Deer

◼ Mang e pi kenggin e motochiyel nu Bible e bay rogon ko pi cell phone ni yibe fanay u nap’an e pi muulung ko Kristiano ngu nap’an ni yibe machib?

“Gubin Ban’en ni Bay Ngal’an.” (Ekl. 3:1, NW): Demtrug e ngiyal’ ma rayog ni ngan fanay e cell phone ni ngan non ara ngan text. Machane, yu ngiyal’ ma bay e piin Kristiano ndubrad ni nge magawonnagrad e cell phone. Bod u nap’an e muulung rodad, ya aram e ngiyal’ ni ngad liyorgad ngak Jehovah, nge ku aram e ngiyal’ ni yibe skulnagdad ko tirok Got ban’en, maku ireray e ngiyal’ nra bagadad ma nge pi’ e athamgil nga laniyan’ bagadad. (Deut. 31:12; Ps. 22:22; Rom. 1:11, 12) Ere rayog ni ngad off naged e cell phone rodad u nap’an ni kad bad ko muulung, ma tomuren e muulung ma fin da on naged ngad guyed ko mang e bay riy, fa? Faanra rib t’uf ni nge par e cell phone rom nib on u nap’an e muulung, ma ga achignag lingan ya nge dabi magawonnag boch e girdi’ u nap’an e muulung.

“Urngin e pi n’ey ni gu be rin’ e yigoo fan ko Thin Nib Fel’ ni yib rok Got.” (1 Kor. 9:23): Yu ngiyal’ mab ga’ fan ni ngan fanay e cell phone u nap’an e machib. Bod ni fare walag ni ir e be yarmiy e machib e sana ra fanay e cell phone rok ni nge nang fan e tin ka bay e girdi’ ni yad be machib u yu yang ko fare binaw. Ma yu ngiyal’ e ku ma fanay e pi walag e cell phone rorad ni ngar nonad ngak e girdi’ ni baadag e machib ara Bible study rorad u m’on ni nga ranod ngar guyed yad, nib ga’ nfaanra ba palog e gin ni yad be par riy. Faanra bay e cell phone rodad, mab fel’ ni ngad kol ayuwgad ni nge dabi magawonnagdad u nap’an ni gad be non ngak be’ u nap’an e machib. (2 Kor. 6:3) Nap’an ni gad be sonnag e pi walagdad u nap’an e machib, mab fel’ ndab da callgad ara ngad textgad ko fager rodad, dabisiy nib fel’ ni ngad tiyan’gad ko machib nge en ni gad be machib u taabang.

Ngan Lemnag Rarogon Boch e Girdi’. (1 Kor. 10:24; Fil. 2:4): Dab da lemnaged ni ngaud bad ni gad ba sagaal ko fare muulung ni fan ko machib, ni bochan ni bay e cell phone rodad, ma rayog ni ngad callgad ara ngad textgad ngad nanged e gin ni ngan yan ngay ko machib. Nap’an ni gad ra taw nib sagaal, mab t’uf ni ngkun yarmiy e girdi’ bayay. Riyul’ ni yu ngiyal’ ma bay e magawon ndabiyog ni ngad siyeged. Machane, gad ra athamgil ni ngad tawgad nib tayim, ma aram e gad be tayfan e yaram rok Jehovah nge fare walag ni be yarmiy e machib nge pi walagdad.