Uw Rogon ni Ngari Mich u Wan’dad e Bin nib Beech e Fayleng ni Ke Micheg Jehovah?

1-2. Mang e ba t’uf ni ngad rin’ed u nap’an ni gad be sonnag e bin nib beech e fayleng?

RIB ga’ fan u wan’dad e n’en ke micheg Jehovah ni aram e ra thang e re m’ag nib kireb ney me yibnag reb e fayleng nib beech nga lon. (2 Pet. 3:13) Yugu aram rogon ndad nanged e ngiyal’ nra buch e re n’ey riy, machane pi n’en be buch u fayleng e be dag ndab ki n’uw nap’an ni ngad songad.​—Matt. 24:32-34, 36; Acts 1:7.

² Machane demtrug n’umngin nap’an ni kad nanged e tin riyul’, ma gad gubin nib t’uf ni ngad guyed rogon ni ngari mich e re n’ey u wan’dad. Mang fan? Ya yugu aram rogon nib gel e michan’ rodad, maku rayog ni nge war. Bin riyul’ riy e yog apostal Paul ni michan’ nde gel e aram e “denen ni ke m’agdad ni ke chichiiy pa’ rodad.” (Heb. 12:1) Ere faanra nge par e michan’ rodad nib gel, mab t’uf ni ngaud pared ma gad be lemnag e pi n’en be micheg ni ke chugur e bin nib beech e fayleng.​—Heb. 11:1.

3. Mang e gad ra weliy ko re article ney?

³ U lan e re article ney e gad ra weliy riy dalip e kanawo’ nrayog ni ngari mich u wan’dad nra yib e bin nib beech e fayleng ni ke micheg Jehovah ni aram e: (1) ngaud fal’eged i lemnag fare biyul, (2) ngaud lemnaged gelngin Jehovah, nge (3) ngaud rin’ed boch ban’en nra chugurnagdad ngak Jehovah. Tomuren ma gad weliy rogon nra gelnag e thin ni yog Jehovah ngak Habakkuk e michan’ rodad e ngiyal’ ney. Machane som’on e ngad weliyed boch ban’en nrayog ni be buch rodad e chiney ni be dag nib t’uf ni ngari mich u wan’dad nra yib e bin nib beech e fayleng ni kan micheg.

BOCH BAN’EN NI MA BUCH NI BE DAG NIB T’UF NI NGE GEL E MICHAN’ RODAD

4. Mang boch ban’en ni gad ma dugliy ni be m’ug riy nib t’uf ni nge gel e michan’ rodad?

⁴ Gubin e rran ni bay boch ban’en ni gad ma dugliy ni be dag nib t’uf ni nge gel e michan’ rodad. Bod ni gad ma dugliy boch ban’en ni bay rogon ko piin gad ma chag ngorad, nge pi n’en gad ma chuweg e chalban rodad ngay, nge skul, nge mabgol, nge bitir, nge maruwel. Ere ba fel’ ni ngad fithed gadad ni nge lungudad, ‘Be m’ug ko pi n’en nug ma mel’eg nib mich u wan’ug ndab ki n’uw nap’an ma bayi chuw e re m’ag ney me yan e bin nib beech e fayleng rok Got nga lon? Fa gu ma mel’eg ni nggu rin’ e pi n’en ni ku ma rin’ e piin nde mich u wan’rad nrayog ni ngar pared ndariy n’umngin nap’an?’ (Matt. 6:19, 20; Luke 12:16-21) Faan gad ra guy rogon ni ngari mich u wan’dad ni ke chugur e bin nib beech e fayleng, ma aram e rayog ni ngaud dugliyed boch ban’en nib fel’ rogon.

5-6. Mang fan nib t’uf ni nge gel e michan’ rodad u nap’an ni gad be mada’nag e magawon? Mu susunnag.

