Rogon ni Ngan Ayuweg e Piin Ndawori Taw Nga Nap’an ni Ngan Fil fare Babyor Ngorad ni Mang e Ri Be Fil e Bible?

1. Gubin e girdi’ ni gad ra dag fare ke babyor ngorad ni Mang e Ri Be Fil e Bible? ko som’on ma yad ra adag, fa? Mu weliy rogon.

¹ Ra nge mang be’ reb e tapigpig rok Jehovah, ma thingari nang e n’en ni be fil e Bible. Machane, bay boch e girdi’ ni yad ma un nga boch e teliw ndarur rogned ni yad e Kristiano maku de mich u wan’rad ni Bible e Thin rok Got. Boch e girdi’ e de mich Got u wan’rad maku dariy fan e Bible u wan’rad. Ere, mang boch e babyor ni ke yag ni ngan fanay ni ngan ayuweg e girdi’ ngay ndubrad ni ngar feked fare ke babyor ni Mang e Ri Be Fil e Bible? ko som’on? Pi thin ni baaray u but’ e ba puluw ko n’en ni ke yog boch e tamachib u 20 e nam u fayleng i yan.

2. Faanra ke yog be’ ngodad nde mich Got u wan’, ma mang e susun ni ngad guyed rogon ni ngad nanged u murung’agen, ma mang fan?

² Piin De Mich Got u Wan’rad: Faanra ke yog be’ nde mich Got u wan’, mab fel’ ni ngam guy rogon ngam nang ko mang fan. Gur, bochan ni ke mich e evolution u wan’ ara fare machib ni ke sum e girdi’ ko gamanman? Gur, daki mich Got u wan’ ni bochan e tin nde mat’aw ni be buch u fayleng nge sasalap ni be tay e pi yurba’ i teliw? Ke yib u reb e nam ni yima guy rogon ni nge dab ki mich Got u wan’ e girdi’ riy, fa? Sana der ma yog ndariy e Got, machane der ma lemnag ni nge guy rogon ni nge mich Got u wan’. Boor e walag e kar pirieged ni faan yad ra fith ko facha’ ni nge lungurad, “Kab kafram i yib ni ga ma lem ni aram rogon?” ma ra k’aring ni nge weliy laniyan’. Faanra rin’ ni aray rogon, ma ngam motoyil ma dab mu th’ab e thin rok. Faan gad ra nang ko mang fan nder mich Got u wan’ be’, ma gad ra nang rogon ni ngad pied e fulweg ko n’en nra fith nge babyor ni ngad pied ngak.​—Prov. 18:13.

3. Uw rogon ni ngad daged ngak be’ ni kad mada’naged u nap’an e machib ni gad be tayfan nge pi n’en ni ke mich u wan’?

³ Nap’an ni ga ra non ngak facha’, ma ngam guy rogon ni nge dabi lemnag ni ga be togopuluw ko n’en ni be lemnag. Baaray e n’en ni ke yog boch e walag u Meriken: “Ba fel’ ni ngam tayfan mat’awun be’ ni kan pi’ ni nge dugliy e n’en ni nge mich u wan’. Ba fel’ ni ngam fith boch e deer nra ayuweg ni nge lemnag me dugliy boch ban’en nib puluw, ko bin ni ngam tugthingow mag guy rogon ni nge m’ug ni gur e ba puluw e n’en ni ga be yog.” Immoy reb e walag ni ma lekag e ulung ni mada’nag be’ u nap’an e machib, mu tomuren ni ke weliy facha’ laniyan’, me fith ngak ni gaar, “Ka am lemnag ko rayog ni nge riyul’ e re thin ni baaray fa danga’?”

