Thin Rok Got e Ba Ga’ Fan Ya Ma Fil e Tin Nib Riyul’ e Thin Ngodad

1. Mang kenggin fare circuit assembly ko duw ni 2014, ma mang deer e yira pi’ e fulweg riy u nap’an e re muulung nem?

¹ Jehovah Got e ir e bin th’abi fel’ e “Tafonow” ara Sensey u ga’ngin yang e palpalth’ib. (Isa. 30:20, 21) Machane, uw rogon ni ma skulnagdad? Ke pi’ reb e babyor ngodad ni aram e Bible, ma dariy reb e babyor nrayog ni ngan taarebrogonnag ngay nga feni rib manigil e thin riy. Uw rogon nrayog ni nge yib angin e thin ni bay riy nga rarogon fithik’ i dowdad, nge rogon ni gad ma lemnag boch ban’en nge rogon ni gad ma lemnag e pi n’en ni bay rogon ko tirok Got ban’en? Fulweg ko re deer ney e yira weliy u nap’an fare circuit assembly ko duw ni 2014. Kenggin e re assembly ney e ‘Thin Rok Got e Ba Ga’ Fan Ya Ma Fil e Tin Nib Riyul’ e Thin Ngodad,’ ni kan fek ko fare thin ni bay ko 2 Timothy 3:16.

2. Fulweg ko mang deer e ra tamilangnag e tin nib ga’ fan ni yira weliy u nap’an e assembly?

² Mu Guy e Pi Thin ni Baaray nib Ga’ Fan: Tin nib ga’ fan ni yira weliy u nap’an e re circuit assembly ney e ra tamilang ko pi fulweg ko pi deer ni aram e:

• Nap’an ni gad ra fil e thin rok Got, ma mang angin nra yib ko yafas rodad? (Isa. 48:17, 18)

• Faan gad ra gay rogon ni ngad thilyeged rarogon e yafas rodad, ya nge yag ni ngad pigpiggad ngak Jehovah u polo’ e tayim rodad, ma mang e rayog ni nge mudugil u wan’dad? (Mal. 3:10)

• Mang e ga ra rin’ ni faan ga ra mada’nag e “machib nib thil”? (Heb. 13:9)

• Uw rogon ni ngad folwokgad u “rogon e machib” ni i tay Jesus? (Matt. 7:28, 29)

• Mang fan nib t’uf ko pi tamachib u lan e ulung e ngar filed e tin riyul’ ko som’on? (Rom. 2:21)

• Mang e ba fel’ ni ngan fanay e Thin rok Got ngay? (2 Tim. 3:16)

• Bochan ni be “rurug” Jehovah gubin e pi nam, ma mang e ra buch rok e girdi’? (Hag. 2:6, 7)

• Uw rogon ni ma pagan’ Jehovah ngodad? (Efe. 5:1)

• Mang fan ni thingar da athamgilgad ni ngaud folgad ko machib ni yib rok Jehovah? (Luke 13:24)

3. Mang fan nib ga’ fan ni ngad uned, ma gad tiyan’ ko re program ney?

³ Boch e thin ko 2 Timothy guruy ni 3 ni bay u m’on ko fare verse ni ir e kenggin e thin nu Bible ni fan ko re assembly ney, me weliy Paul murung’agen e tayim nib mo’maw’ ni aram e tin tomuren e rran. Ke yog ni gaar: “Girdi’ nib kireb nge piin ni yad be dake girdien Kristus e bayi gel farad kireb nguur banniged boch e girdi’ ma yibe bannagrad.” (2 Tim. 3:13) Ere rib ga’ fan ni ngad motoyilgad ma ngad folgad ko machib ni yib rok Got ya nge dabiyog ni ngan bannagdad! Ere, manga yugu da nameged ni ngad uned ko re program ney, nib puluw ngal’an ni kan fal’eg ma gad motoyil nib fel’ rogon.