⁵ Ku gad ma mada’nag boch e magawon ni be dag nib t’uf ni nge gel e michan’ rodad. Rayog ni ngaun gafgownagdad, ara yib ba mit e m’ar ngodad nib ubchiya’, ara da mada’naged yugu boch e magawon nrayog ni nge muleg lanin’dad. Som’on e rayog ni ngad lemnaged nrayog ni ngad athamgilgad u fithik’ e pi magawon rodad. Machane mit ney e magawon e ba’ ga’ ni ma par nib n’uw nap’an. Ere ba t’uf ni nge gel e michan’ rodad ya nge yag nda athamgilgad u fithik’, ma gad ulul ko pigpig ni gad be tay ngak Jehovah u fithik’ e felfelan’.​—Rom. 12:12; 1 Pet. 1:6, 7.

⁶ Ra gad be mada’nag reb e magawon, ma rayog ni ngad lemnaged ndabi yib e bin nib beech e fayleng rok Jehovah. Ere gur, re n’ey e be yip’ fan ni ke war e michan’ rodad? Danga’. Am lemnag e re fanathin ni baaray. Faanra ke yan in e wik ni be aw e n’uw, ma rayog ni ngad lemnaged ndab ki mat e yal’. Machane ra munmun me mat e yal’. Ere ku arrogon ni faanra kari mulan’dad, ma rayog ni ngad lemnaged ndabi yib e bin nib beech e fayleng. Machane faanra ba gel e michan’ rodad, ma aram e gad manang nra lebug e pi n’en ke micheg Got. (Ps. 94:3, 14, 15; Heb. 6:17-19) Re n’ey e rayog ni nge ayuwegdad ni ngad ululgad ni ngad m’oneged e liyor ni gad be tay ngak Jehovah u lan e yafos rodad.

7. Mang lem e thingar da kol ayuwgad riy?

⁷ Kub t’uf ni nge gel e michan’ rodad ya nge yag nda rin’ed fare maruwel ni machib. Boor e girdi’ ni gad ma machibnag ni yad ma lemnag ndabi riyul’ fare ‘Thin Nib Fel’’ ni murung’agen e bin nib beech e fayleng rok Got ni bayi yib. (Matt. 24:14; Ezek. 33:32) Thingar da kol ayuwgad ndabi maruwar u wan’dad e n’en be fil Jehovah ngodad ni bod yad. Ere ba t’uf ni ngaud guyed rogon ni ngad gelnaged e michan’ rodad ya nge dabi buch e re n’ey. Ngad weliyed dalip e kanawo’ nrayog ni ngad rin’ed e re n’ey riy.

UM FAL’EG I LEMNAG FARE BIYUL

8-9. Faanra ud fal’eged i lemnag fare biyul, ma mang e ra rin’ ko michan’ rodad?

⁸ Reb e kanawo’ nrayog ni ngad gelnaged e michan’ rodad riy e aram e ngaud fal’eged i lemnag fare biyul. Fare biyul e be micheg ngodad nra riyul’ e pi n’en ke micheg Got. Nap’an ni gad ra fal’eg i lemnag fan nni pi’ fare biyul nge n’en nni pag fan ya nge yag nni pi’, ma aram e rra mich u wan’dad nra riyul’ e n’en ke micheg Got ni aram e ra yag e yafos ni manemus ngodad u lan reb e fayleng ni kab fel’ boch. Mang fan nrayog ni nga dogned e re n’ey?

⁹ Mang e ni pag fan ya nge yag nni pi’ fare biyul? I pi’ Jehovah e bin nganni’ i Fak nrib t’uf rok ma ri kub chugur thilrow u tharmiy nga fayleng ni ngan gargeleg nib girdi’ nib flont. Nap’an ni immoy Jesus u fayleng, ma gubin mit e magawon ni mada’nag. Ngemu’ min gafgownag miki yim’ nib gel e amith ko yam’ ni tay. Ere ri boor ban’en ni pag Jehovah fan! Dabi pag e Got rodad ni gad ba t’uf rok Fak ni nge gafgow me yim’ ni faanra kemus ni nge fel’ e par rodad u lan taaboch ngiyal’. (John 3:16; 1 Pet. 1:18, 19) Bochan ni pi’ Jehovah Fak nrib t’uf rok ni nge ayuwegdad, ma aram fan nra guy rogon ni nge yag e yafos ni manemus ngodad u lan e bin nib beech e fayleng.