4. Uw rogon nrayog ni ngad ayuweged e Buddhist?

⁴ Boor e Buddhist ni gathi ri ba mich Got u wan’rad. Boch e walag u Britain e yad baadag ni ngar fanayed fare brochure ni Lasting Peace and Happiness​—How to Find Thema u nap’an ni yad ra mada’nag e Buddhist. Tomuren ni kar weliyed e tin som’on e thin riy, mi yad weliy fare thin ni kenggin e, “Is There Really a Most High Creator?” nge fare thin ni kenggin e, “A Guidebook for the Blessing of All Mankind.” Tomuren ni kar weliyed e pi thin ney ma rayog ni ngar weliyed murung’agen fare ke babyor ni Mang e Ri Be Fil e Bible? mi yad gaar ngak facha’, “Mus ni faanra de mich Got u wan’um, machane faan ga ra fil e Bible, mab ga’ angin nra yib ngom ni bochan e boor e fonow riy nrayog ni nge pow’iyey.” Reb e pioneer u Meriken ni ma machib ko gin ni ma par e Chinese riy e gaar: “Boor e girdi’ ko gin ni gamad ma machib riy ni yad baadag e beeg babyor. Ere, ba ga’ ni yad ma beeg e pi babyor ni gamad ma pi’ ngorad ni ga’ngin u m’on ni nggu sulod ngorad. Machane dar nanged ko mang e fol Bible ni gamad ma tay ko girdi’. Ere, gu baadag ni gu ma pi’ fare brochure ni kenggin e Thin nib Fel’ ko yay nsom’on ni kug mada’nag bagayad ni bochan e kan fal’eg u reb e kanawo’ nra pi’ e athamgil nga laniyan’ be’ ni nge adag ni ngan weliy murung’agen e Bible.” Reb e circuit overseer ni ma un nga reb e ulung u Meriken ni yima thin ni Chinese riy e yog nrayog ni ngan pi’ fare ke babyor ni Mang e Ri Be Fil e Bible? ko yay nsom’on ni kan mada’nag be’. Machane, ba fel’ ni ngan tabab i fil e Bible ngak be’ ko guruy ni 2, ya be weliy murung’agen e Bible, ko bin ni ngan tabab ko guruy ni 1 ni be weliy murung’agen Got.

5. Mang nib ga’ fan e gum’an’?

⁵ Ba n’uw nap’an mfini mich Got u wan’ be’, ere ba ga’ fan ni ngad gum’an’gad. Sana yay nsom’on ni gad ra non ngak be’ e dabi mich u wan’ ni bay be’ ni ke Sunmiy urngin ban’en. Machane, sana ra munmun ma ra yog nsana riyul’ ni bay be’ ni ke sunmiy urngin ban’en, ara ki yog ni ke nang fan ni ke riyul’ u wan’ boch e girdi’ e re n’ey.

6. Mang e rayog ni nge k’aring boch e girdi’ ni nge dab ki mich e Bible u wan’rad?

⁶ Piin Ndubrad ni Ngar Motoyilgad ara De Pagan’rad ko Bible: Machane, ba ga’ ni piin nib mich Got u wan’rad e dubrad ni ngar motoyilgad ko thin nu Bible ni bochan e der mich u wan’rad. Pi girdi’ ney e sana yad ma par ko pi nam ndariy e teliw ni Kristiano riy, maku yima yog riy ni yigoo pi yurba’ i teliw ko Kristiano ni googsur e ir e yad ma fanay e Bible. Maku reb e sana yad ma par ko pi nam ni boor e teliw ko Kristiano riy, machane gathi ri ma yan e girdi’ riy nga galesiya. Ere, yad ma lemnag ndabi yib angin e Bible ngorad. Uw rogon nrayog ni ngad ayuweged e girdi’ ni aray rogon ni ngar adaged e thin nu Bible, me munmun me m’agan’rad ngay ni ngar filed fare ke babyor ni Mang e Ri Be Fil e Bible?

7. Mang e ba fel’ ni ngan rin’ nra k’aring e girdi’ ni ngar adaged ni ngar motoyilgad ko thin nu Bible?

⁷ Ke yog e branch ofis u Greece ni gaar: “Bin th’abi fel’ e kanawo’ ni ngan ayuweg e piin ndubrad ni ngar nanged murung’agen e Bible e aram e ngan pithig e Bible min dag e n’en ni bay riy ngorad. Boor e walag ni kar nanged nib ga’ angin e re n’ey ko bin ni nga yugu rogned ban’en ndariy rogon ko Bible. (Heb. 4:12) Boor e girdi’ ni kar guyed fithingan Got u lan e Bible ma ke ayuwegrad ni ngar adaged ni ngkur beeged boch e thin riy.” Ki yog e branch ofis u India ni gaar: “Boor e girdi’ ni yad ma un ko teliw ni Hindu ni yad baadag ni ngan weliy e tin riyul’ u murung’agen e yafas nge yam’. Ku yad baadag ni ngar motoyilgad nga murung’agen e n’en ni be micheg e Bible u murung’agen reb e fayleng nde yu thal e girdi’ riy.” Faan yira weliy boch ban’en ni be magawonnag laniyan’ e girdi’ u lan binaw ma aram e yad ra adag ni ngan dag ngorad e n’en ni be yog e Bible nra rin’ Gil’ilungun Got ni nge pithig e pi magawon nem.

