Machib e Ra Taydad ni Gad Ba Gel ko Tirok Got Ban’en — LIBRARY U ONLINE ni fan ko Wulyang ko Damit

Machib e Ra Taydad ni Gad Ba Gel ko Tirok Got Ban’en

1. Mang angin e machib ni gad ma un ngay?

¹ Faanra gad ba pasig ko machib ma rayog ni ngad pired ni gad ba gel ko tirok Got ma gad ba felfelan’. Riyul’, ya gad ma un ko machib ni bochan e gad baadag ni ngad felfelan’niged Jehovah. Machane, faan gad ra fol ko fare thin ni kan tay chilen ni aram e ngad ‘machibnaged e thin rok Got’ ma ra tow’athnagdad Jehovah miki yib angin ngodad. (2 Tim. 4:2; Isa. 48:17, 18) Ere, uw rogon nra ayuwegdad e machib ngad pired ni gad ba gel ko tirok Got ma gad ba felfelan’?

2. Mang boch e kanawo’ nra ayuwegdad e machib riy?

² Ke Pi’ Gelngidad ma Ke Ayuwegdad: Machib ni gad ma un ngay e ma ayuwegdad ni nge dabki magafan’dad nib gel ko pi magawon e ngiyal’ ney. Ku ra ayuwegdad ni ngaud lemnaged e pi flaab nra yibnag Gil’ilungun Got. (2 Kor. 4:18) Gad ra weliy e machib nu Bible ko girdi’ ma ra gel e michan’ rodad ko pi n’en ni ke micheg Jehovah miki pagan’dad ko thin rok. (Isa. 65:13, 14) Nap’an ni gad be ayuweg boch e girdi’ ni ngar mon’oggad ko tirok Got mar pired ni yad ba dar ko “fayleng,” maku rayog ni nge ayuwegdad ngkud pired ni gad ba dar ko ngongol nu fayleng.—John 17:14, 16; Rom. 12:2.

3. Uw rogon nra ayuwegdad e machib nga i m’ug fel’ngin e Kristiano rodad?

³ Machib e ku ma ayuwegdad ni ngad maruweliyed pi fel’ngin e Kristiano. Ra yog e sobut’an’ ngodad ni faanra ud folgad ko fare thin ni ngad manged “urngin mit e girdi’ ngak urngin mit e girdi’.” (1 Kor. 9:19-23) Nap’an ni gad be machibnag e girdi’ ni “yad bod e saf nde moy e en ni ma gafaliyrad,” rorad ma rayog ni ngad nanged rogon lanin’rad. (Matt. 9:36) Ra ud k’adedan’dad ko togopluw nge moning ni yima tay ngodad ma ra ayuwegdad ni ngaud athamgilgad. Rra gel e falfalan’ rodad ni faan gad ra fanay e tayim rodad ni fan e ngad ayuweged boch e girdi’.—Acts 20:35.

4. Uw rogon e machib u wan’um?

⁴ Ri gad ba tow’ath ya gad be maruweliy ban’en ni yira pining e sorok riy ngak Got! Machib e ma gelnag e michan’ rodad ma ra yibnag e flaab ngak e piin ni yad ma machibnag fare thin nib mus rogorad riy.—Acts 20:24.