Ra nge Tugul e Awoch Ma Thingar Un Rannag

1. Mang e thingar ni rannag ni faanra nge tugul?

¹ Awoch ni kan yung nga milay’ e thingar un rannag ya nge yog ni tugul. Ku er rogon awochngin e tin riyul’ ni yibe yung nga gum’irchaen e girdi’ ko gin ni gad ma machib riy. (1 Kor. 3:6) Thingar ud sulod ngak e piin ni gad ma mada’nag u nap’an e machib ni faanra gad baadag ni nge tugul e awoch ni kad yunged me dammal.

2. Uw rogon ni ngad ayuweged be’ ni kad machibnaged ni nge adag e n’en ni gad ra weliy ngak ko yay ni migid ni gad ra sul ngak?

² Mu Fith Reb e Deer: Nap’an ni ga be lemnag e n’en ni nga mog ngak be’ u nap’an e machib, ma mang ndab mu lemnag reb e deer nrayog ni ngam fith mi gimew weliy e fulweg riy u nap’an ni ga ra sul ni ngam guy? Mu fith e re deer ney u nap’an e yay ni som’on ni kam mada’gow, ma ga yarmiy ni ngkum sul bayay. Boor e walag ni kar pirieged nib fel’ ni ngar mel’eged ban’en ko fare babyor ni Mang e Ri Be Fil e Bible? nrayog ni ngar tababnaged e fol Bible riy.

3. Mang boch ban’en nrayog ni ngam yoloy nga but’ u nap’an ni ga be yoloy e pi n’en ni ke buch ko yay ni som’on ni kam mada’nag be’?

³ Mu Yoloy Boch Ban’en nga But’: Nap’an ni kam chuw u tafen facha’, ma ga yoloy nga but’ urngin ban’en ni kam weliyew murung’agen. Kum yoloy fithingan nge gin ni ma par riy. Kub fel’ ni ngkum yoloy nga but’ e rofen nge ngiyal’ ni kam nonow, nge n’en ni kam weliyew murung’agen, nge babyor ni kam pi’ ngak ni faanra bay. Ke yog ni bay e teliw rok, fa? Bay e tabinaw rok, fa? Ke yog boch ban’en ni baadag nge boch ban’en ni be magafan’ ngay, fa? Pi n’ey e ra ayuwegem ko yay ni migid ni ga ra sul ngak. Kub ga’ fan ni ngam yoloy nga but’ e rofen ni kam weliyew ni ngam sul nge deer ni gimew ra weliy e fulweg riy.

4. Mang fan ni ngad athamgilgad ngaud sulod ngak e girdi’ ni baadag e machib?

⁴ Mu Athamgil: Dabi tal Satan i guy rogon ni nge ‘fek e thin rok Got’ ni kan wereg nga laniyan’ be’. (Mark 4:14, 15) Ere, dabi mulan’um ni faanra ga be sul ngak be’ ma der yog ni ngam mada’gow. Gur, rayog ni ngam yoloy e babyor nge yan ngak ara mu yoloy e babyor ngam tay nga langan e mab rok? Reb e pioneer e tababnag e fol Bible ngak reb e ppin, machane ba ga’ nra yan nga tafen ma de mo’, ere n’en ni rin’ e yoloy e babyor nge yan ngak. Ma nap’an ni yog ni ngar mada’gow, me weliy fare pin rogon e athamgil ni ke tay laniyan’ ni bochan e n’en ni ke rin’ fare walag ni ppin. Ere, nap’an ni gad be rannag awochngin e tin riyul’, ma rayog ni ngad thamiyed e felfelan’ ni ma yib u nap’an ni yira guy ni ke tugul, ke ilal, ma ke “k’uf, ni boch i yad e guyey wom’engin, ma boch i yad e nel’ i ragag wom’engin, ma boch i yad e raay wom’engin.”​—Mark 4:20.