Ba T’uf ni Ngan Fal’eg Rogoy Ya Nge Yag ni Ngan Fil Ban’en ngak Be’ nib Fel’ Rogon

Sogonap’an l’agruw yay nni fith ngak Jesus murung’agen e yafos ni manemus, ma gubin yay ni pi’ e fulweg ni be lemnag rarogon faen ni ke fith fare deer. (Luke 10:25-28; 18:18-20) Yugu aram rogon ni gad manang e n’en ni ir e gad ra fil ngak faen ni gad be fil e Bible ngak nib fel’ rogon, machane thingar da fal’eged rogodad u m’on riy ni gad be lemnag rarogon facha’. Mang boch ban’en ni dabisiy nra mo’maw’ ngak ni nge nang fan ara nge m’agan’ ngay ni nge fol riy? Tin ngan ko fapi thin nu Bible e nggu beegew u taabang? Uw urngin ban’en ni thingar gu weliyew? Sana ra t’uf ni nggu lemnag ko mang fanathin ni ir e gu ra weliy ngak ara nggu lemnag yugu reb e kanawo’ u rogon ni nggu weliy murung’agen reb e ban’en, ara boch e deer ni nggu fith ngak ya nge yag ni nge nang fan e pi n’en ni gamow be weliy. Bochan ni Jehovah e ir e be ayuweg ni nge taw e tin riyul’ nga gum’irchaey, ma aram fan nthingar da meybilgad ngak ni nge ayuwegdad u nap’an ni gad be fal’eg rogon e n’en ni ir e gad ra weliy, mang ngkud ninged e ayuw ngak Jehovah ni fan ngak facha’. Ma kub ga’ fan ni ngad ninged e ayuw ngak Jehovah ni nge ayuwegdad ni ngad nanged rogon ni ngad ayuweged faen ni gad be fil e Bible ngak ni nge mon’og ko tirok Got ban’en.​—1 Kor. 3:6; Jas. 1:5.