Faanra Ba T’uf e Babyor Rom ni Thin nu Yugu Reb e Nam nib Gur

Yu ngiyal’ e gad ma mada’nag e girdi’ ni yad ba adag ni ngar beeged e pi babyor rodad ni thin ko nam rorad, machane dariy ko ulung rodad. Ga manang ni faanra bay e Internet rom nge printer, ma rayog ni ngam printnag e babyor u gonap’an 400 mit e thin? Baaray rogon:

• Mman ko www.watchtower.org, ni aram e Web site rodad.

• Ga ra sap ko ba’ ni mat’aw ko re home page nem ma bay e list ko urngin mit e thin ni kan pilyeg e babyor rodad ngay. Ngemu’ mag click ko fare sasing ni yaan e fayleng ni aram e gin ni bay urngin mit e pi thin nem riy.

• Ngemu’ ma ga mel’eg e bin ni ga baadag e thin. Tomuren e biney ma ra m’ug reb e page ni bay riy e pi babyor nrayog ni ngam printnag ni bod rogon e tract, nge brochure, nge magazine. Yol ko re page nem e kan yoloy nthin ko fare nam ni kam mel’eg.

• Mu mel’eg e babyor ni ga baadag ni ngam printnag. Ma nap’an nra m’ug ngemu’ ma ga print.

Gathi gubin e babyor ni bay re Web site ney; ere tin dariy riy ma rayog ni nga mog ko ulung ngan chumongnag. Ma nap’an nra adag be’ e machib, mab fel’ ni ngam ning e babyor ko ulung.