Mu Fal’eg Rogom ni Ngam Fil e Bible ngak Be’
1. Mang fan ni ngad guyed rogon ni nge ga’ fan e tin riyul’ u wan’ e en ni gad ma fil e Bible ngak?
1 Nap’an ni gad be fil e Bible ngak be’ ma thingar da fal’eged rogodad u m’on riy ya nge yog nda ayuweged nge pigpig ngak Jehovah. Thingar da athamgilgad ni nge ga’ fan e tin riyul’ u wan’ ya aram e n’en nra ayuweg nge mon’og ko tirok Got ban’en. (Deut. 6:5; Prov. 4:23; 1 Kor. 9:26) Uw rogon ni ngad rin’ed e re n’ey?
2. Mang angin e meybil u nap’an ni gad be fal’eg rogodad ni ngad filed e Bible ngak be’?
2 Ngan Meybil Min Fal’eg Rogoy: Ba puluw ni ngad meybilgad ngak Got ni nge ayuweg faen ni gad be fil ngak ni bochan e ir e ra pi’ gelngin ni nge mon’og. (1 Kor. 3:6; Jas. 1:5) Meybil e ku ra ayuwegdad ni ngad nanged rogon ni ngad ‘tamilangnaged laniyan’’ e en ni gad ma fil e Bible ngak nge yog ni nang e tin nib m’agan’ Jehovah ngay.—Kol. 1:9, 10.
3. Mang boch ban’en ni ngad lemnaged u rarogon e en ni gad ma fil e Bible ngak u nap’an ni gad be fal’eg rogodad?
3 Ngan Lemnag Facha’: Manang Jesus nra nge yib angin e machib mab t’uf ni ngan lemnag e girdi’. L’agruw yay nni fith e re deer ni baaray ngak Jesus ni gaar: “Mang e thingar gu rin’ me yog ngog e yafos ndariy n’umngin nap’an?” Ra bayay ma rogon ni fulweg e re deer ney. (Luke 10:25-28; 18:18-20) Ere susun ni ngad lemnaged faen ni gad ma fil e Bible ngak u nap’an ni gad be fal’eg rogodad. Mang thin nu Bible e gad ra beeg ngak? Uw urngin ban’en e gad ra fil ngak u bayay e fol Bible? Mang boch ban’en nib mo’maw’ ni nge nang fan ara ba mo’maw’ ni nge mich u wan’? Faan gad ra lemnag boch e deer nra fith e en ni gad ma fil e Bible ngak ma aram e rayog ni ngad fal’eged rogodad nib fel’ rogon me yib angin.
4. Uw rogon ni ngad fal’eg rogodad nib fel’ rogon?
4 Ngan Sul Nga Daken e Tin ni Ngan Fil: Demtrug urngin yay ni kad filed ban’en ngak yugu boch e girdi’ ma aram e yay nsom’on ni gad ra fil ngak e en ni gad be fil e Bible. Ere rib ga’ fan ni ngad fal’eged rogodad u m’on riy ni faanra nge taw e thin riyul’ nga gum’erchaen facha’. Be yip’ fan e re n’ey ni ngad rin’ed e n’en ni gad ba adag ni nge rin’. Ngad sulod u daken e n’en ni gadad ra fil, ma gadad lemnag rarogon facha’, mu kud fal’eged i yaliy boch e thin riy ni ku rayog ni nge ayuwegrad u nap’an e fol Bible.—Rom. 2:21, 22.
5. Uw rogon ni ngad folwokgad rok Jehovah?
5 Rib adag Jehovah ni nge mon’og e piin ni gadad ma fil e Bible ngorad. (2 Pet. 3:9) Ere, faan gad ra fal’eg rogodad u m’on ni ngad filed e Bible ngak be’, ma aram e gadad be dag nriyul’ nib t’uf rodad e piin ni gadad ma fil e Bible ngorad.