan ni nge pi’ boch e ggan ngak e piin ni ke yib e bilig ngorad? Deuteronomy 18:18 e kan yiiynag: “Bay gu pi’ ngorad ba profet ni bod gur [Moses] ni bayi sum u fithik’ e tirorad e girdi’; bay gog ngak e thin ni nge weliy ngorad, ma bayi weliy ngorad urngin e thin ni ku gog ni ngar rin’ed.” Ere mus ko pi apostal ma kar filed rogon ni nge yog ngorad e ngongol ni ngan dag e runguy nge rogon ni ngar daged e pi n’ey, ma rayog ni ngad dogned ni ku kan dag fare lem rok Kristus ko machib nge fare maruwel ni kar ted ni ngan fil ban’en ngak e girdi’. Ereram e n’en th’abi fel’ ni kar rin’ed ni fan ko girdi’. Ereram e kanawo’, ni nge m’ay e magawon ko piin nib m’ar nge piin nib gafgow ni dariy n’umngin nap’an, ma ra falfalan’ ni gathi ba ngoch nap’an ni bod rogon e yafas ko girdi’ ni falfalan’ ni ma yib ko abich ni kemus ntaareb ara l’agruw yay.—John 6:26-30.
Ngam Maruweliy fare Lem rok Kristus
14. Uwrogon nib m’ag fare n’en ni nge yog e lem rok Kristus ngodad ko maruwel rodad ni ngad machibgad?
14 Dariy bagadad e ra lemnag ni ke mus u nap’an fa bin som’on e chibog ni immoy fare lem rok Kristus—ni bay rok Jesus nge pi gachalpen e re n’ey ma aram i yoloy Paul ni gaar: “Machane gadad e laniyan’ Kristus e bay rodad.” (1 Corinthians 2:16) Ma gad manang ni mil fan ngodad ni ngad wereged fare thin nib fel’ nge ngad filed e Thin rok Got ngak e girdi’. (Matthew 24:14; 28:19, 20) Machane, ffel’ ni ngan lemnag ko mang e ke k’aringdad ni ngad uned ko re maruwel n’ey. Ngada rin’ed e re n’ey ni gathi ke mus ni bochan ni aram e n’en ni thingarda rin’ed. Ba t’uf Got rodad ma aram e n’en ni ke k’aringdad ni ngad uned ko machib, ma riyul’ ni piin ni be fol ku Jesus e susun ir be’ ni kan k’aring ni nge un ko machib ma nge fil boch ban’en ngak e girdi’.—Matthew 22:37-39.
15. Mang fan ni runguy e ir bang ko maruwel rodad ni ngan machib u fithik’ e yoor?
15 Riyul’, ni gathi mmom ni ngan runguy e piin ni der ma un ko michan’ rodad, ma ri aram rogon ni faanra kam mada’nag be’ ni be dariyfannag e machib, ara be’ ni dabi motoyil, ara be togopuluw. Machane, faanra da paged ni nge m’ay e t’ufeg nge runguy rodad ni fan ko girdi’, ma ra m’ay gelngidad ni ngad uned ko machib ni ma tay e pi Kristiano. Ere, uwrogon ni ngad ga’naged e runguy rodad ko girdi’? Rayog ni ngad guyed e girdi’ ni bod rogon ni ma guyrad Jesus ni “ke magafan’rad ndar nanged e n’en ni ngar rin’ed, ya yad bod e saf nde moy rorad e en ni ma gafaliyrad.” (Matthew 9:36) Gathi be weliy e re n’ey nib puluw ko par ko girdi’ ni boor e ngiyal ney? Girdi’ ni kan digeyrad ma be bannagrad e en ni ma gafaliyrad. Ere dar nanged e thin nu Bible ni be dag e kanawo’ nib fel’ ku dar nanged murung’agen e Paradis ni dabki n’uw nap’an ma ra yib nga fayleng u tan Gil’ilungun Got. Kara mada’naged e pi magawon ni ma yib ko girdi’ u gubin e rran—ni bod e gafgow, cham u tabinaw, nge m’ar, nge yam’—ma dariy e athap rorad u tan Gil’ilungun Got. Ba’ rodad e n’en nib t’uf rorad: fare thin nib fel’ u murung’agen Gil’ilungun Got ni kan fal’eg rogon u tharmiy!
16. Mang fan ni gad baadag ni ngada wereged e thin nib fel’ ngak yugu boch e girdi’?
16 Faanra mu fal’eg i lemnag e n’en nib t’uf ko girdi’ u toobem, gathi ra k’aringem e re n’ey ni ngam mog ngorad e tin nib m’agan’ Got ngay ni fan ko girdi’ ni mus mus rogom riy? Arrogon, gad ma un ko re maruwel n’ey u fithik’ e runguy. Faan gad ra fol ku Jesus nrogon ni ma dag e runguy rok ni fan ko girdi’, ma rayog ni ngad daged e re n’ey u lamdad, nge owchdad, nge rogon ni gad ma fil ban’en ngak be’. Pi n’en ney ni urngin e ra ayuweg e girdi’ “nib fel’ e yafas ni manemus u wan’rad” ni ngar adaged e machib ni gad ma wereg ngorad—Acts 13:48.