8. Mang e rayog ni nga dogned ko piin nder pagan’rad ko Bible ni bochan e pi Yurba’ i Teliw ko Pi Kristiano ni Googsur?

⁸ Faanra der mich e thin nu Bible u wan’ be’ ni bochan rogon ni ke pilyeg e pi Yurba’ i Teliw ko Kristiano ni Googsur, ma gog ngak ni pi Yurba’ i Teliw ko Kristiano ni Googsur e kar thilyeged fan e thin nu Bible nge pi machib riy. Ke yog e branch ofis u India ni: “Yu ngiyal’ e ba t’uf ni ngad ayuweged yad ngar nanged ni pi yurba’ i teliw e gathi yad e thin rorad e bay u lan e Bible.” Ka rogned ni piin ni yad ma un ko teliw ni Hindu e ba ga’ ni yad baadag e thin ni bay ko guruy ni 4 ko fare brochure ni kenggin e, What Is the Purpose of Life? How Can You Find It?b, ya be weliy rogon ni ke kirebnag e pi yurba’ i teliw e Thin rok Got. Reb e pioneer u Brazil e ma yog ko girdi’ ni ma gaar: “Mang ndab mu gay rogon ngam nang e n’en ni bay u lan e Bible? Boor e girdi’ e aray rogon e n’en ni yad be rin’, ma de t’uf ni ngar pied ban’en ko teliw. Sana ga ra gin ko n’en ni ga ra fil.”

9. Faanra kad mada’naged boch e girdi’ ndubrad ni ngar motoyilgad ko thin nu Bible, ma mang fan ndabi mulan’dad?

⁹ Jehovah e ma yaliy e n’en ni bay u gum’irchaen e girdi’. (1 Sam. 16:7; Prov. 21:2) Be pow’iy e piin nib fel’ gum’ircha’rad ko tin riyul’. (John 6:44) Boor e pi girdi’ ney ndawor ni fil murung’agen Got ngorad ara dar nanged e n’en ni bay u Bible. Ere, machib ni gad ma tay e ra bing e kanawo’ ngorad ni ngar ‘thapgad ngak Got mar nanged e tin nib riyul’.’ (1 Tim. 2:4) Ere, faanra kam mada’nag boch e girdi’ ndubrad ni ngar motoyilgad ko thin nu Bible, ma dabi mulan’um! Kum fanay boch e babyor ni bay ko thin rom ni ngam ayuwegrad ni ngar adaged ni ngar motoyilgad. Dabisiy nra munmun ma rayog ni ngam fanay fare ke babyor ni Mang e Ri Be Fil e Bible? ni ir e gad ma fil e Bible riy ko girdi’.

[Boch e thin nra tamilangnag murung’agen]

[Kahol ko page 4]

Faanra ke yog facha’ nde mich Got u wan’, ma baaray e n’en nrayog ni ngam rin’:

• Mu fith ni nge lungum, “Kab kafram i yib ni aram rogon e lem rom, fa?” ya nge yag nim nang ko mang fan ni ke non ni aram rogon.

• Faanra ir reb e Buddhist, mag fanay fare brochure ni kenggin e Lasting Peace and Happiness​—How to Find Them, ko page 9-12.

• Faanra ba mich e evolution u wan’, ma baaray boch ban’en nrayog ni ngam fanay:

Awake! ko fare thin ni kenggin e “Was It Designed?”

Fare video ni kenggin e The Wonders of Creation Reveal God’s Glory

Fapi brochure ni kenggin e A Satisfying Life​—How to Attain It, section 4; nge Was Life Created?; nge The Origin of Life​—Five Questions Worth Asking

• Faanra daki mich Got u wan’ ni bochan e tin nde mat’aw ni be buch nge pi n’en ni be gafgow e girdi’ riy, ma baaray boch ban’en nrayog ni ngam fanay:

Fare ke babyor ni kenggin e Is There a Creator Who Cares About You?, ko guruy ni 10

Fa gal brochure ni kenggin e Does God Really Care About Us?, part 6, nge What Is the Purpose of Life?, section 6

• Nap’an ni ga ra guy ni ke adag ni ngan weliy e mich riy nriyul’ ni bay Got, mi gimew tabab i fil fare ke babyor ni Mang e Ri Be Fil e Bible? Sana ba fel’ ni ngam tababgow ko guruy ni 2 ara yugu reb e guruy nib m’ag ngak.

[Kahol ko page 5]

Baaray e n’en nrayog ni ngam rin’ ni faanra de mich e Bible u wan’ facha’:

• Mu weliyew e guruy ni 17 nge 18 ko fare ke babyor ni Life​—How Did It Get Here? By Evolution or by Creation?

• Ra kam mada’nag be’ ni ma un ko teliw ni Hindu, mag fanay fare brochure ni kenggin e Why Should We Worship God in Love and Truth?