UM LEMNAG GELNGIN JEHOVAH

10. Mang e rayog ni nge rin’ Jehovah nrogon ni be yog e Efesus 3:20?

¹⁰ Bin l’agruw e kanawo’ nrayog ni ngad gelnaged e michan’ rodad riy e aram e ngaud lemnaged gelngin Jehovah. Bay gelngin ni nge lebguy urngin ban’en ni ke micheg nra rin’. Riyul’ nrayog ni nge lemnag e girdi’ ndabiyog ni nge lebug e n’en kan micheg u murung’agen e yafos ni manemus u lan e bin nib beech e fayleng. Machane Jehovah e ma micheg boch ban’en ndabiyog ni nge rin’ e girdi’. Ya bin riyul’ riy e ir Got ni Gubin Ma Rayog Rok. (Job 42:2; Mark 10:27) Ere aram fan ndarud gingad u nap’an nra micheg boch ban’en ni yira ngat ngay!​—Mu beeg e Efesus 3:20.

11. Mu weliy reb e ban’en ni micheg Got ni yira ngat ngay. (Mu guy fare kahol ni kenggin e “Boch Ban’en Nni Micheg ni Yira Ngat Ngay ni Lebug.”)

¹¹ Am lemnag boch ban’en ni micheg Jehovah ko girdi’ rok kakrom ni un lemnag ndabiyog ni nge buch. I micheg ngak Abraham nge Sarah ni yow ra fakay bochi pagel u pilibthir. (Gen. 17:15-17) Ki yog ngak Abraham nra tafanay e piin owchen fare nam nu Kanaan. Nap’an e pi duw ni i par piyu Israel ni yad e piin owchen Abraham u Egypt ni yad e sib, mab mudugil ni ur lemnaged ndabi riyul’ e re n’em ni kan micheg. Machane ke riyul’. Boch nga tomuren, me yog Jehovah ngak Elizabeth nra fakay bochi tir ni yugu aram rogon ni ke pilibthir. Ki yog ngak Maria ni be’ ndawori nang e pumoon nra fakay bbitir ni Fak. Re n’ey e ra lebguy e n’en ni micheg u lan fare milay’ nu Eden ni ke yan bokum biyu’ e duw!​—Gen. 3:15.

12. Mang e be micheg e Joshua 23:14 nge Isaiah 55:10, 11 ngodad u murung’agen gelngin Jehovah?

¹² Nap’an ni gad ra lemnag urngin ban’en ni ke micheg Jehovah nge rogon ni ke lebguy, ma aram e rra mich u wan’dad ni bay gelngin ni nge yibnag e bin nib beech e fayleng. (Mu beeg e Joshua 23:14; Isaiah 55:10, 11.) Re n’ey e ra ayuwegdad ni nge bung rogodad ni ngad ayuweged e girdi’ ni nge tamilang u wan’rad ni bin nib beech e fayleng ni kan micheg e gathi ban’en ni yibe athapeg ndabi buch. Nap’an ni weliy Jehovah murung’agen e bin nib beech e lan e lang nge bin nib beech e fayleng, me yog ni gaar: “Pi thin ney e ba riyul’ ma rayog ni ngan pagan’uy ngay.”​—Rev. 21:1, 5.

