‘Mmachibniged ngak e Girdi’ fare Thin Nib Fel’’
1. Mang e n’en ni rin’ apostal Paul nrayog ni ngad folwokgad riy?
1 Mu “ngongliy urngin e maruwel ni kan pi’ ngom nrogon e tapigpig rok Got.” (2 Tim. 4:5) Riyul’ nib mom rogon rok apostal Paul ni nge weliy e biney e thin ngak Timothy. Bin riyul’ riy e, u thilin fapi duw ni 47 nge 56 C.E., me ke yag rok Paul ni nge mu’nag dalip e milekag ni tay ni be machibnag fare thin nib fel’. Fare babyor ko Acts e boor yay ni weliy riy murung’agen e ‘machib’ ni tay Paul. (Acts 23:11; 28:23) Ma gadad e ngiyal’ ney, uw rogon nrayog ni ngad rin’ed e re maruwel ney?
2. Uw rogon ni ngad machibnaged e girdi’ ni gubin u nap’an ni gad be yan u mit e tabinaw i yan ko machib?
2 Machib u Mit e Tabinaw i Yan: Faanra ngad machibnaged e girdi’ ndawor ra rung’aged fare thin nib fel’ mab t’uf ni ngad gayed rogon ni ngad mada’naged yad u yugu reb e tayim nib thil. Sana faen ni ir e tafen fare tabinaw e ba ga’ ni bay u tabinaw rok ni blayal’ ara bay u rom ko Sabado ara Madnom. Ba ga’ fan ni ngad athamgilgad ngad machibnaged e girdi’ u gubin e tabinaw ni gad be yan riy, ma kub ga’ fan ni ngad sulod ko pi tabinaw nder yag ni ngad pirieged e girdi’ riy. Machane uw rogon ni faanra der yag ni ngam pirieg be’ ni ngam nonow? Faan ga ra yoloy e babyor ngam tay ko fare tabinaw nder yag ni ngam pirieg be’ riy ara mu callnag faen ni ir e tafen fare tabinaw ma sana rayog ni ngam machibnag.
3. Mang boch e kanawo’ nrayog ni ngam machib riy u fithik’ e girdi’ ni yoor nge machib u fithik’ e sabethin?
3 Machib u Fithik’ e Girdi’ ni Yoor nge Machib u Fithik’ e Sabethin: Pi tapigpig rok Jehovah e ngiyal’ ney e yad ma weliy murung’agen e bin riyul’ e “gonop” ngak e piin ni yad ra motoyil. Yu ngiyal’ e gad ma rin’ e re n’ey u daken “yu pa’ i kanawo’” ara ko “yungi n’en ni bay e market riy.” (Prov. 1:20, 21) Nap’an ni gad be rin’ e pi n’en ni gad ma rin’ u reb e rran nge reb, ma gur gadad ma athamgil u rogon nrayog rodad ni ngad machibnaged e girdi’? Rayog ni nga nog ni gad be ‘par ni yigoo thin rok Got e gad be machibnag ko girdi’,’ fa? (Acts 18:5) Faanra aray rogon ma gad be fol ko fare thin ni ngad “machibniged ngak e girdi’ fare Thin Nib Fel’ ni yib rok Got.”—Acts 10:42; 17:17; 20:20, 21, 24.
4. Faan gad ra meybil, ma gad fal’eg i lemnag fan e thin rok Got, ma uw rogon nrayog ni nge ayuwegdad ni ngad pasiggad ni ngad weliyed fare thin nib fel’?
4 Bochan ni bay boch ban’en nib mo’maw’ ni ngad rin’ed ara bochan ni gadad ba tatamra’ ma yu ngiyal’ e ba mo’maw’ rogon ni ngad machibnaged be’. Dariy e maruwar riy ni manang Jehovah e n’en nrayog ni ngad rin’ed. (Ps. 103:14) Machane, faanra bay yu ngiyal’ ni gad be pirieg e magawon ni aray rogon, ma rayog ni ngad meybilgad ngak Jehovah ni nge ayuwegdad ya nge dab da rusgad. (Acts 4:29, 31) Maku nap’an ni gad be fil e Bible ni yigoo gadad, ma gad be fal’eg i lemnag e n’en ni be yog e Thin rok Got, ma rayog ni ngad gayed rogon ni nge ga’ fan u wan’dad fare thin nib fel’. (Fil. 3:8) Faan gad ra rin’ e re n’ey ma aram e gad ra pasig ni ngad weliyed fare thin nib fel’!
5. Uw rogon nrayog ni ngad uned i lebguy fare yiiy ni weliy Joel murung’agen?
5 Fare yiiy rok Joel e weliy ni u m’on ko fare rran rok Jehovah ma girdi’ rok Got e yad ra yan u “puluwrad nga m’on” ma dab ra paged ban’en ni nge talegrad ko machib. (Joel 2:2, 7-9) Ere, thingar da athamgilgad u rogon nrayog rodad ni ngad rin’ed e re maruwel ney ndakuriy biid ni ku yira rin’ bayay!