• Faanra kam mada’nag be’ ni ma un ko teliw ko Jew, mag fanay fare brochure ni kenggin e Will There Ever Be a World Without War?, ko page 3-11.

• Mu weliy angin nra yib riy ni faan yira fol ko pi kenggin e motochiyel u Bible. Baaray boch e babyor nrayog ni ngam fanay ni ngam dag ngak be’ angin e Bible:

Awake! ko fare thin ni kenggin e “Help for the Family”

Fare video ni kenggin e The Bible​—Its Power in Your Life

Fapi brochure ni kenggin e Thin nib Fel’ ni Yib rok Got!, ko guruy ni 9 nge 11; nge A Book for All People, ko page 22-26; nge A Satisfying Life​—How to Attain It, section 2

Faanra ir reb e Buddhist, mag fanay fare brochure ni kenggin e The Pathway to Peace and Happiness, ko page 3-7.

Faanra ir reb e Muslim, mag fanay fare brochure ni kenggin e Real Faith​—Your Key to a Happy Life, section 3.

Faanra ga be machib u bang ni dabun e girdi’ riy ni ngar motoyilgad ko thin nu Bible, ma sana ba fel’ ndab mog ban’en u murung’agen e en ni thin rok e bay riy nge mada’ ko ngiyal’ ni kam sul ngak ni ke yoor yay.

• Mu weliy rogon ni ke lebug e pi yiiy u Bible. Baaray boch e babyor nrayog ni ngam fanay:

Fare video ni kenggin e The Bible​—Accurate History, Reliable Prophecy

Fare brochure ni kenggin e A Book for All People, ko page 27-29

• Nap’an ni ga ra guy ni ke yoor ban’en ni kam filew, mi gimew tabab i fil fare ke babyor ni Mang e Ri Be Fil e Bible?

[Kahol ko page 6]

Faanra ke gaar facha’: “De mich Got u wan’ug,” ma rayog ni lungum:

• “Rayog ni nga yug gu weliy ngom e n’en ni ke ayuwegeg ni nge mich u wan’ug nriyul’ ni bay be’ ni Ke Sunmiy urngin ban’en?” Ngemu’ mag dag boch e thin ngak ni bay ko fare ke babyor ni Reasoning, ko page 84-86, ara mu yarmiy ni ngam fek ba ken e babyor ngam pi’ ngak ni kam beeg bayay, ma ga baadag.

• “Machane, faanra riyul’ ni bay Got, ma ba miti mang ngongol e ga baadag ni nga i dag?” Yooren e girdi’ e ba ga’ ni yad ma yog ni yad baadag reb e Got ni ma t’ufegey, mab mat’aw e tin ni ma rin’, ma ma runguyey, ma taareb rogon urngin e girdi’ u wan’. Ngemu’ mag dag boch e thin nu Bible ngak ni be micheg nriyul’ ni bay e pi fel’ngin ney rok Got. (Ku rayog ni ngam fanay e thin ni bay ko guruy ni 1 ko paragraph 6 ko fare ke babyor ni Mang e Ri Be Fil e Bible?)

Faanra ke gaar facha’: “De mich e Bible u wan’ug,” ma rayog ni nge lungum:

• “Boor e girdi’ ni er rogon e lem rorad. Boch e girdi’ e yad ma lemnag nde puluw e thin nu Bible ko science ara de puluw e pi motochiyel riy. Kaam beeg e Bible ba ngiyal’? [Mmotoyil ko n’en nra yog. Ngemu’ mag dag ngak e thin ni bay ko page 3 ko fare brochure ni kenggin e A Book for All People, ngemu’ mag pi’ ngak.] Boor e girdi’ ni yad ma lemnag nde riyul’ e thin u lan e Bible ni bochan e ke thilyeg e pi yurba’ i teliw fan e machib riy. Gu baadag ni nge yay ni migid ni gu sul mug weliy boch ngom ni bay ko page 4 nge 5.”

• “Boor e girdi’ ni yad ma lem ni bod gur. Rayog ni nggu dag ngom ban’en ni kug guy u Bible nri gu baadag? [Mu beeg e Job 26:7 ara Isaiah 40:22, ni be dag ni Bible e ba puluw ko science.] Ku bay boch e thin u Bible nrayog ni nge ayuweg e tabinaw. Gu baadag ni nge yay ni migid ni gu sul mug dag ngom.”

• “Kammagar ni ka mog e re n’ir ngog. Machane, faanra riyul’ ni ke yoloy Got ba ken e babyor ni fan ko girdi’, ma mang e ga be lemnag ni bay riy?” Ngemu’, mag dag ngak ban’en ni bay u Bible nib puluw ko n’en ni ke yog.