Ngad Mon’oggad ko Machib​—Rogon ni Ngam Sul ni Ngam Guy Be’

FAN NIB GA’ FAN: Boor e piin ni yad be gay e tin riyul’ u murung’agen Got e yad baadag ni ngar nanged murung’agen Gil’ilungun. (Isa 55:6) Ere faanra ngad ululgad ngad filed murung’agen e re n’ey ngorad, mab t’uf ni ngaud sulod ngad guyed yad. Rayog ni nga i thilthil rogon ni ngad ayuweged yad ni bochan nra be’ mab thilthil e magawon ni ma yib ngak. Machane faanra nge yib angin e numon ni ngad ted e pi girdi’ ney, mab t’uf ni ngad fal’eged rogodad u m’on riy. Maku reb e, ba fel’ ni bay ban’en ni ngad nameged ni ngad weliyed murung’agen ngorad. Ma n’en ni ngad nameged e ngad tababnaged e fol Bible ngorad.

ROGON NI NGAN RIN’:

• Tomuren ni kam mada’nag be’ ni baadag e machib, mag gay rogon ni ngam sul ngak nib papey.​—Mt 13:19

• Mu gol ngak mag tayfan, mu kum guy rogon ni ngam par nib gapas mab paslag lanin’um

• Nap’an ni ga ra non ngak, ma gog fithingan mu kum pining e magar ngak. Mu puguran ngak fan ni kam sul ni ngam guy nsana bochan ni ngam pi’ e fulweg ko deer ni ke fith, ara ngam pi’ e bin nib beech e magazine ngak, ara ngam dag ngak fare website rodad, ara ngam dag reb e video ngak, ara ngam dag ngak rogon e fol Bible ni gad ma tay. Ma faanra ke fith ban’en nib thil ko n’en ni ga be lemnag ni ngam weliyew murung’agen, mi gimew weliy murung’agen e re n’em.​—Fil 2:4

• Mu ayuweg ni nge mon’og ko tin riyul’ ni ke fil murung’agen. Rayog ni ngam rin’ e re n’ey ni aram e ngam weliy reb e thin nu Bible ngak ara ngam pi’ reb e babyor ngak. (1Ko 3:6) Mu guy rogon ni nge fel’ e tha’ u thilmew me pagan’ ngom

• Mu fith reb e deer ngak nrayog ni ngam weliyew e fulweg riy u nap’an ni ga ra sul ngak