UM RIN’ E PI N’EN NRA CHUGURNAGEM NGAK JEHOVAH

13. Uw rogon ni ma gel e michan’ rodad u nap’an ni gad ra un ko muulung? Mu tamilangnag.

¹³ Bin dalip e kanawo’ nrayog ni ngad gelnaged e michan’ rodad riy e aram e ngaud rin’ed boch ban’en nra chugurnagdad ngak Jehovah. Am lemnag rogon angin e muulung ni ma yib ngodad. Anna ni ke yoor e duw ni ke machib u polo’ e tayim rok u boch e kanawo’ nib thilthil e yog ni gaar: “Pi muulung nug ma un ngay e aram e n’en ma tay e michan’ rog nib gel. Yugu aram rogon ni faen be pi’ e welthin e gathi rib salap i fil ban’en ko girdi’ ara der ma yog ban’en nib beech, machane ba ga’ nug ma rung’ag ban’en ni ma ayuwegeg ni ngki tamilang boch e Bible u wan’ug. Ma re n’ey e ma gelnag e michan’ rog.”b Ku dariy e maruwar riy ni ma gel e michan’ rodad u nap’an ni gad ra rung’ag e fulweg ni ma pi’ e pi walag u nap’an e muulung.​—Rom. 1:11, 12; 10:17.

14. Uw rogon ni ma gel e michan’ rodad u daken e machib ni gad ma tay?

¹⁴ Ku gad ma gelnag e michan’ rodad u nap’an ni gad ra un ko machib. (Heb. 10:23) Barbara ni ke pag 70 e duw ni ke pigpig ngak Jehovah e yog ni gaar: “Kab kafram i yib nug ma guy nre maruwel ney ni machib e ma gelnag e michan’ rog. Ra ug par nug be weliy ko girdi’ murung’agen e pi n’en nrib manigil ni ke micheg Jehovah, ma aram e ri be gel e michan’ rog.”

15. Uw rogon ni ma gel e michan’ rodad u daken e fol Bible ni gad ma tay ni yigoo gadad? (Kum guy e sasing.)

¹⁵ Ku bay reb e ban’en ni ma gelnag e michan’ rodad ni aram e: fol Bible ni gad ma tay ni yigoo gadad. I yog Susan ni faanra dugliy e ngiyal’ ni nge fil e Bible rok ni yigoo ir ma ma ayuweg. I yog ni gaar: “Ra Madnom mug fil e article ko Wulyang ko Damit ni yira fil ko bin migid e wik. Ma ra yan i Montag nge L’agruw Fen e Maruwel mug fal’eg rogog ni fan ko muulung ni yima tay u lan e wik. Ma tin ka bay e rran e gu ma fil murung’agen ban’en ni kug dugliy ni nggu fil murung’agen.” Bochan ni gubin ngiyal’ ni ma rin’ Susan e re n’ey, ma aram fan ni be yag ni nge ulul ni nga i gel e michan’ rok. Irene ni ke yoor e duw ni ke pigpig ko tochuch rodad e kki pirieg ni pi yiiy u Bible ni ma fil e ma gelnag e michan’ rok. I gaar: “Gu ma ngat nga rogon ni ma lebug gubin ban’en ni ke yiiynag Jehovah ngki mada’ nga nochi ban’en riy nrib achig.”c

“RA YIB I M’UG KO NGIYAL’ NI KUG DUGLIY”

16. Mang fan nra yib angin ngodad e n’en ni micheg Jehovah ngak Habakkuk e ngiyal’ ney? (Hebrews 10:36, 37)

¹⁶ Bay boch e tapigpig rok Jehovah ni ke n’uw nap’an ni kar sonnaged e ngiyal’ ni ngan thang e re m’ag ney. Bay boch e girdi’ ni yad ma lemnag ni ke pag nap’an ma dawori yib e tomur. Machane manang Jehovah rogon laniyan’ e pi tapigpig rok. Bin riyul’ riy e micheg ngak Habakkuk ni profet ni gaar: “Dawori taw nga nap’an ni nge yib i m’ug. Machane ngal’an e be yib nib machreg, ma n’en ni ku gog ngom e bay yib i m’ug. Bay mu lemnag nib sowath ni be yib, machane ngam sonnag; ya ra yib i m’ug ko ngiyal’ ni kug dugliy, ma dabi sowath.” (Hab. 2:3) Pi thin ney ni yog Got e kemus ni yigoo Habakkuk e ra yib angin ngak? Fa ku ra yib angin ngodad e ngiyal’ ney? Ki thagthagnag Jehovah nga laniyan’ apostal Paul ni nge yoloy e pi thin ney ni fan ngak e pi Kristiano ni yad be sonnag e bin nib beech e fayleng. (Mu beeg e Hebrews 10:36, 37.) Arrogon, rayog ni nge pagan’dad ngay ni mus ni faanra gad be lemnag ni be sagaal e ngiyal’ ni ke micheg Jehovah nra ayuweg e yafos rodad, machane ‘ra yib i m’ug ko ngiyal’ ni ke dugliy, ma dabi sowath.’

