Ngad Athamgilgad ni Ngad Machibnaged e Piin ni Pumoon

1. Mang ayuw e ba t’uf ko machib e ngiyal’ ney?

¹ Ngiyal’ ney ko tin tomuren e rran e kari t’uf e ayuw ni bochan e ke gel e maruwel ni yibe tay ni fan ko machib, ere ba t’uf boch e pumoon ni ngar ayuweged e re maruwel ney. (Mark 4:30-32; Acts 20:28; 1 Timothy 3:1-13) Machane, boch e nam e baga’ ni ppin e baadag e machib. Ma boch e nam e ma lemnag e pumoon ni ppin rorad e ba milfan ngorad ni ngar ayuweged e bitir ko tirok Got ban’en mi yad llowan’nagrad. Ere uw rogon ni ngad ayuweged e piin pumoon ngar nanged ni mus ngorad mab t’uf ni ngar nanged e thin rok Got mar liyorgad ngak?

2. Mang angin e machib ni tay Paul nge Peter ngak boch e pumoon?

² Ngad Machibnaged e Piin ni Pumoon: Nap’an nra adag e en lolugen e tabinaw e machib, mab ga’ ni ma n’igin ni nge un e tin ka bay i girdien e tabinaw rok ko machib. Bod nnap’an ni immoy Paul nge Silas u kalbus mar machibnagew e en ni ma matanag u kalbus. Ma aram me un fare moon nge urngin chon e tabinaw rok ko taufe. (Acts 16:25-34) Maku reb e nap’an ni i machib Paul u Korinth ma “Krispus, ni ir e ma yog e thin u lan tafen e muulung, e mich Somol u wan’, ni ir nge urngin e girdi’ u tabinaw rok.” (Acts 18:8) Ki l’og Jehovah Peter ni nge machibnag Kornelius ni ir e ga’ u barba’ e salthaw maku “ir be’ ni ma liyor ngak Got u wan’.” Ere ke un Kornelius nge chon e tabinaw rok nge pi tafager rok ko taufe.​—Acts 10:1-48.

3. Mini’ “be’ nib tolang” ni rayog ni ngam machibnag ni bod rogon ni rin’ Filip?

³ Yira machibnag e pi tayugang’ mab ga’ angin nra yib. (1 Timothy 2:1, 2) Bod ni yog reb e engel ngak Filip ni nge machibnag be’ nib “moon ni be’ nib tolang nri ga’ fan, ya ir e mmil fan ngak e salpiy rok be’ ni ppin nib pilung.” I rung’ag Filip laman e re moon nem ni be beeg e “thin ni bay ko fare babyor ni yoloy Isaiah ni profet.” Ma aram me tabab i weliy ngak fare moon murung’agen Jesus. I mang fare moon nu Ethiopia reb i gachalpen Jesus, ma dabisiy ni i wereg fare thin nib fel’ u nap’an ni sul ko nam rok. Maku dabisiy ni ki machibnag fare ppin nib pilung nge ku boch i girdien e am, nge ku boch e girdi’ nib mo’maw’ ni ngan machibnagrad.​—Acts 8:26-39.

4. Uw rogon nrayog ni nge rung’ag boor e pumoon fare thin nib fel’?

⁴ Rogon ni Ngan Machibnag Yugu Boch e Pumoon: Ba mo’maw’ ni ngan pirieg e pumoon u tabinaw u ngal’an e maruwel. Ere rayog ni ngam gay rogon ni ngam un ko machib ko blayal’, fa Sabado nge Madnom, ara yugu reb e rran ndariy e maruwel, fa? Faan ga ra un ko machib ko gin ni yima maruwel riy ma rayog ni ngam machibnag e piin ni pumoon nib ga’ ndar med u tabinaw rorad. Pi walag ni pumoon e rayog ni ngar machibnaged e piin ni pumoon ni yad ma maruwel u taabang. Ma nap’an ni yibe machib u mit e tabinaw ma rayog ni nge yog e pi walag ni pumoon ni ngar nonad ngak e en ni lolugen e tabinaw.

5. Susun mang e nge rin’ reb e walag nib pin ni faanra pirieg reb e pumoon ni baadag e machib?

⁵ Faanra pirieg reb e walag nib pin reb e pumoon ni baadag e machib ma thingar dabi sul ngak ni goo ir. Ya nge fek e pumoon rok ara yugu reb e walag ni nge un ngak. Ma faanra ke mon’og facha’ mab fel’ nreb e walag ni pumoon e nga i yan i machibnag.

