Bin nib Biech e Special Assembly

Pi Kristiano kakrom e ur pasiggad ngar wereged fare thin nib fel’ nga gubin yang nri rayog rorad ni bochan e kan ni thothup. (Acts 1:8; Kol. 1:23) Fa bin nib biech e special assembly ko 2007 ni “Ngan Par ni Yigoo Thin Rok Got e Yibe Machibnag,” e ra ayuwegdad ngad folwokgad rorad.​—Acts 18:5.

I weliy David u murung’agen e thin rok Got ni gaar: “Motochiyel rok Somol e rib yal’uw; ra pasignag lanin’uy me pi’ gelngin; ma tin ni be yog ni murung’agen Somol e ba riyul’ ma ma pi’ e gonop ngak e piin ndariy rorad.” (Ps. 19:7) Pi welthin ni kan fl’eg ni fan ko 2007 special assembly e ra tamilangnag nib ga’ fan e Thin nu Bible ya “be yal’uweg e tin ni be oloboch e girdi’ riy” ma ra pi’ e athamgil nga lanin’dad ngad pasiggad i machibnag fare thin nib fel’. (2 Tim. 3:16, 17) Fapi welthin e ra dag ngodad rogon ni ngad siyeged e tin ni be oloboch e girdi’ riy nge fel’ rogodad ngad folgad ko pi motochiyel nu Bible u gubin ngiyal’. Maku ra ayuwegdad ngad fanayed e Thin Rok Got ni nge ayuweg e piin ni fel’ yangaren nge piin ni ka fini un ko tin riyul’ ngar mon’oggad iyan ko tirok Got ban’en.

Mu turguy ni ngam par riy ko ngiyal’ nra tabab e muulung, ma ga tiyan’um ngay. Mu yoloy nga but’ boch e thin nrayog ni ngam fol riy. Nga mu dag ni ga be tay fan e thin ni yibe pi’ ngom, ma ga fl’eg i lemnag ko uw rogon ni ga ra fol ko pi n’en ni kam rung’ag.

Fare special assembly e ra ayuwegdad nguud ted fan e Thin Rok Got, nge puguran ngodad ni nguud pasiggad i machibnag fare thin nib fel’ u murung’agen e Gagiyeg Rok Got, me dag ngodad ko uw rogon ni ngad ayuweged yugu girdi’ ngar yodorgad. Ere mu duguliy ndab mu pag e thin ni be pi’ Jehovah ko re muulung ney!​—Isa. 30:20b, 21.