Mu Dag e T’ufeg Rom Ngorad!

1. Mang madnom e ke mab e kanawo’ ngodad ni ngad daged ngak e girdi’ ni bay e tin riyul’ rodad? Mang fan?

¹ Nap’an fare madnom ko Puguran ni yima tay ni gubin e duw, ma ke mab e kanawo’ ngodad ni ngad daged ngak e girdi’ ni gad bay ko tin riyul’. Mu lemnag e re n’ey: Re duw ney ma yibe athapeg ni boor ko ragag milyon e girdi’ ni yad ra un ko fare Puguran ni ngar motoyilgad ko welthin u murung’agen l’agruw mit e t’ufeg ni kan dag u daken fare biyul. (John 3:16; 15:13) Yad ra fil murung’agen e pi tow’ath nrayog ngorad ni bochan fare tow’ath ni ke pi’ Jehovah. (Isa. 65:21-23) Machane, gathi kemus ni faen nra pi’ e welthin e ra dag ni bay e tin riyul’ rodad. Ya gubin e girdi’ nra un ko re madnom nem e ra mab e kanawo’ ngorad ni ngar daged ni bay e tin riyul’ rorad u daken e t’ufeg ni yad ra dag ngak e piin ni yad ra yib.​—Rom. 15:7.

2. Uw rogon ni ngad daged e t’ufeg ngak e piin ni kar bad ko fare madnom?

² Mang fan ndab mu athamgil nga mog fithingam ngak e en ni be par u toobem, mag gay rogon ni ngam nang salpen, ko bin ni kemus ni ngam gay e chiya rom mag son ni nge tabab e muulung? Piin ni yad ra un ko re madnom ney ko yay nsom’on e rayog ni ngar rusgad ya dar nanged ko mang e yira rin’. Faanra ngad daged e t’ufeg ngorad ma aram e gad be ayuweged yad ni nge gapas lanin’rad. Rayog ni ngad fithed be’ ko ireray e yay nsom’on ni ke un ko muulung rodad fa bay be’ u lan e ulung rodad ni manang, ya nge yag ni ngad nanged ko kan pi’ reb e babyoren e puguran ngak fa. Ma rayog ni ngam pining ni nge par nga toobem, ya nge yag ni ngam yaliyew e Bible nge babyoren e tang rom u nap’an e muulung. Faanra yibe tay fare puguran u lan e Kingdom Hall, ma sana rayog ni ngam dag boch ban’en ngak u rom mag weliy murung’agen ngak. U tomuren e welthin ma ngam athamgil ngam pi’ e fulweg ko pi deer nra fith. Faanra ba t’uf ni nge chuw girdien fare ulung u rom ya bay yugu reb e ulung nra fanay fare kingdom hall, ma rayog ni nga mog ngak ni nge lungum: “Gu baadag ni nggu nang ko uw rogon fare muulung u wan’um. Rayog ni ngad nonow bayay, fa?” Ma aram e ngam dugliyew ko uw rogon me yag ngkum mada’gow bayay. Ma piin piilal e ngar gayed rogon ni ngar pied e athamgil nga laniyan’ e pi walag ni kar bad ko re madnom nem ni ke war e michan’ rorad.

3. Mang nib ga’ fan ni ngad athamgilgad ngad daged e t’ufeg ngak e girdi’ ni ke yib ko fare madnom ko Puguran?

³ Ireray e yay nsom’on nra un boor e girdi’ ko re madnom ney, ma yad ra guy e felfelan’, nge gapas, nge taareban’ ni bay u thilin e girdi’ rok Jehovah. (Ps. 29:11; Isa. 11:6-9; 65:13, 14) Mang e dab ra paged talin u tomuren ni kar uned ko re madnom nem? Re n’ey e ra yan u rogon e athamgil ni kad ted ni ngad daged e t’ufeg ngorad.