Ba Gaman e Tin ni Gu Be Rin’, Fa?
1. Mang boch ban’en nrayog ni nge magafan’ reb e Kristiano ngay?
1 Ka am fithem ko re deer ney, fa? Sana ke mulan’um ya kam pilibthir, fa kam m’ar, fa boor ban’en ni ngam rin’ u tabinaw rom ma dakir yog ni ngam un ko machib ni gubin ngiyal’. Reb e walag ni ppin ni dalip e bitir rok e ke yog ni yu ngiyal’ e ma kireban’ ya dabiyog ni nge un ko machib ni gubin ngiyal’ ni bochan e thingari ayuweg e tabinaw rok. Mang e ra ayuwegdad ni nge par e lem rodad nib puluw u murung’agen e re n’ey?
2. Mang e baadag Jehovah ni ngad rin’ed?
2 N’en ni Baadag Jehovah ni Ngad Rin’ed: Dariy e maruwar riy ni gad gubin ni gad baadag ni nge yoor boch e tayim ni gad ma machib riy. Machane ba ga’ e thil e thilin e n’en ni gad baadag ni ngad rin’ed nge tin nrayog ni ngad rin’ed. Bochan ni gad baadag ni ngki yoor boch ban’en ni ngad rin’ed ma be dag ni dawori fel’ u wan’dad e tin ni gad be rin’. Dabda paged talin ni manang Jehovah e tin nrayog rodad nge tin dabiyog ma der lemnag ni ngad rin’ed ban’en ndabiyog rodad. (Ps. 103:13, 14) Ere mang e baadag ni ngad rin’ed? Baadag ni ngad pigpiggad ngak u polo’ i gelngidad u rogon nrayog rodad.—Kol. 3:23.
3. Uw rogon ni ngad fal’eged i lemnag e tin nrayog ni ngad rin’ed ni fan ko machib?
3 Mang e ra ayuwegdad ni ngad nanged e tin nrayog ni ngad rin’ed? Rayog ni nga dogned ngak Jehovah ni nge ayuwegdad ngad nanged rarogodad. (Ps. 26:2) Faanra bay reb e walag nib fel’ e thin rodad ma ke ilal ko tirok Got ban’en ma der rus ni nge weliy e magawon rodad ngodad, ma rayog ni ngad ninged e ayuw ngak. (Prov. 27:9) Ku dabda paged talin ni demtrug e ngiyal’ nrayog ni nge thil rarogodad, ere ba fel’ ni ngaud fal’eged i yaliy rarogodad ni gubin ngiyal’.—Efe. 5:10.
4. Susun ni nge uw rogon u wan’dad e fonow ni yima pi’ ngodad u murung’agen e machib?
4 Rogon ni Ngaud Lemnaged e Fonow: Ra taw nga nap’an e sagreng, ma piin ni yad baadag ni nge gel be’ e yad ma yog boch ban’en ni nge pi’ e athamgil nga laniyan’ faanem. Fan e re n’em e nge ayuweg faanem ni nge taw ko gin ni be nameg ndabi mulan’. Ku arrogon e pi fonow ni bay u lan e pi babyor rodad nge tin ni yima pi’ u nap’an e muulung ni ngad ‘machibnaged fare thin nib fel’ u fithik’ e pasig.’ Yima pi’ e pi fonow nem ni fan ngodad ma gathi yibe yog nder gaman e tin ni gad be rin’. (2 Tim. 4:2) Rayog ni nge mich u wan’dad ni faan gad ra rin’ e tin nrayog rodad, ma dabi pag Jehovah talin e ‘maruwel ni kad ngongliyed’ ma ra felfelan’ ngay.—Heb. 6:10.