Ngad Mon’oggad Ko Machib​—Nga Nog ara Ngan Fith Ban’en ni Yira Weliy ko Yay ni Migid ni Kan Sul ngak Be’

FAN NIB GA’ FAN:

Nap’an ni gad ra mada’nag be’ ni baadag e machib, ma gad baadag ni ngad sulod ngak ya nge yag nda rannaged awochngin e tin riyul’ ni kad yunged. (1Ko 3:6) Ere, faanra kad mada’naged be’ ni ke motoyil ngodad, mab fel’ ni ngad fithed reb e deer ngak ni gad ra weliy ko yay ni migid ni gad ra sul ngak. Re n’ey e ra k’aring facha’ ni nga i lemnag e rofen ni ka gad ra sul ni ngad guyed. Ma yay ni migid ni gad ra sul ngak, ma rayog ni nga dogned ngak ni kad sulod ni ngad weliyed e fulweg ko fare deer ni kad fithed ngak ko yay nsom’on ni kad nonad.

ROGON NI NGAN RIN’:

• Nap’an ni ga be fal’eg rogon e n’en ni nga mog u nap’an e machib, mu kum lemnag reb e deer ni ir e ga ra fith ngak u m’on ni ngam mu’gow ko non. Rayog ni ngam fith reb e deer nib puluw ko n’en ni bay ko babyor ni kam pi’ ngak, ara reb e deer ni bay u ba ken fapi babyor ni gad ma fil ko girdi’. Ma nap’an ni ga ra sul ko yay ni migid, mi gimew weliy.

• U m’on ni ngam mu’gow facha’ ko non, ma gog ngak ni ga baadag ni ngkum man mu guy bayay ma ga fith fare deer ngak ni kam fal’eg rogon. Faanra rayog mag fith e telefon rok nge address rok ya nge mom rogon ni ngam sul ngam guy.

• Faanra kam puruy’nagew e ngiyal’ ni ngam sul ngam guy, mag guy rogon ni ngam man ko ngiyal’ nem ni kam weliyew.​—Mt 5:37.