Deer
◼ Gur, thingari fanay e pi walag e internet ni ngar machibgad ara ngar filed e Bible ngak e girdi’ ni ma par u boch e nam?
Bay boch e walag ni kar fanayed e internet ni ngar tababnaged e fol Bible ngak e girdi’ u boch e nam ni dabiyog ni ngan yan ngay ko machib ara de yoor e walag ni yad be machib u rom. Ma ke yag ni ngan pirieg boch e girdi’ ni yad baadag e machib. Machane, ku bay e riya’ riy ni faanra pi’ e pi walag e e-mail address rorad ara ra nonad ngak boch e girdi’ nder nanged owcherad. (Mu guy fare Machib ko Gil’ilungun, ko July 2007 ko p. 7.) Yugu aram rogon ni ma nameg boch e walag ni ngar weliyed murung’agen Gil’ilungun Got ngak e piin nib sobut’ lanin’rad, machane bin riyul’ riy e rayog ni ngar nonad ngak e piin nrayog ni nge waliyrad ko ngongol nib kireb, maku rayog ni ngar nonad ngak e piin ni kar chelgad kar togopuluwgad ko bin riyul’ e liyor. (1 Kor. 1:19-25; Kol. 2:8) Maku lan e pi binaw nib mo’maw’ e machib riy ara kan taleg e machib riy, ma bay e pi walag ni yad ma fanay e internet ni ngar machibnaged boch e girdi’ u boch e nam, ma re n’ey ni yad be rin’ e rayog ni nge nang girdien e am ko re nam nem, ma aram e rayog ni ngan kol e pi walag u rom min kalbusnagrad ara ni thang e fan rorad. Ere, thingari dabi guy e pi walag rogon ni ngar fanayed e internet ni ngar gayed e girdi’ u boch e nam ni ngar filed e Bible ngorad.
Rayog ni ngad machibnaged be’ u fithik’ e sabethin ni ke yib u reb e nam, machane nap’an nra sul ko nam rok ma susun dab kud guyed rogon ni ngad ululgad i machibnag u internet. Faanra dariy ban’en ni ke yog e branch ofis rodad u murung’agen e re n’ey ma susun ndab ni rin’. Machane, rayog ni nga dogned ngak rogon ni nge yan ko fare website rodad ni jw.org, ya nge yag ni ngki nang boch murung’agen e tin riyul’ ara nge nang rogon ni nge non ngak be’ ko branch ko binaw rok. Rayog ni ngan pi’ e athamgil nga laniyan’ ni nge yan ko Kingdom Hall ara Tagil’ e Liyor ko birok e binaw. Maku bay boch e binaw ndariy Tagil’ e Liyor ko Pi Mich Rok Jehovah riy. Faanra baadag facha’ ni nge yib e pi walag ko binaw rok ngar guyed, ma rayog ni ngam fal’eg fare babyor ni ka nog e Please Follow Up (S-43) form ngay ngam pi’ ko secretary ko ulung, ma aram e ra yan fare secretary ko jw.org ni nge fal’eg e re babyor nem nge pi’. Fare branch ofis ni yad e yad ma yarmiy e machib ko fare binaw ni ma par faanem riy ni baadag ni ngan fil e Bible ngak e yad manang rarogon e re binaw nem, maku yad manang rogon ni ngar pied e ayuw ngak ko tirok Got ban’en nib fel’ rogon.—Mu guy fare Machib ko Gil’ilungun ko June 2014, ko p. 7, nge November 2011, ko p. 2.
Faanra gad be fil e Bible ngak be’ ma ke yan i par nga reb e binaw ara gadad be fanay e internet ni ngad filed e Bible ngak be’ u reb e binaw, ma thingar da folgad u rogon ni ka nog ni ngan rin’. Ere, rayog ni ngad ululgad i rin’ e re n’ey nge yan i mada’ ko ngiyal’ ni ke yan reb e walag ko fare binaw i guy facha’ ngar ululgow i fil e Bible. Machane, faanra bay be’ ni ma par u reb e binaw nib mo’maw’ e machib riy ara dabiyog ni ngan yan ngay ko machib, ma thingar ni kol ayuw u nap’an ni yibe weliy e thin ko Bible u daken e pi babyor ni yibe yoloy, ara machib u telefon ara internet.—Matt. 10:16.