Ngan Sul Ngak Urngin e Girdi’ ni Be Dag ni Yad Ba Adag e Machib

¹ Boor i gadad ma kad uned ko thin nriyul’ ya ke guy be’ ni gad ba adag e machib ko Gil’ilungun Got ma kar sulod ngodad​—sana boor yay—​ni ngar ayuweged gadad. Ere susun ni ngad sulod ko girdi’ ni be dag ni yad ba adag e machib. Ya ngan sul ngak e girdi’ ma aram rogon ni ngad folgad ko fare motochiyel ni ngad “ayuweged e girdi’ ngar manged pi gachalpen Jesus.”​—Matt. 28:19, 20.

² Ngan Tiyan’ ko Girdi’: Mus ni dabi fek be’ e babyor ma rogon owchen, nge laman, nge thin rok ma rayog ni nge dag ni be tay fan e thin ko Gil’ilungun Got. Ma aram e n’en nra turguy ni ngan sul ngak. Reb e walag e ke sul ngak be’ lal e wik ma de fek facha’ e babyor. Fa bin nel’ yay ni ke sul ma ke fek facha’ e babyor ma kan tababnag e Bible study.

³ Faanra ga be guy ni ba adag be’ e machib ma ngam sul ngak ni in e ran u tomren. Dab mu pag “faanem nib kireb” nge lag e n’en ni kan wereg nga fithik’ i lanin’rad. (Matt. 13:19) Ngam guy rogon ni ngam rin’ e tin ni kam mog ni faanra kam yarmiy ni ngam sul ngak be’ ba ngiyal’.​—Matt. 5:37.

⁴ Machib u Kanawo’ Ga ma guy rogon ni ngam sul ngak e girdi’ ni kam machibnag u kanawo’ ngu fithik’ e sabethin? Tomren ni kam nonow ma rayog ni ngam gaar: “Kug falfalan’ ni kad nonow. Rayog ni ngad nonow biyay?” Faanra ba puluw ma boch e publisher e ra pi’ e namba ko telefon rorad ngak be’ ni ba adag e machib fa ra fith ni ngar pied e namba rorad ngorad. Faanra guyem e girdi’ u bayang u gubin ngiyal’ ma sana dabra telgad ni ngar pied e namba rorad ngom ara address rorad. Mus ni dab rogned ko uw rogon ni ngam nonow biyay, ma rayog ni ngam athamgil ni ngam nonow ko yay ni migid ni ngam mada’gow u kanawo’.

⁵ Nap’an ni gad ma guy e woldug ni kad ayuweged me tugul nib fel’ rogon ma gad ma falfalan’ ngay. Ku arrogon nrayog ni nge yib e falfalan’ ngodad ni faanra ngad sulod ko girdi’ ma ngad ayuweged yad ngar mon’oggad iyan ko tirok Got ban’en. (1 Kor. 3:6) Ngam nameg ni ngam sul ko urngin e girdi’ ni be m’ug riy ni yad ba adag e machib.