6. Uw rogon ni ngad folwokgad rok apostal Paul ya nge yog nda ‘yognaged boch e girdi’ ngak Kristus’?

⁶ Mu Weliy e Machib nra Adag e Piin Pumoon ni Ngar Motoyilgad Ngay: I lemnag apostal Paul rogon laniyan’ e piin ni i machibnagrad, ma i puluwnag rogon e machib rok nga rarogorad ni fan e nge “yognag boch i yad ngak Kristus u rogon e re mit i kanawo’ nrayog riy.” (1 Korinth 9:19-23) Maku arrogodad nthingar da lemnaged boch ban’en nra adag e piin pumoon ni ngar motoyilgad ngay ma gad fal’eg rogodad ni ngad weliyed ngorad. Piin ni pumoon e ba ga’ ni ma magafan’rad nga boch ban’en u murung’agen e salpiy, nge am, nge tabinaw rorad. Ma dabisiy ni ku yad ra adag ni ngan weliy boch ban’en u murung’agen fan e yafos, nge n’en nra buch ko re fayleng ney boch nga m’on, nge fan ni ke pag Got be gafgow e girdi’. Ra adag e piin ni pumoon e machib ni faan gad ra gonopiy rogon ni gad ra non ngorad.​—Proverbs 16:23.

7. Uw rogon nrayog ni nge ayuweg e girdi’ u lan e ulung figirngin be’ nde michan’ ni ke un ko muulung?

⁷ Ngan Ayuweg e Piin Figirngiy nde Michan’rad: Yugu aram rogon ni ngongol rok e piin leengiy e rayog ni nge ayuweg e piin figirngiy ndawori michan’rad, machane ku rayog ni nge pi’ girdien e ulung e ayuw. (1 Peter 3:1-4) Faanra un figirngin reb e walag nib pin ko muulung me guy nrib felfelan’ e girdi’ nu lan e ulung ni ke un, ma rayog ni nge pi’ e athamgil nga laniyan’. Ya faanra un ko muulung ma dabisiy ni baadag e machib ma rayog ni ngan fil e Bible ngak.

8. Uw rogon nrayog ni nge ayuweg e pi walag ni pumoon e piin figirngiy ni gathi ri yad baadag e machib?

⁸ Maku reb e boch i figirngiy nde mich e thin rok Got u wan’rad e ra som’on ma gathi ri yad baadag e machib, machane ra munmun ma sana yad ra adag ni ngar filew be’ e Bible. Boch e walag ni pumooon u reb e ulung e nap’an ni yad ra yan nga tafen be’ nib pin nde michan’ e pumoon rok, ma yad ma gay rogon ni ngar weliyed boch ban’en ngak fare pumoon ni yad manang nra adag ni nge motoyil ngay. Ma aram me munmun me yog ni ngar weliyed boch ban’en u murung’agen e Bible, ma chiney e ke un fare pumoon ko taufe. Ku ba’ yugu reb e walag ni pumoon ni ayuweg e pumoon rok reb e walag ni ngar ngongliyew e yoror ko naun rok. Re n’ey ni ke rin’ e re walag ney e k’aring fare pumoon ni nge un ko fol Bible. (Galatia 6:10; Filippi 2:4) Faanra gur reb e walag ni pumoon, ma mang ndab mu guy rogon ni ngam ayuweg figirngin e pi walag nde michan’rad?

9. Mang angin ni faanra ni skulnag e piin pumoon nge yog ni milfan boch e maruwel ngorad?

⁹ Ngan Skulnag e Piin Pumoon Ya nge Yog ni Milfan Boch e Maruwel Ngorad: Piin pumoon ni yad ra adag e machib mi yad un nga boch e maruwel u lan e ulung e rayog ni ngar manged boch e piilal ni “tow’ath” ko ulung. (Efesus 4:8; Psalms 68:18) Pi piilal ney e yad ma ayuweg girdien e ulung nib m’agan’rad ngay ma yad ba felfelan’ ngay. (1 Peter 5:2, 3) Ba flaab e ulung ni bochan e pi pumoon ney!

10. Mang angin e machib ni tay Ananias ngak Paul?

¹⁰ Bod ni Saul e mang “apostal ngak e piin ni gathi yad piyu Israel” ni yugu aram rogon ni som’on e i gafgownag e piin Kristiano. (Roma 11:13) Gathi ri baadag Ananias ni nge machibnag Saul ya manang ni ma gafgownag e Kristiano. Machane ke fol ko thin rok Somol, ma aram me machibnag fare moon ni ir e yib i mang apostal Paul. Piin nrung’ageg e thin ni machibnag Paul nge piin ni yad ma beeg murung’agen u Bible e keb angin e machib ni i tay ngorad.​—Acts 9:3-19; 2 Timothy 3:16, 17.

11. Mang fan ni ngad gayed rogon ni ngad machibnaged e piin ni pumoon?

¹¹ Ere manga yugu da gayed rogon ni ngad machibnaged e piin ni pumoon. Ya faan gad ra rin’ ma ra tow’athnag Jehovah e n’en ni gad be rin’ ni fan e ngad rin’ed e tin nib m’agan’ ngay ma gad maruwel ni fan nga Gil’ilungun.