Wuin e Ngan Sul Ngak e Girdi’ ni Baadag e Machib?
1. Mang e ba muun ngay ni ngad machibnaged e girdi’ ngar manged pi gachalpen Jesus?
1 Ngan machibnag e girdi’ ni ngar manged pi gachalpen Jesus e ba muun ngay ni ngan sul ngak e piin ni yad baadag ni ngar nanged murung’agen e Gagiyeg Rok Jehovah. (Matt. 28:19, 20) Ngiyal’ ni th’abi fel’ ni ngad sulod ngak e girdi’ e be tor nga rogon e maruwel rodad nge fa en ni gad ra sul ngak. Mang fan ni susun e ngad sulod ngak e girdi’ nib papey?
2, 3. Mang fan ni susun e ngad sulod ngak e girdi’ nib papey?
2 Mang Fan ni Ngad Sulod Ngak e Girdi’ nib Papey? Ke chugur ni nge m’ay e maruwel ni ngan machibnag e “re thin rok Got ney nib fel’ ni murung’agen e gagiyeg rok Got,” ma ku er rogon ni ke chugur nga tungun e re m’ag ney. (Matt. 24:14; 1 Pet. 4:7) Ere, thingar da athamgilgad ni ngad ‘machibnaged e thin rok Got ko girdi’ ndemtrug ko kari mab e kanawo’ ngodad fa dawor,’ nib muun ngay ni ngad sulod nib papey ngak e girdi’ ni yad baadag e thin rok Got.—2 Kor. 6:1, 2; 2 Tim. 4:2.
3 Baadag Satan ni nge chuweg e thin nriyul’ ni murung’agen e Gagiyeg rok Got ni kad filed ngak e girdi’ ni yad baadag ni ngar nanged e tin riyul’. (Mark 4:14, 15) Ba ga’ ni ma moning girdien e tabinaw, girdi’ u tabon e maruwel, nge yug girdi’ ngak e piin’ ni yad baadag ni ngar nanged e thin riyul’. Faan gad ra sul ngorad nib papey ma rayog ni ngad filed e thin riyul’ ngorad u m’on ni nge yib e girdi’ i guy rogon ni nge kirebnag lanin’rad.
4. Uw rogon ni ngad yarmiyed ni ngad sulod ngak e girdi’ ni kad mada’gad ko yay ni som’on?
4 Ngam Yarmiyew e Ngiyal’ ni Ngam Sul: Kab fel’ ni ngam yarmiyew e ngiyal’ ni ngam sul u m’on ni ngam chuw. Nga mu fith reb e deer ni ga ra weliy e fulweg riy ko yay ni migid ni ga ra sul. Ba fel’ ni ngam yoloy nga babyor e pi n’en ni kam weliyew nge pi n’en ni gimew ra weliy ko yay ni migid ni ga ra sul. Ngam fith ngak ko rayog ni ngam sul ngam guy e bin migid e rran ara yugu reb e rran. Faanra ga ra mada’nag e girdi’ ko Sabado ara Madnom ma ma un ko maruwel u lan e wik, mag fith ni faanra baadag ni ngam sul ngam guy ko bin migid e Sabado fa Madnom. Faanra ka mogew e rran ni ga ra sul ngam guy ma thingar mu sul.—Matt. 5:37.
5. Faan gad ra sul ngak e girdi’ nib papey, ma uw rogon nra ayuwegdad ngad rin’ed e n’en ni tay Jesus chilen ni ngad machibnaged e girdi’ ngar manged pi gachalpen?
5 Ba fel’ ni ngad sulod nib papey ngak e piin ni yad baadag e machib. Ere, faanra ka mog ni ngam sul ngam guy ma thingar mu sul ko ngiyal’ ni ka mog, ya “daki yoor e tayim ni ke magay.” (1 Kor. 7:29) Faanra ba papey ni gad ra sul ngak e piin ni yad baadag e thin riyul’ u murung’agen e Gagiyeg Rok Got, ma ba ga’ nra yib angin e maruwel ni gad be tay.