Ngan Gur Ngan Rin’ e Tin nib T’uf ni Ngan Rin’

Nap’an ni kan tabab i fanay fa bin nib beech e Web site rodad, ma ke yoor e girdi’ ni yad be yog ni ngan fil e Bible ngorad. Maku reb e, ki yoor e girdi’ ni yad ma yog ni ngan fil e Bible ngorad ni bochan boch e kanawo’ ni kab beech ni gad be machib riy. Ere, nap’an nra pi’ be’ bang e babyor ni be yog ni baadag ni ngan fil e Bible ngak, ma ma gur e branch ofis ni nge pi’ e gi babyor ney ko ulung. Bod ni, faanra ke pi’ be’ e request rok ko jw.org, ma l’agruw e rran nga tomuren ma ke taw e thin ko branch ofis ko piin piilal ko ulung ko gin ni ma par facha’ riy. Machane, be m’ug ko report ni ma yib ko machib ni yima tay u mit e tabinaw nge yu yang ni bay boch e girdi’ ni bay rogned ni ngan fil e Bible ngorad, me yan in e wik ndab ni sul ngorad. Ere, uw rogon ni ngad gurgad ngad ayuweged e pi girdi’ ney u m’on ni ngar dabuyed e machib?​—Mark 4:14, 15.

Faanra der ma par facha’ ko binaw ni ma machib e ulung rom riy ma be yog ni baadag e machib, mag gur ngam ngongliy bang fagi babyor ni Please Follow Up (S-43) ngam pi’ ko secretary ko ulung rom u m’on ko bin migid e muulung. Nap’an ni yira pi’ e gi babyor ney ko en ni ir e secretary ma susun ni nge pi’ nge yan ko branch ofis ndabi pag l’agruw e rran nga tomuren ni be fanay fare Congregation tab ni bay ko jw.org. Susun ni gubin e rran ni nga i yaliy e piin piilal e re Web site ney. Ya faanra kan pi’ e babyor ke yib ngorad ni be yog ni bay be’ ni baadag ni ngkun sul ngak, ma susun ni ngar gurgad ngar yarmiyed ni nge yan reb e walag i guy. Ma faanra ka nog ngak reb e walag ni nge yan i guy facha’, ma susun ni nge yan i guy nib papey. Faanra ke yan nga tafen facha’ ma de moy, ma rayog ni nge yoloy bochi yang e babyor nge tay ni bay fithingan riy nge gin nrayog ni nge callnag facha’ ngay.