Yira Guy ni Ireray e Tin Riyul’
1. Mang e ku rayog ni nge pug e tafinay ko girdi’ u nap’an e Puguran? Mu weliy.
1 Wuin? Rofen ni Puguran. Ngan athamgil ni ngan pining e girdi’ ngar uned ko puguran. Gathi ke mus ni n’en ni yad ra rung’ag e ra pug e tafinay rorad. Tomren ni un reb e ppin ko Puguran me weliy ko mang e ke guy—rogon nib gol e girdi’ nge rogon feni yad ba beech, ma kub beech e gin’en ni kan tay e puguran riy, ma bay e girdi’ ni yad ma ognaged yad ni ngar pied e ayuw ko klin ni dariy puluwrad. Ere gathi kemus ni faen nra pi’ e welthin e rayog ni nge ayuweg e girdi’ ngar guyed ni ireray e tin riyul’ u nap’an e puguran.—Efe. 4:16.
2. Uw rogon nrayog ni ngad daged ko girdi’ ni ireray e tin riyul’?
2 Ngan Gol Ngak e Girdi’ min Pining e Magar Ngorad: Gad ra non ngak e girdi’ u fithik’ e gol nge sumunguy ma rayog ni ngad ayuweged e girdi’ ni ngar nanged ni ireray e tin riyul’. (John 13:35) Yugu aram rogon ni dabiyog ni ngam non ngak urngin e girdi’ machane ku rayog ni ngam non ngak e piin ni yad bay u toobem. (Heb. 13:1, 2) Ngad lemnaged e piin ni kafin ra uned ko puguran ma dariy be’ u lan e ulung ni yad manang. Sana kan pi’ bang e babyor ngorad ni yibe piningrad ko puguran. Rayog ni ngam fith ni nge lungum: “Aray e yay nsom’on ni kam un ko puguran, fa?” Ma ga piningrad ngar pared nga toobem ma ra bay boch ban’en ni yad be fith ma rayog ni ngam ayuwegrad.
3. Uw rogon nrayog ni ngad ayuweged e piin ni kar meewargad ko tirok Got?
3 Ngan Pining e Magar ko Piin ni Kar Meewargad ko Tirok Got Ban’en: Dariy e maruwar riy nra yib e piin ni publisher ni kar meewargad ko tirok Got, ni kub muun e piin ni kemus ni yad ma yib u nap’an e Puguran. Ngan pining e magar ngorad ma nga nog ngorad ni kad felfelan’gad ni kar bad. (Rom. 15:7) Piin piilal e rayog ni nga ranod ngar guyed e pi girdi’ nem nga tabinaw rorad ngar pied e athamgil nga lanin’rad ni ngar sulod ko ulung. Ngad yibilayed e piin ni kar uned ko puguran ni ngar n’ufed Got ni gathi kemus ni bochan e n’en ni kar rung’aged ya bochan e ‘ngongol rodad nib fel’’ ni kar guyed.—1 Pet. 2:12.