Ngam Pag Fam Ma Ra Yog e Flaab Ngom
1. Uw rogon ni i dag David nge Nehemiah e pag fan?
1 Nap’an e ngiyal’ ni i moningnag Goliath e pi salthaw nu Israel, ma rayog rok urngin e salthaw ni nge cham ngak. Machane ba pagal ni ma gafaliy e saf, ni dan fil rogon e cham ngak e ke pag fan ni nge cham ngak. (1 Sam. 17:32) Ma nap’an e ngiyal’ ni i sul piyu Israel nga Jerusalem ma de yog ni nge ubung e yoror riy, ma be’ ni ma pi’ e wain ngak e pilung nu Persia e ke pag fan ni nge pag e maruwel rok u lan e palace me chur nga Jerusalem ni nge yarmiy e maruwel. (Neh. 2:5) Jehovah e i flaabnag gali pumoon ney ni David nge Nehemiah ko pag fan ni kar dagew.—1 Sam. 17:45, 50; Neh. 6:15, 16.
2. Mang fan e susun ni nge dag e Kristiano e pag fan?
2 Ngiyal’ ney ma der ma dag e girdi’ e pag fan. Nap’an e “tin tomren e rran” ney, ma kari boor pa’ u puluwan e girdi’, ma boor i yad e “yad be lemnagrad.” (2 Tim. 3:1, 2) Mmom ni nge tiyan’ be’ ko tin nib t’uf rok ma dabi lemnag ni nge pag fan ko tin nib t’uf rok yugu girdi’. Machane, gadad e piin ni Kristiano ma gad ba adag ni ngad folwokgad rok Jesus, ni i tay ni nge ayuweg yugu boch e girdi’. (John 5:5-9; 13:12-15; 1 Pet. 2:21) Uw rogon nrayog ni ngad daged e pag fan, ma mang flaab nra yog ngodad?
3. Ra ngan pag fan ma uw rogon ni kan ayuweg e muulung?
3 Fan Ko Pi Walagdad: Rayog ni ngad paged fadad ma ngad pied e towath ni “thin rok Got” ngak yugu boch e girdi’ ni ngad pied e fulweg ko muulung ni bay e deeriy riy. (Roma 1:11) Ra ngad pied e fulweg ma kad n’ufed Jehovah, ma ra ayuweg i gelnag e tin riyul’ u wan’dad nge gum’ercha’dad, maku ra yoornag e falfalan’ ko pi muulung. (Ps. 26:12) Ku rayog ni ngad paged fadad ni ngad pied e welthin ko Theocratic Ministry Sukul ko ngiyal’ ndabiyog be’. Re n’ey e ra ayuwegdad ngad monoggad i salap ko machib.
4. Mang boch e kanawo’ ni ngad paged fadad?
4 Pi walag ni pumoon e rayog ni ngar paged farad ngar adaged ni ngar manged e girdi’ ni ngi i tay murung’agen e ulung. (Isa. 32:2; 1 Tim. 3:1) Gubin e girdi’ e rayog ni ngar ayuweged ni nge par e assembly nge convention nib manigil ni ngar paged farad mar uned ko boch e department. Faan gad ra un ngak e circuit overseer ko machib ara ngad pied boch e ggan ni fan ngak, ma angin riy e “ra fel’ rogodad ko michan’ rok ma ra fel’ rogon ko michan’ rodad.” (Roma 1:12) Faan gad ra ayuweg e piin ni fel’ yangaren ni dariy chitamangirad, nge piin ni ke yim’ e pumoon rorad, nge piin nib m’ar, nge pi matin ni bay boor e bitir, nge yugu boch e girdi’ u lan e ulung, ma ra yib e felfelan’ ngodad ma gad ra par ni be felfelan’ Jehovah ngodad.—Prov. 19:17; Acts 20:35.
5. Mang boch ban’en nib m’ag ko Kingdom Hall ni ba t’uf e girdi’ ngar paged farad ngay?
5 Maku yugu reb e kanawo’ ni ngad paged fadad e ngad uned i biechnag e Kingdom Hall. Bochan e be yoor i yan e girdi’ ni be un ko tin riyul’, ba t’uf e tin biech e Kingdom Hall nge girdi’ ni ngar toyed. Reb e magbol e kar pagew farow ni ngar ayuwegew e Regional Building Committee ni yugu aram rogon ndariy e salap rorow ko toy naun. Munmun, kan fil rogon ngorow ma yow be ayuweg e maruwel ko cement block. Ke yog fare ppin ni gaar: “Angin e maruwel ni kug tay ni nggu maruwelgad u taabang e ke gel e fel’ u thilmad. Nap’an e ngiyal’ ni ke m’ay e maruwel u reb e rran, ma ke magaf dowdad machane ke gel lanin’dad ko tirok Got ban’en.”
6. Mang fan e machib e aram e bin ni ba ga’ fan e maruwel nrayog ni ngad paged fadad ngay?
6 Ngan Un ko Machib: Bin ni baga’ fan e maruwel nrayog ni ngad paged fadad ngay ko ngiyal’ ney e aram e ngad machibnaged e Gil’ilungun Got. Nap’an nra tamilang e thin nu Bible u wan’ e girdi’ ngar folgad ngay, ma ra tamilang u wan’rad fan e yafos rorad ma ra ayuwegrad ngar gelgad ko ngongol rorad ni de yal’uw. Maku ra tamilang u wan’rad e athap nu Bible ko par rorad nga m’on. Ra ngad filed e Bible ngak e girdi’, ma ke felfelan’dad ni ngad maruweliyed mit e maruwel ni ba n’uw nap’an ma ra fel’ rogorad riy. (John 17:3; 1 Tim. 4:16) Sana par rodad e ra pag ni ngad yoornaged e machib ni ngad ted ma ngad uned ko pioneer ni ayuw ara regular pioneer, ara ngad churgad nga ba yang ni ri ba t’uf e ayuw riy, ara ngad filed yugu reb e thin nu ba yang.
7. Mang fan ni ri ba ga’ fan ni ngad ognaged gadad e ngiyal’ ney?
7 I yiiynag David ni pilung ni “ra ognag ir” e girdi’ rok Got u nap’an e ngiyal’ nra tabab fare Messiah ko gagiyeg. (Ps. 110:3, ftn.) Bay boor e maruwel nrayog ni ngad ognaged gadad ngay ya be gagiyegnag Jehovah ni nge gur e maruwel ko kunuy wom’engin e tirok Got ban’en. (Isa. 60:22) Kaa mog ni ngam gaar: “Bay gu wan! Mu l’ugeg!”? (Isa. 6:8) Ba riyul’ ni faan gad ra ognag gadad ngay, ma ra felfelan’ Jehovah ma ra yog boor e flaab riy.