Kar Daged Rogon e Yul’Yul’
1 Nap’an e duw ni 1937 ma kan tababnag e kanawo’ ko pigpig nib full-time—fare maruwel ko special pioneer. Pi pumoon nge ppin nib salap ko machib ko Kristiano, e kar ranod ko pigpig nga ba yang ni ke mel’eg e ulung. Ngiyal’ ney ma ka be dag e pi special pioneer rogon e kanawo’ nib yul’yul’ ni rayog ni ngan folwok riy.—Heb. 6:12.
2 Ur Maruwelgad nib El Mirin: U tobolngin ma ke maruwel e pi special pioneer nib el mirin ko machib ya ur fanayed e phonograph u ra reb e naun. Maku ur fanayed e recording ni aram kenggin e machib ko ngiyal’ ni ngar sulod ngak e girdi’. Ur rin’ed e re n’ey u lan e pi mach ni baga’ ni immoy e ulung riy. Munmun, ma kan l’og e pi special pioneer nga ba yang ni ri ba t’uf e ayuw riy ko pi tamachib ko Gagiyeg rok Got. Kar sulod ngak e girdi’ ni baadag e machib mar filed e Bible ngorad. Angin e maruwel rorad e kan tababnag in miriay e ulung. Bochan e machib ni ur ted ma ke ayuweg e ulung nge ga’ iyan me mang e ulung ni bay e ngiyal’ ney. (Isa. 60:22) Ka baga’fan e pi special pioneer e ngiyal’ ney ni yad be wereg fare thin nib fel’ “ngak urngin e girdi’ u fayleng.”—Kol. 1:23.
3 Bay Rogorad ni Ngan Folwok Rorad: Ke pag reliw nge in e duw ni be un boch e special pioneer ko machib nib full-time. Nap’an e pi duw nem ma kan yaluweg e michan’ rok e pi pumoon nge ppin ni yad ba yul’yul’ nem ko pi skeng ni yib ngorad. (1 Pet. 1:6, 7) Ur paged boor mit e chugum nib fel’ ni fan ni ngar pigpiggad u ba yang ni ba t’uf e ayuw riy. Boch i yad e kar pillibthirgad ma bay mit e m’ar rorad, ara bay yugu mit e magawon rorad. (2 Kor. 4:16, 17) Machane, “ka be falfalan’rad ko ngiyal’ ni ba wechwech piyan’ lolugrad.” (Ps. 92:14) Kar pagedan’rad ku Jehovah me yib e flaab ngorad.—Ps. 34:8; Prov. 10:22.
4 Dabi siy ni piin ni special pioneer e bay rogorad ni ngan pining e magar ngorad. Faanra bay boch e special pioneer ko ulung rom, mu un ngorad nge fel’ rogom ko salap rorad. Nga mu dag ni gad be tay fan e pigpig ni ur ted ngar yul’yul’gad i wereg e thin nib fel’ u murung’agen e Gagiyeg rok Got. Mu guy rogon ni nge gel iyan e michan’ rom ko pigpig nib mudugil ni ur ted. Gubin e girdi’ ni ra folwok ko michan’ rorad e ku ra par nib fel’ u wan’ Jehovah nge yib e flaab ngorad ya “be felan’ [Got] ngak e piin ni ur yul’yul’gad ngay.”—Prov. 12:22.