17. Uw rogon ni fol reb e walag nib pin ko fonow ni pi’ Jehovah ngak Habakkuk?

¹⁷ Bay boch e tapigpig rok Jehovah ni ke yoor e duw ni kar folgad ko fare fonow ni pi’ ni ‘ngar songad.’ Louise e tabab ko pigpig ngak Jehovah u nap’an e duw ni 1939. I yog ni gaar: “Ngiyal’ nem e gu lemnag nra yib e Armageddon u m’on ni nggu chuw u high school. Machane gathi aram e n’en ni buch. Girdi’ ni ug beeg murung’agrad u Bible u lan e pi duw ni ke yan ni ur sonnaged Jehovah ni nge lebguy e pi n’en ke micheg e ke ayuwegeg ni ngkug sonnag Jehovah ni nge lebguy e tin ke micheg. Ug beeg murung’agen Noah, nge Abraham, nge Josef nge yugu boch e girdi’ nib n’uw nap’an ni ur sonnaged Jehovah ni nge tow’athnagrad. Bochan ni gubin ngiyal’ nib mich u wan’mad yugu boch e girdi’ nra lebug e pi n’ey ni kan micheg, ma aram e n’en ke ayuwegmad ni nge mich u wan’mad ni kari chugur e bin nib beech e fayleng.” Ku aray rogon e n’en ma yog boor e girdi’ ni ke n’uw nap’an ni kar pigpiggad ngak Jehovah!

18. Faanra ud fal’eged i yaliy e tin kan sunmiy, ma uw rogon nra mich u wan’dad ni bayi yib e bin nib beech e fayleng?

¹⁸ Riyul’ ndawori yib e bin nib beech e fayleng. Machane mu tay fanam i yan u boch ban’en ni bay ni bod e t’uf, nge gek’iy, nge gamanman, nge girdi’. Dariy be’ nra maruwar u wan’ e pi n’ey ni yugu aram rogon ni immoy ba ngiyal’ ndariy. Bay e pi n’ey e chiney ni bochan e ke sunmiy Jehovah. (Gen. 1:1, 26, 27) Ki micheg e Got rodad nra ngongliy reb e fayleng nib beech ma ra lebguy e re n’ey ni ke micheg. U lan e bin nib beech e fayleng e ra par e girdi’ ni manemus ni ke fel’ fithik’ i dowrad. Rayog ni nge pagan’dad ngay nra yib e bin nib beech e fayleng ko ngiyal’ ni ke dugliy Got.​—Isa. 65:17; Rev. 21:3, 4. 

19. Uw rogon nrayog ni ngam gelnag e michan’ rom?

¹⁹ Chiney ni ga be sonnag e ngiyal’ nem e ngam rin’ urngin ban’en nrayog rom ni ngam gelnag e michan’ rom. Um pining e magar ni bochan fare biyul, ma ga be lemnag gelngin Jehovah, ma ga be rin’ e pi n’en nra chugurnagem ngak. Ga ra rin’ e re n’ey, ma aram e rayog ni ngam mang bagayad e “piin nib mich Kristus u wun’rad ma ba gum’an’rad, ma aram fan ni ke yog ngorad e tin ni yog Got nra pi’.”​—Heb. 6:11, 12; Rom. 5:5.