Mu Non u Reb e Kanawo’ Nra Yib Angin
1. Mang e rayog ni ngad filed u rogon e machib ni i tay e tin som’on e Kristiano?
1 Tin som’on e Kristiano e ur machibnaged fare thin nib fel’ ko girdi’ nib thilthil e yalen nge teliw rorad. (Kol. 1:23) Yugu aram rogon ni taab n’en e ur weliyed murung’agen ni aram Gil’ilungun Got, machane ba thilthil rogon ni yad ma non ko girdi’. Bod ni, nap’an ni non Peter ko pi Jew nib ga’ fan e thin nu lan e Babyor nib Thothup u wan’rad, ma som’on e sul u daken e thin rok Joel ni profet. (Acts 2:14-17) Machane, mu tay fanam i yan u rogon ni i non Paul ngak piyu Greece ni rogon ni bay ko Acts 17:22-31. Ngiyal’ ney e bay boch e binaw ni gad ma machib riy ni girdi’ riy e ba ga’ fan e thin nu Bible u wan’rad, ma rayog ni ngad weliyed boch e thin nu Bible ngorad u nap’an ni gad be machib u mit e tabinaw i yan. Machane, ba t’uf ni ngad gonopiyed rogon ni gad ma non ngak e piin ndarur lemnaged ni ngar nanged murung’agen e thin nu Bible, ara teliw, ara piin ni yad ma un nga boch e teliw ndarur rogned ni yad e Kristiano.
2. Uw rogon nrayog ni ngad fanayed e babyor ni yibe wereg u reb e pul ni ngad ayuweged e piin nib mich e Bible u wan’rad nge piin danga’?
2 Mu Fanay e Babyor ni Yibe Wereg nib Fel’ Rogon: Pi babyor ni yira wereg u thilin e re pul ney nge yan i mada’ ko August ko bin migid e duw e bay un thilyeg ko yu l’al’agruw e pul, mab ga’ ni pi magazine, nge tract, nge brochure e bay un wereg. Faanra ba ga’ nde mich e Bible u wan’ e girdi’ ko gin ni gad ma machib riy, machane rayog ni ngad weliyed boch ban’en ni yad ra adag ni ngar motoyilgad ngay. Sana dab da beeged reb e thin nu Bible ko yay ni som’on ni kad mada’gad ara kad weliyed murung’agen e Bible, machane faanra ke m’ug ni yad baadag ni ngar motoyilgad ngodad, ma rayog ni ngad yarmiyed ni ngkud sulod ngorad ni ngad guyed rogon ni nge mich u wan’rad ni bay be’ ni ir e ke Sunmiy urngin ban’en miki mich u wan’rad e Thin rok ni kan thagthagnag. Machane, faanra gad be machib u bang nib mich e Bible u wan’ e girdi’ riy, ma rayog ni ngad fanayed e babyor ni yibe wereg ma gad non ngorad u reb e kanawo’ ni yad ra adag ni ngar motoyilgad ngay. Machane, demtrug e ngiyal’ nrayog ni ngad pied fare ke babyor ni Mang e Ri Be Fil e Bible nge fare brochure ni kenggin e Mmotoyil ngak Got me Yog e Yafas ni Manemus Ngom, ni yugu aram rogon nib thil e babyor ni yibe wereg u reb e pul. N’en nib ga’ fan e ngan machib u reb e kanawo’ nra yib angin.
3. Uw rogon ni laniyan’ e girdi’ ko gin ni gad ma machib riy e bod rogon e but’?
3 Ngan Maruweliy fare But’ nge Yong’ol: Laniyan’ e girdi’ e bod rogon e but’. (Luke 8:15) Boch e but’ e ba t’uf ni ngan maruweliy som’on mfini yag ni nge tugul awochngin e tin riyul’ nu Bible riy. Pi tamachib ko bin som’on e chibog e yag rorad ni ngar yunged e woldug ko but’ nib thilthil ni be yip’ fan ni ke yag rorad ni ngar machibnaged e girdi’ nib thilthil lanin’rad, ma re n’ey e ke k’aring e felfelan’ ngorad. (Acts 13:48, 52) Rayog ni nge yib angin e machib ni gad be tay ni faan gad ra fal’eg i yaliy rogon ni gad ma non.