Rayog ni Ngam Ayuweg Leengin ara Figirngin Reb e Walag nde Mich Got u Wan’, Fa?
1. Mang fan ni gathi goo Kristiano ni gathi urngin e girdi’ ko tabinaw rorad e be un ko machib e yad ba adag ni ngar ayuweged e piin mabgol rorad ngar uned ko tin riyul’?
1 Bay boch e walag ko ulung rom ndawori mich Got u wan’ pi leengirad ara figirngirad? Faanra er rogon ma dabisiy ni pi walag ney e yad ba adag ni nge un e en mabgol rorad ko bin riyul’ e liyor. Machane gathi goo yad. Ya mus ngak e girdi’ ko ulung ma yad baadag ni nge urngin e girdi’ mi yad thap ngak Got mar “nanged e tin nib riyul’.” (1 Tim. 2:4) Ere uw rogon ni ngan ayuweg leengin ara figirngin e pi walag u lan e ulung nde mich Got u wan’rad?
2. Faanra tamilangan’dad u boch ban’en, ma uw rogon nra ayuwegdad nge yog nda ayuweged leengin ara figirngin be’ nde mich Got u wan’?
2 Som’on e ngad guyed rogon ngad nanged rogon laniyan’ faen de mich Got u wan’. Boor e piin mabgol ni dawori mich Got u wan’rad nib t’uf rorad e girdi’ u tabinaw rorad ma yad ma athamgil ni ngar ayuweged e ani mabgol rorad nge bitir rorad. Sana yad ba yul’yul’ ko tin ni ke mich u wan’rad ko teliw rorad machane ba thil ko machib rodad. Sana goo n’en ni ke weliy e girdi’ ngorad u murung’agen e Pi Mich Rok Jehovah nde puluw e ir e yad manang. Ma boch i yad e dubrad ni ma fanay e piin mabgol rorad boor e tayim ko machib mab lich e tayim ni yad be par u tabinaw. Tamilangan’ e ra ayuwegdad ni ngad ngongolgad ngorad u fithik’ e tayfan nge gol ma dabda rusgad ni ngad nonad ngorad.—Prov. 16:20-23.
3. Mang e bin th’abi fel’ e kanawo’ ni ngan ayuweg e en mabgol rok reb e walag ndawori mich Got u wan’?
3 Ngan Dag Ngak Facha’ ni Yibe Lemnag: Bin th’abi fel’ e kanawo’ ni ngan ayuweg leengin ara figirngin reb e walag nde mich Got u wan’ e aram e ngongol rodad ngak, ma gathi machib ni yira tay ngak. (1 Pet. 3:1, 2) Ba ga’ fan ni ngan dag ngak facha’ ni yibe lemnag. Pi walag ni ppin u lan e ulung e rayog ni ngar ayuweged e piin leengiy nde mich Got u wan’rad, ma pi walag ni pumoon e rayog ni ngar ayuweged e piin figirngiy nde mich Got u wan’rad. Ni uw rogon?
4. Uw rogon ni ngad daged ngak be’ ni gad be lemnag?
4 Faanra dawor mmada’nag e pumoon ara ppin rok reb e walag ni Kristiano, ma rayog ni ngam nonow fare walag nsom’on. Dabi mulan’um ni faanra dabi adag dakenam ko som’on. Ya dabisiy ni ga ra gol ngak mag dag nriyul’ ni ga be lemnag ma rayog ni nge thil e lem rok u murung’agen e Pi Mich Rok Jehovah. (Rom. 12:20) Boch e Kristiano e kar pininged be’ nde mich Got u wan’ nge chon e tabinaw rok nga tafen ko abich ni bochan e yad be guy rogon ni nge fel’ thilrad facha’. Kar weliyed murung’agen e tin ni ba adag ma dan towasariy ni ngan weliy murung’agen e machib. Ra munmun ni kad mechamgad ma rayog ni ngan weliy boch e thin nu Bible ngak ara ni pining ni nge un ko muulung, ya nge nang e n’en ni ma fil e en mabgol rok. Mus ni faanra dawori taw ngan’ ni nge fil e tin riyul’ ma rayog ni ngan pining e magar ngak ni ke pag e en mabgol rok ni nge un ko tin riyul’.
5. Uw rogon ni nge ayuweg e piin piilal leengin ara figirngin be’ nde mich Got u wan’?
5 Piin piilal e susun ni ngar athamgilgad ngar ayuweged leengin ara figirngin boch e walag nde mich Got u wan’rad. Be’ ni dawori un ko machib e rayog ni nge adag ni nge motoyil nga boch e thin nu Bible nra pi’ e athamgil nga lanin’uy u nap’an ni yad bay u aspital ara nap’an ni kar m’argad. Faanra keb e magawon nga lan reb e tabinaw ni gathi urngin e girdi’ riy ni ma pigpig ngak Got, ni bod u nap’an ni ke yim’ be’ u lan e tabinaw, ma rayog ni nge pining e piin piiilal faen mabgol rok reb e walag nder ma pigpig ngak Got ni nge un ko motoyil u nap’an ni yibe pi’ e athamgil nga laniyan’ e girdi’ ko fare tabinaw.
6. Mang fan ni ngan ayuweg leengin ara figirnin boch e walag nde mich Got u wan’rad?
6 Mu lemnag gelngin e felfelan’ nra tay reb e Kristiano ni faanra un e en mabgol rok ko tin riyul’! Ku ra felfelan’ Jehovah, nge pi engel, nge girdi’ u lan e ulung. (Luke 15:7, 10) Machane faanra dabun facha’ e machib ko som’on maku rayog ni ngad falfalan’gad ni bochan e gad be rin’ e tin nib m’agan’ Jehovah ngay ya “dabun ni nge n’ag be’, ya ba adag ni nge urngin e girdi’ mi yad pi’ keru’rad ko urngin e denen ni yad be rin’.—2 Pet. 3:9.
[Caption on page 6]
Bin th’abi fel’ e kanawo’ ni ngan ayuweg leengin ara figirngin reb e walag nde mich Got u wan’ e aram e ngongol rodad ngak, ma gathi machib ni yira tay ngak