Yira Wereg e Kingdom News No. 38 ko December!

1. Mang boch e deer ni ma lemnag e girdi’ u murung’agen e yam’, ma uw rogon ni yira pi’ e fulweg riy u nap’an e December?

¹ Yam’ e toogor rok urngin e girdi’, ndemturug e n’en ni ke mich u wan’rad. (1 Kor. 15:26) Boor e girdi’ ni ma lemnag ko uw e ke yan e piin kar m’ad ngay. Maku boch i yad e ma lemnag ko ka gad ra guy e pi girdi’ nem bayay fa danga’. Ere kan yarmiy ni nge wereg e pi ulung u fayleng i yan fare Kingdom News No. 38 ni kenggin e Rayog ni Ngki Fas e Piin ni Kar M’ad Bayay? Yira rin’ e re n’ey u lan reb e pul ni yira tabab ngay ko December 1. Nap’an ni yira mu’ i wereg e re Kingdom News ney, ma aram e yira wereg u nap’an e machib ni bod e tract.

2. Uw rogon ni kan fal’eg fare Kingdom News No. 38?

² Rogon ni Kan Fal’eg: Kan fal’eg fare Kingdom News No. 38 nrayog ni ngan t’ar u lukngun ya nge yag nni guy e tin som’on e thin ni bay u wuru’ nge fapi thin ni be gaar “Mang e ga ra yog . . . arrogon? danga’? sana?” Nap’an nra pithig be’ nga baan langgin ma ra guy e fulweg ko fare deer ni bay u wuru’ nrogon ni be yog e Bible, maku rayog ni nge beeg riy rogon nra yib angin e pi n’en ni ke micheg e Bible ngak nge fan nrayog ni nge mich e Bible u wan’. Ku bay reb e deer u barba’ e re Kingdom News nem ni fan ngak e en nra fek e re gi babyor nem ni nge pug e tafinay rok ni nge adag ni ngki nang boch fan.

3. Uw rogon ni yira wereg fare Kingdom News No. 38?

³ Rogon ni Yira Wereg: Re campaign ney e taareb rogon ko campaign ni gad ma tay u nap’an ni gad be wereg e invitation ko Puguran nge district convention. Ra yog e piin piilal rogon ni yira wereg e re gi babyor ney nrogon nib puluw nga bangi babyor ni kan pi’ ngorad ko rofen ni April 1, 2013. Tin ni baaray e ulung nib achig e gin ni yad ma machib riy e ku rayog ni ngar pied e ayuw nga boch e ulung nib ga’ yang e gin ni yad ma machib riy. Ga ra yan ni ngam fek e Kingdom News, ma dab mu pagtalin ni ngam fek chi urngin ni ngam wereg u lan reb e wik. Tomuren ni kan mu’ i wereg e re gi babyor ney u mit e tabinaw ma rayog ni ngan wereg ko yungi n’en ni ma muulung e girdi’ ngay. Faanra kan mu’ i wereg e re babyor ney ni dawori m’ay e re pul nem ma rayog ni ngan tabab i wereg e babyor ni susun yira wereg ko re pul nem. Dab kun fanay e bin som’on e Sabado ko re pul nem ni ngan ognag e fol Bible ko girdi’, ya aram e rofen nthingar ni wereg e re babyor ney. Ga be fal’eg rogom ni ngam un ko re maruwel ney, fa?