17. (a) Mang yugu boch e kanawo’ ni rayog ni ngad daged e t’ufeg nge runguy riy ngak yugu boch e girdi’? (b) Mang fan ni gathi ke mus ni ngan mel’eg reb ni aram ngan rin’ e tin nib fel’ ni fan ko girdi’ ara ngan un ko machib u fithik’ e yoor?
17 Yafas rodad ni polo’ e thingar ni dag e t’ufeg nge runguy. Ba muun ngay ni ngada daged ni gad ba gol ko piin ba meewar, nge piin ba m’ar, nge piin nib gafgow—ma ngad rin’ed e n’en ni rayog ni ngad rin’ed ni ngar chuwgad ko gafgow. Ma ba muun ngay ni ngad daged ko thin nge maruwel rodad ni rogon nra m’aynag e kireban’ ko piin ni ke yim’ e girdi’ nib t’uf rorad. (Luke 7:11-15; John 11:33-35) Machane, re t’ufeg nem, nge gol, nge runguy e susun gathi aram e tin nge m’on ko urngin e maruwel rodad, ni bod rogon e n’en ni be rin’ boch e girdi’. Fare n’en ni ri ga’ fan ma angin ni ra yib riy e yira par ni manemus e ngan un ko maruwel ni ngan machibnag e thin rok Got nge ngan fil ban’en ngak be’ ni kan k’aring ko pi ngongol ni kan weliy. Ngam mu lemnag ko mang e ke yog Jesus u murung’agen e pi tayugang ko fare teliw ni Jewish ni gaar: “Ra ban’en nragag guruy ma gimed be 1’ taab guruy ri’ ngak Got ni mus ko pi n’en ni ma fal’eg lamen e ggan ni aram e mint, nge dill, nge cummin, ma damur folgad ko tin ri baga’ fan ni be yog e Motochiyel, ni bod e mat’aw nge runguy nge yul’yul’. Ba fel’ ni gimed ra pi’ taab guruy u ragag guruy e tin ba’ romed, ma dab mpaged e tin nib mat’aw nge runguy nge yul’yul’.” (Matthew 23:23) Gathi ke mus ni ke mel’eg Jesus reb ni nge rin’—ya ku ma ayuweg e girdi’ ko n’en nib t’uf nga downgirad ara nge fil ngorad e tin fan ko tirok Got ni aram e n’en ni ma ayuweg e yafas rorad. Ri i rin’ Jesus ni urngin. Ku, kab tamilang ni fare maruwel rok ni ngan fil ban’en ngak e girdi’ e thabi ga’ fan ya angin ni ra yib riy era ayuweg e girdi’ ni dariy n’umngin nap’an.—John 20:16.
18. Ran lemnag fare lem rok Kristus ma ra k’aringdad ni ngada rin’ed e mang?
18 Ri gad be falfalan’ ya ke dag Jehovah ngodad fare lem rok Kristus! Bochan fapi Gospel, ma rayog ni ngad nanged nib fel’ rogon fare lem, nge rogon ni be thamiy ban’en, nge pi felngin, nge maruwel rok, nge n’en nib m’on ko yafas rok fa en th’abi ga’ ni immoy u fayleng. Ba mil fan ngodad ni faan gad ra bieg, nge ngad fal’eged i lemnag, nge ngada rin’ed e tin ni be dag e Bible u murung’agen Jesus. Dabmu pagtalin, ni faanra ngada boded Jesus, ma thingarda filed rogon ni ngad lemnaged ban’en, nge rogon ni ngad thamiyed ban’en, nge u rogon ni ngan thebthebelnag ban’en ni bod rogon e n’en ni ke rin’, u rogon ni rayog rodad ni gadad e piin ni daworda flontgad. Ere, ngada athamgilgad ni ngada maruweliyed ni nge yog ngodad fare lem rok Kristus ma ngad daged e re n’ey. Dariy yugu reb e par ko girdi’ ni kab fel’ ko re n’ey, ma dariy yugu reb e ngongol ni ngan dag ko girdi’ ni kab fel’ ko re n’ey, ma dariy yugu reb e kanawo’ ni kab fel’ ko re n’ey ni gadad nge yugu boch e girdi’ e gad ra par nib chuchugur ngak e en ni ri bod yaan Jesus, ni Got rodad nib sumunguy, ni Jehovah fithingan.—2 Corinthians 1:3; Hebrews 1:3.
Uwrogon ni Ngam Pi’ e Fulweg?
• Mang gonop ni be pi’ e Bible ko mang e baga’ ni i rin’ Jesus ni fan ko girdi’ nib t’uf e ayuw rorad?
• Mang e ke yog Jesus u nap’an ni be tay chilen ban’en ngak pi gachalpen?
• Uwrogon ni ngad daged “fare lem rok Kristus” ko maruwel rodad?
[Full-page picture on page 29]
[Picture on page 30]
Mang e ba th’abi fel’ nrayog ni nge rin’ e pi Kristiano ngak yugu boch e girdi’?