Thin Rok Got e Bay Gelngin
1. Mang kenggin e special assembly ko duw ni 2014?
1 Thin ko Bible e ba thil nga boch ban’en ni ke sunmiy e girdi’, ya bay gelngin ni nge thilyeg rarogodad, me yal’uweg e lem nge ngongol rodad ya nge yan i aw nib puluw ko n’en nib m’agan’ Jehovah ngay. Uw feni rib gel gelngin e Thin rok Got? Uw rogon ni ngad maruwelgad ngay u lan e yafas rodad? Ma uw rogon ni ngad fanayed nib fel’ rogon ni ngad ayuweged boch e girdi’ ngay? Ra pagan’dad nra gel e michan’ rodad ni gadad gubin u nap’an ni yira weliy murung’agen e pi n’ey ko special assembly ni fan ko duw ni 2014. Kenggin e re program nem e “Thin Rok Got e Bay Gelngin,” ni kan fek ko Hebrews 4:12.
2. Mang e pi deer ni thingar da nanged e fulweg riy?
2 Mu Gay e Fulweg ko Pi Deer Ney: Nap’an ni ga ra rung’ag e pi n’en ni yira weliy ko fare program, mag yoloy e fulweg ko pi deer ni baaray.
• Mang fan ni thingari mich e Thin rok Jehovah u wan’dad? (Ps. 29:4)
• Uw rogon nrayog ni nge gagiyegnagdad e Thin rok Got? (Ps. 34:8)
• Uw rogon ni ngam fanay gelngin e Thin Rok Got u nap’an ni ga be machib? (2 Tim. 3:16, 17)
• Uw rogon ni ngad kol ayuwgad rok Satan nge pi ban rok? (1 John 5:19)
• Faanra gur reb e fel’ yangaren, ma uw rogon ni ngam mon’og ko tirok Got ban’en? (Jer. 17:7)
• Uw rogon ni ngad gelgad ni yugu aram rogon ni gadad ba meewar? (2 Kor. 12:10)
• Uw rogon ni ngad thilyeged boch ban’en ko yafas rodad, ni yugu aram rogon ni kad mechamgad nga boch ban’en nib kireb? (Efe. 4:23)
3. Uw rogon nrayog ngki fel’ rogodad ko fare program, ko bin ni kemus ni ngad motoyilgad ngay?
3 Nap’an ni gad ra rung’ag e pi n’ey, ma uw rogon nrayog ni nge fel’ rogodad riy. Special assembly e ku taareb rogon ko circuit assembly nge district convention, ni bay e pi walag u boch e ulung nrayog ni ngad chaggad ngorad. (Ps. 133:1-3; 2 Kor. 6:11-13) Ere, ngam gay e tayim ni ngam chag ngorad, mag gay rogon ni ngki yag boch e fager ngom nib beech. Faanra ke yib e district overseer ara reb e walag u Bethel ni nge pi’ e ayuw ko special assembly ko ulung rodad, mab fel’ ni ngad pininged e magar ngak nge ppin rok. Riyul’, ni boor i fan ni ngad felfelan’gad ko fare special assembly ni bay yib.