Mu Pining e Magar Ngorad

Mini’ e piin nsusun e ngad pininged e magar ngorad? Susun ni ngad pininged e magar ngak e piin ni kar bad ni ngar uned ko muulung ndemtrug ko yad e piin nsom’on rorad ni kar uned ko muulung ara pi walagdad ni ke n’uw nap’an ni yad ma un ko muulung. (Ro 15:7; Heb 13:2) Pi girdi’ ney e ba muun ngay e pi walagdad ni kar bad u yugu reb e nam ara reb e Kristiano ni ke n’uw nap’an ni dakir ma un ko muulung. Am lemnag rogon lanin’um ni faanra gur bagayad e pi girdi’ ney. Gur, gathi ga ra felfelan’ ni faanra yira pining e magar ngom ni ka mub ko muulung? (Mt 7:12) Ere ba fel’ ni u m’on ara tomuren e muulung mag athamgil ni ngam pining e magar ngak e piin ni kar bad ni ngar uned ko muulung? Ya faan ga ra rin’ ni aray rogon, ma aram e ga be gelnag e t’ufeg ni bay u thildad ma re n’ey e rayog ni nge pining e sorok ngak Jehovah. (Mt 5:16) Sana dabiyog ni ngad nonad ngak urngin e girdi’ ni kar bad ko muulung. Machane, faanra gad gubin ni gad ra rin’ e tin rayog rodad ni ngad pininged e magar ko girdi’, ma aram e yad ra felfelan’.a

Faanra riyul’ ni gad ma pining e magar ngak e piin ni kar bad ko muulung, ma gathi kemus ni ngad rin’ed e re n’ey u nap’an e Puguran, ya ku gad ra rin’ ni gubin ngiyal’. Nap’an nra guy e piin nsom’on rorad ni kar uned ko muulung e t’ufeg ni yibe dag ngorad, ma dabisiy ni yad ra adag ni ngar pininged e sorok ngak Got mar uned ngodad ko bin riyul’ e liyor.​—Joh 13:35.