Deer

◼ Mini’ e susun ni nge yoloy e babyor nge pi’ nga branch ni nge ning e babyor ara nge yog ni nge yan reb e walag i guy be’?

Pi babyor rodad e ba ga’ ni bay yu yang riy nrayog ni ngan yoloy boch e thin ngay ngan pi’ ko branch ofis ni ngan ning e babyor ara nga nog ni nge yan bagayad e Pi Mich Rok Jehovah nga tafen be’ ni baadag e machib. Maku fare Web site rodad ni www.watchtower.org e ku rayog ni nge fanay be’ ni nge yog ni ngan yan nga tafen ngan fil e Bible ngak. Pi n’ey e be ayuweg boor e girdi’ ni ngar filed e tin riyul’. Machane, boor e magawon ni ke sum ni bochan e bay boch e walag ni yad ma fanay e pi n’ey ni ngar ninged e babyor ni fan ko girdi’ rorad, ara yugu boch e girdi’, ara nga rogned ni ngan yan nga tafen e pi girdi’ ney ngan fil e Bible ngorad.

Bay boch e girdi’ ni kar puwan’gad ni ke pi’ e branch ofis boch e babyor ngorad ni bochan e yad be lemnag ni be magawonnagrad e ulung rodad ma kan uneg fithingrad nga fithingan boch e girdi’ ni nga i pi’ e ulung rodad e babyor ngorad. Maku bay boch e walag ni kar magawongad ya ka nog ngorad ni nga ranod ra guyed boch e pi girdi’ ney ma kar puwan’gad ngorad ni bochan e re n’ey. Ere, susun ni piin ni yad baadag ni nge yog e babyor ngorad ara ngan yan ni guyrad e ir e ngar yoloyed e pi babyor ney nga branch ma gathi pi walag u lan e ulung. Ra nang e branch ofis ni ke pi’ be’ bang e babyor ni fan ngak be’ ma yad ra n’ag.

Ere, uw rogon ni ngad ayuweged reb e girdi’ rodad ara be’ ni gad manang ko tirok Got ban’en? Faanra ga baadag ni nge beeg ba ken e babyor rodad, ma mang ndab mu pi’ ngak ni tow’ath rok. Faanra ke yog ni baadag e machib, ma baadag ni nge yan be’ i guy machane dam nang ko uw rogon me thap e thin ngak e piin piilal u reb e ulung nib chugur ngak, ma aram e rayog ni ngam fal’eg bang fare babyor ni ka nog e Please Follow Up (S-43) form ngay ma ga pi’ ko secretary ko ulung rom ni nge yaliy me pi’ ko branch ofis. Machane, faanra facha’ ni baadag e machib e bay u kalbus, ara reb e aspital, ma dab mu non ngak e branch ofis ni fan ngak. Rayog ni nga mog ngak ni nge non ko pi walag ni yad ma yan e ngaram ara yol ko branch ofis.